1 Yun te ni ndakondiaꞌa Pablo nuu ndiꞌi tee ka jaꞌnde kuechi yun, te jiñaꞌa de:

―Tata ñani, sein chi jini guaꞌa san ja masu na kuechi tavi san, chi saꞌa ndaa san nuu ia Dios ndee kiuu vitna ―jiñaꞌa de.

2 Yun te ni tatnuni Ananías tee kuu nijaꞌnu ka nuu sutu yun ja na vi katu tee ka nukuiin yatni yun maa yuꞌu Pablo. 3 Yun te jiñaꞌa Pablo nuu sutu kuu nijaꞌnu yun:

―Dios na kani ña jin maa ni, chi kuu ni na kuinio yika veꞌe kuijin ndiyi, chi nukoo ni ja saꞌa ndaa ni kuechi san nagua yoso nuu Ley Moisés, su jisokava ni Ley nuu tatnuni ni nuu tee yaꞌa ja na vi kani ña de jin san ―jiñaꞌa de.

4 Te ka jiñaꞌa tee ka oo yun:

―¿Nau ja kaneꞌe ni jin sutu kuu nijaꞌnu ja jinokuechi nuu ia Dios? ―ka jiñaꞌa de.

5 Te jiñaꞌa Pablo:

―Tu ni jini san, vi ñani, ja sutu kuu nijaꞌnu kuu de. Te nuu siun jini san, te ma kaꞌan san, chi yoso nuu tutu ii: “Ma kaneꞌe ron jin tee kuu nijaꞌnu nuu ñuu ron” ―jiñaꞌa de.

6 Yun te nuu ni kutnuni ini Pablo ja masu in ni tee ka kuu tee ni ka ndututu yun, chi sava de ka kuu saduceo, te sava de ka kuu fariseo, te ni kaꞌan jaa de nuu tee ka ndututu yun, jiñaꞌa de:

―Tata ñani, maa san vi tata san ka kuu san fariseo, te ndetu kaꞌnu san nuu ia Dios ja koo in kiuu te ndaxteku ya ndiyi, yun guaa ka kaꞌan kuechi ni siki san ―jiñaꞌa de.

7 Te nuu ni kaꞌan de siun, te ni ka jinkondee tee fariseo jin tee saduceo ka tee tnaꞌa de, guaa ni ka saꞌa siin tnaꞌa de nuu ka otutu de yun. 8 Chi tee ka kuu saduceo yun ka kaꞌan de ja tu ka ndateku ndiyi, ni tu ka kandija de ja ka oo ia ka jinokuechi nuu Dios, ni espíritu tu ka kandija de. Su tee ka kuu fariseo, chi ka kandija de ja oo ndiꞌi yaꞌa. 9 Te ndiꞌi de ni ka kuvaa. Yun te ni ndontakuei sava tee ka kaxtnoꞌo Ley Moisés, ja suni ka yiunduu de ka kuu de fariseo, te ka jiñaꞌa de:

―Tee yaꞌa, tu saꞌun na kuechi vi teo de, chi tu na in jakueꞌe saꞌa de, chi vatu ni, in espíritu ni kaꞌan jin de axi in ia jinokuechi nuu Dios, te ma kuu vi koo siki ia Dios ―ka jiñaꞌa de.

10 Te ja siun ioo ndevaꞌa ka saꞌa de, te ni yuꞌu tee kuu nijaꞌnu nuu soldado yun ja kana saa vi skuechi de Pablo nuu ni ka ndututu de yun. Te ni tatnuni de nuu soldado de ja ni ka ndakindee de Pablo nuu ñayiu yun, te ni ka ndachiꞌi tuku ña de ini cuartel yun. 11 Te nuu jakuaa saa ni skuni ña Jitoꞌo Jesús jin Pablo, te jiñaꞌa ya:

―Koo anu ron te ma yuꞌu ron, chi vi nani ni ndakani ron tnoꞌo rin nuu ñayiu Jerusalén yaꞌa, te vi saa ni kanuu ja ndakani ron nuu ñayiu Roma ―jiñaꞌa ya.

