7
Ni jani Daniel ja ni jini kuun kiti xeen
1 Te kuia xtnañuꞌu ja ni tatnuni Belsasar, rey Babilonia, ni jika in jani nuu Daniel nini katui kixin nuu jitoi. Te nuu ni ndotoi, te ni tei ja ka ndanuu ka ni jini nuu jani yun.
2 Te yaꞌa kuu tnoꞌo ja ni tee Daniel: Ni jani san nuu jakuaa ja ni jini san ni junkiꞌi tachi nuu ndi kuun lado ichi andivi, te ni kagua ndute ñuꞌu nuu mar kaꞌnu ndevaꞌa. 3 Te nuu mar yun ni kanakuei kuun kiti xeen naꞌnu ndevaꞌa, te ndi siin ndi siin ka ndaa in in ti. 4 Te kiti xtnañuꞌu, chi na kaa in ndikaꞌa kaa ti, su oo ndijin ti na kuinio yaꞌa naꞌnu. Te vini ni ndiaꞌa san, te ni ka tnoꞌo ndijin ti, te ni ndakoo ndichi ti nuu ñuꞌu, te ni junkuiin ti jin siꞌin ti, na kuinio in teyii, te ni nukonee ti jajintnuni ñayiu.
5 Te inka kiti kuu uu ja ni jini san na kaa oso, te kaneꞌe sukun ka ti in lado xiin ti saa inka, te yiyuꞌu ti uni yiki yika nuu noꞌo ti, te ka jiñaꞌa nuu ti: “Ndakoo te kaa ron kuakuaꞌa kuñu”.
6 Te nuu ni yaꞌa yun, te ndiaꞌa ni san, te ni jini san inka kiti na kaa in leopardo, te oo kuun ndijin ti ichi yata ti na kuinio tisala. Te suni oo kuun xini kiti xeen yaꞌa, te ni niꞌi ti jakaꞌnu ja kotatnuni ti.
7 Te nuu ni yaꞌa yun, te ndiaꞌa ni san nuu jani san jakuaa yun, te ni jini san inka kiti kuu kuun, te ndeꞌe vi ioo ndia kaa ti, te ndakui ndevaꞌa ndetnuni ti. Te kaa ka kuu noꞌo naꞌnu naꞌnu ti, te kakuiko ti ja jaa ti, te skuechi kueli ña ti, te ja ndoo ka te jain niꞌnu ti. Te oo uxi ndiki ti, te siin ndevaꞌa naꞌa ti saa ndiꞌi kiti xeen ja ni jini san ama ka.
8 Te vi nini ndiaꞌa san ndiki ti, te ni jini san ni jinonta inka ndiki luluu neꞌu sava ka ndiki yun, te ni ka tnoꞌo uni ndiki xtnañuꞌu, nagua ja kuu koo ndiki luluu yun. Te ndiki yaꞌa, chi oo nduchi nuu na kuinio ñayiu, te in yuꞌu ja kaꞌan tnoꞌo teyii ndevaꞌa.
Sandaa ia Dios kuechi
9 Te vi saa ni ndiaꞌa san
guaa ndee ni ka junkuiin mesa nuu tatnuni,
te ni junkoo in ia teku ndee nuu ni jinkoo ñuyiu,
te niꞌnu ya in saꞌun yayaa na kuinio yuaꞌa.
Te yayaa ixi xini ya na kuinio ixi yaa vivii,
te mesa nuu tatnuni ya vi ndaꞌa ja yiꞌi yun kuu na kuinio yaa ñuꞌu.
10 Te nuu oo ya ni kee in yute ja kuu ninoꞌo ñuꞌu ja kai,
te kuakuaꞌa ñayiu ka jinokuechi nuu ya
vi kuaꞌa ndevaꞌa ndetnuni ñayiu ka nukuiin nuu ya.
Te nuu ni jinkoo ia ja kaꞌnde ya kuechi,
te ni ka ndanune nuu liuru.
11 Te vi oo ni san ndiaꞌa san ja siun teyii ndevaꞌa kaꞌan ndiki luluu yun, te vi saa ni ndiaꞌa san guaa ndee ni ka jaꞌni ña jin kiti xeen yun, te ni ka skuechi kueli yiki kuñu ti, te ni ka tnaa nuu ñuꞌu ja na kai ti. 12 Te suni ni ka kindee jakaꞌnu ka nevaꞌa sava ka kiti xeen yun. Su ni ka jandetu ja vi koteku ni ti ndesaa ka tiempu guaa ndee na kenta kiuu ja vi kuu maa ti.
13 Te vi oo ni san ndiaꞌa san nuu jani san jakuaa yun,
te ni jini san nuu viko ja vaji in ia na kaa in seꞌe teyii
ja kuaꞌan ya nuu oo ia teku ndee nuu ni jinkoo ñuyiu,
te ni ka siaꞌa yatni ña nuu ya.