12 Te inka kiuu ni ka ndatnoꞌo tnaꞌa sava ñayiu judio ja vi kaꞌni de Pablo. Te ni ka kee yuꞌu de jin tnoꞌo xtau tniaꞌa de maa de, ja ma vi kaa de xtaa, te ni ndute ma vi koꞌo de vi guaa ndee na vi kaꞌni de Pablo. 13 Te viꞌi ka uu xiko de ni ka ndututu ja ni kekuei yuꞌu de ja siun vi saꞌa de. 14 Te ni jaꞌankuei de nuu tee ka kuu nijaꞌnu nuu sutu vi nuu tee ka kuu nijaꞌnu nuu ñayiu ñuu de, te ka jiñaꞌa de:

―Sein, chi ni kekuei yuꞌu san jin tniaꞌa ja ma vi kaa saꞌun san vi guaa ndee na vi kaꞌni san Pablo. 15 Te vitna ka kuini san ja ndiꞌi maa ni vi tee ka kuu nijaꞌnu nuu junta kiꞌinkuei ni vi kaꞌan ni jin tee kuu nijaꞌnu nuu soldado yun ja na keneꞌe de Pablo, te na kii de nuu vi ndututu de xtnee, chi vi kuñaꞌa ni ni ja ka kuini ni ja vi kakan tnoꞌo guaꞌa ni de, nagua ja vi kundaa ini ni siki de. Te ja vi kotuaꞌa san ja vi kaꞌni san de ama ka ja kenta de ―ka jiñaꞌa de.

16 Su nuu ni onini seyii kuaꞌa Pablo ja siun ka skaꞌan tnaꞌa de, te ni jaꞌin ndee cuartel yun ni jinkaxtnoꞌi nuu Pablo. 17 Yun te ni kana Pablo in tee kuu capitán, te jiñaꞌa de:

―Kuaka ni suchi yaꞌa, te kiꞌin ni jin nuu tee kuu nijaꞌnu, chi oo in tnoꞌo kaxtnoꞌi nuu de ―jiñaꞌa de.

18 Yun te ni jaka ña capitán yun jin suchiun nuu tee kuu nijaꞌnu yun, te jiñaꞌa de:

―Ni kana ña Pablo, tee yiꞌi vekaa jin san, te ni jikantaꞌu de ja kisiaꞌa san suchi yaꞌa, chi oo in tnoꞌo kaxtnoꞌi nuu ni ―jiñaꞌa de.

19 Yun te ni tnii tee kuu nijaꞌnu yun ndaꞌi, te ni jaka siin ña de, te ni jikan tnoꞌo ña de:

―¿Na tnoꞌo kuini ron ja kaxtnoꞌo ron nuu rin? ―jiñaꞌa de.

20 Te jiñaꞌa suchiun:

―Vaji san kaxtnoꞌo san ja ni ka skaꞌan tnaꞌa sava tnaꞌa san judio ja vi kakantaꞌu de nuu ni ja kiꞌin ni jin Pablo nuu junta xtnee, te vi kachi ni de suaꞌa, ja ka kuini de vi kakan tnoꞌo ndaa de Pablo siki nagua ni saꞌa de. 21 Su ma kandija ni, chi viꞌi ka uu xiko de ni ka skaka tnaꞌa guaꞌa de ja vi kondetu yuꞌu de Pablo ichi yun, chi ni ka kee yuꞌu de jin tniaꞌa ja ma vi kaa de xtaa ni ndute ma vi koꞌo de vi guaa ndee na vi kaꞌni de Pablo. Te vitna, chi vi ka ndetu tuaꞌa de ja na kuandetu ni kiꞌin Pablo nuu junta yun ―jiñaꞌi.