14 Te ni ka chitniuu ña jin ya vi ni ka jiñaꞌa jayiñuꞌu nuu ya,
vi ja kotatnuni ya,
nagua ja ndiꞌi ñayiu ñuu naꞌnu vi ñuu kueli vi saꞌan ka kaꞌin,
na vi kunukuechi nuu ya.
Te tniuu nee ya kuu in ja konee ya nikuii nikani ja ma yaꞌa,
te nuu tatnuni ya kuu in nuu ma naa saꞌun.
Ni kaxtnoꞌo in ia jinokuechi yun naxa kei jani Daniel
15 Te ni yuꞌu ndevaꞌa maa san ja kuu san Daniel, vi ni sau kuii ini san jin ja ni jini san nuu jani yun. 16 Te ni jintnaꞌa yatni san in ia jinokuechi ja ka oo yun, te ni jikan tnoꞌo san naxa kei ndija ndiꞌi ja ni jini san yun. Te ni kaꞌan vaꞌa ya ja kaxtnoꞌo ya naxa kei, te kachi ya:
17 ―Ndi kuun kiti xeen yaꞌa ka kuu kuun rey ja vi kotatnuni nii ñuyiu. 18 Su nuu kuee ka, te vi ndaniꞌi ñayiu ñuu maa ia Dios oo ndee sukun nuu vi kotatnuni yun, te siun ni vi kotatnuni nikuii nikani ―kachi ya.
19 Yun te ni kuini san ja kuni san siki kiti kuu kuun yun, ja siun siin ndevaꞌa kaa ti saa sava ka kiti xeen yun, te ioo ndevaꞌa naꞌa ti, chi kaa ka kuu noꞌo ti, te tnii ti ka kuu bronce, te kakuiko ti ja jaa ti, te skuechi kueli ña ti, te ja ndoo ka, te jain niꞌnu ti. 20 Te suni ni kuini san ja kuni san siki ndi uxi ndiki ja ka oo xini ti, vi inka ndiki luluu ja ni jinonta, te ni ka kanakau uni ka ndiki yun. Te ndiki luluu yaꞌa, chi oo nduchi nuu vi yuꞌu ja kaꞌan tnoꞌo teyii ndevaꞌa, te vi kaꞌnu ka naꞌa saa sava ka ndiki yun. 21 Te ni jini san ja ni ndakoo ndiki yaꞌa ni ka jaxin tnaꞌa jin ñayiu maa ia Dios, te ni kundee, 22 guaa ndee ni jino ia teku ndee nuu ni jinkoo ñuyiu. Te ni sandaa ya kuechi ja jaꞌa ñayiu ñuu maa ia Dios oo ndee sukun yun. Te ni jino maa kiuu ja ni ka niꞌi ñayiu ñuu maa ya ja vi kotatnuni.
23 Te kachi ia jinokuechi yun:
Kiti xeen kuu kuun yun kuu tee kuu kuun ja kotatnuni ñuyiu,
te siin ndevaꞌa kokuu de saa sava ka tee ka tatnuni,
te kakuiko de ñayiu ñuyiu, te skuechi kueli ña de,
te kuain niꞌnu ña de.
24 Te ndi uxi ndiki yun kei kaꞌan ja nuu tatnuni yun kekuei uxi ka rey.
Te yata tee yun te kii inka rey, te siin ndevaꞌa koo de saa sava ka tee xtnañuꞌu,
te xtajioo de uni ka rey yun.
25 Te kaneꞌe de jin ia Dios oo ndee sukun
te ndevaꞌa ndetnuni saꞌa de ñayiu ñuu ya,
te nduku de ja sama de kiuu viko vi Ley,
te vi kendoo ñayiu ñuu ia Dios nuu ndaꞌa de nuu uni kuia yosava.
26 Su junkoo ia ja kaꞌnde ya kuechi,
te kindee ya jakaꞌnu ndiso de,
te vi xnaa ña jin de ja naa de nikuii nikani.
27 Yun te vi kuñaꞌa ya nuu tatnuni vi jakaꞌnu
vi javii ndevaꞌa oo ndiꞌi nuu ka tatnuni ñayiu ñuyiu ja oo chii andivi,
nuu ñayiu ñuu maa ia Dios oo ndee sukun.
Te nuu vi kotatnuni kokuu in nuu kotatnuni nikuii nikani,
te ndiꞌi tee ka tatnuni ñuyiu vi kokunukuechi de nui,
te vi kokuantnoꞌo de.
28 Te yaꞌa kuu ndiꞌi ja ni ndakani ya ja jaꞌa jani yaꞌa. Te ja maa san ja kuu san Daniel, chi ni kendoo san jin ja ndakani ndevaꞌa ini san, te vi ni kuyaa tiaꞌa san. Su tu ni ndakani san nuu ni in ñayiu, chi ni tavaꞌa maa san nuu anu san.