22 Yun te jiñaꞌa tee kuu nijaꞌnu yun nui ja ma kokaꞌan saꞌuin nuu ni in ñayiu ja ni jaꞌin ni ndakani nuu de. Te ni ndatetniuu ña de kuanoꞌi.

23 Te ni kana de uu tee ka kuu capitán de, te ni tatnuni de ja na vi saꞌa tuaꞌa tee yun uu ciento soldado ja vi kaka jaꞌa vi uni xiko uxi tee vi koso kuai vi uu ciento tee vi kindaꞌa lanza, chi ka iin jakuaa kekuei de ja kiꞌinkuei de ndee ñuu Cesarea. 24 Te suni jiñaꞌa de ja na vi saꞌa tuaꞌa de in kuai ja koso Pablo, te ni tatnuni de ja na vi koto vaꞌa de Pablo, ja tu nagua ndoꞌo de ichi kiꞌin de, te na vi junsiaꞌa ña de nuu Félix, tee tatnuni ñuu yun. 25 Te ni tee de in tutu ja ka yindaꞌa tee yun, te kaꞌan suaꞌa:

26 “Maa san kuu Claudio Lisias ja tee san tutu yaꞌa nuu ni, vi tata Félix, ja kuu ni in tee tatnuni guaꞌa nuu ñuu. Na taꞌu na ndetu kuu ni nuu ñuu. ¿A kukueni oo ni? 27 Te kaxtnoꞌo san nuu ni ja ñayiu judio ni ka kakuiko tee yaꞌa, te ka nduku de ja vi kaꞌni ña de. Su nuu ni jini san ja seꞌe ñuu Roma kuu de, te ni jaꞌan san jin soldado san ja ni skaku niꞌnu san de. 28 Te ni kuini san ja kukanu ini san na kuechi kuu ja tavi de. Te ni jaꞌan san jin de nuu ni ka ndututu maa tee judio ja ka jaꞌnde kuechi. 29 Te ni jini san ja siki Ley maa de kuu ja ka xtavi de tee yaꞌa, su tu na kuechi tavi de ja kuu de ni ja koo de vekaa. 30 Su ni niꞌi tnoꞌo san ja ni ka skaka tnaꞌa tee judio ja vi kaꞌni ña de. Te yun guaa ni tetniuu ñama san de ja majaa de nuu ni. Te suni ni kaxtnoꞌo san nuu tee ka kaꞌan kuechi jaꞌa de ja na jakuei de nuu ni, te jian na vi kaꞌan de na kuechi kuu ja ka xtavi ña de. Yaꞌa ni kuu ndiꞌi ja ni soo san nuu tutu yaꞌa. Ndee saa ini ni, saa na kaꞌon”, kaꞌan tutu yun.

31 Yun te ni ka jaka jakuaa ña soldado jin Pablo kuaꞌankuei de ndee ñuu Antípatris, nagua ni tatnuni tee kuu nijaꞌnu yun. 32 Te nuu ni tuu inka kiuu, te ni ka ndajiokuiin ndiꞌi soldado ka jika jaꞌa yun ni ndajinokuei de cuartel, te maa ni ka tee ka yoso kuai kuaꞌankuei jin Pablo. 33 Te nuu ni jinokuei de ñuu Cesarea, te ni ka jiñaꞌa de tutu yun vi ni ka ndachiꞌi de Pablo ndaꞌa tee tatnuni yun. 34 Te nuu ni ndiꞌi ni kaꞌu de tutu yun, te ni jikan tnoꞌo de ndenu kuu ñuu Pablo. Te nuu ni jini tee tatnuni yun ja in tee ñuu ja tnii Cilicia kuu de, 35 te jiñaꞌa de:

―Nuu kikuei tee ka kaꞌan kuechi siki ni, saa na konini san tnoꞌo kaꞌan ni ―jiñaꞌa de.

Te ni tatnuni de ja na vi kokoto guaꞌa ña tee ka netniuu yun jin Pablo ini palacio ndi Herodes.