1 Te suni ja kuini san kaꞌan san kuu yaꞌa: Nuu ja in suchi luluu kuu suchi niꞌi ja saꞌa jajin, su tu nagua sama saꞌuin jin tee jinokuechi nuu tatai, chi kuini ka ja kotatnuni, visi mai kuu jitoꞌo ndiꞌi ja nevaꞌa tatai. 2 Chi nuu lului, te kendoi nuu ndaꞌa tee ka jito ña jin vi tee ka jito ndatniui guaa ndee kentai kuia ja ni kaꞌan tatai. 3 Te suni saa ni yoon. Chi kokaꞌon ja nuu ni ka oo kuelio, te ni ka ojinokuechio nuu taka janaꞌnu ja ka tatnuni nuu ñuyiu yaꞌa. 4 Su nuu ni kenta ja ni skunkuu tiempu ja ni jani maa ia Dios, te ni tetniuu ya Seꞌe ya ja ni skaku ña in ñasiꞌi judio, te ni kaku ya ja kunukuechi ya nuu Ley Moisés, 5 nagua ja saa, te tniuyaꞌu ya ja ndatau ña ya jin yoon ja ni ka ojinokuechio nuu Ley yun, saa te ni jantaꞌu ña ia Dios ja ni ndakuanseꞌe ña ya.

6 Te ja siun seꞌe ia Dios ka kuo, guaa ni tetniuu ya Espíritu Seꞌe ya ja oo ini anuo, te Espíritu kana jaa: “¡Tata, tata yua maa san kuu ni!” 7 Nuu saa, te masu ka ka jinokuechi ni, chi seꞌe ia Dios ka kuu ni. Te ja seꞌe ia Dios ka kuu ni, guaa suni vi saꞌa jajin ni ja taa ya jin maꞌñu sagua Jesukristu.

8 Su jandaa ja ama ka, chi tu ni ka ojini ni ia Dios, te ni ka ojinokuechi ni nuu janaꞌnu ja masu Dios ka kuu. 9 Su vitna ja ka jini ni ia Dios axi guaꞌa ka kaꞌan san ja Dios jini ña ya jin in in ni, ¿te naxa ni kuu ja ka kuini ni vi ndajiokuiin tuku ni ja vi kunukuechi ni nuu taka janaꞌnu ja tu ka jiniuꞌu saꞌun, chi ja vita ka kuu? 10 Te ka jaan ii ni kiuu, vi yoo jaa andivi, vi viko naꞌnu, vi kuia. 11 Yuꞌu ndevaꞌa san ja jaꞌa ni, ja ni kaxtnoꞌo uun san, te tu nagua ni jiniuꞌu saꞌun.

12 Jikantaꞌu san, vi ñani vi kuaꞌa, ja vi saꞌa ni nagua saꞌa maa san, chi suni ni saꞌa maa san nagua ni ka osaꞌa ni ja tu ni ka ondikin ni Ley Moisés. Te tu na in jakueꞌe ni ka saꞌa ña ni jin san. 13 Chi ja ka jini maa ni ja jaꞌa in kueꞌe kuꞌu san, te ni kaxtnoꞌo san tnoꞌo vaꞌa Jesús nuu ni ndee jaxtnañuꞌu. 14 Te kueꞌe ja kuꞌu san yun kuu in ja jito tnuni ña jin ni, su tu ni ka skexiko ña ni jin san, ni tu ni ka ndajioneꞌe ña ni. Chi saa suaꞌa ni ka jantaꞌu ña ni, na kuinio in ia jinokuechi nuu Dios, axi na kuinio ja vi maa Jesukristu kuu san. 15 ¿Te vitna ndenu oo ka ja ka kusii ini ni nuu saa? Chi kuu ndakani san ja ni ka kundaꞌu ndevaꞌa ini ña ni jin san, chi nuu suaꞌa te kuu vaa vi vi tau ni nduchi nuu ni, te vi taa ni nuu san. 16 Te vitna, ¿a ka kaꞌan ni ja jini uꞌu ña san, nani ja kaꞌan san tnoꞌo ndaa nuu ni?

17 Chi tee judio yun ja ka kaxtnoꞌo de nuu ni ka ndiꞌni ndevaꞌa de ja jaꞌa ni, su masu ka ndakani vaꞌa ini de. Chi ja ka kuini de kuu ja vi saꞌa siin ña de jion, nagua ja saa, te maa ni vi kondiꞌni ni ja jaꞌa de. 18 Guaꞌa kuu ja vi kondiꞌni ni ja jaꞌa inka ñayiu, nuu ja tnoꞌo kaxtnoꞌi oo guaꞌa; su siun ni vi kosaꞌa ni, te masu nani nuu oo san neꞌu ni. 19 Te ja jaꞌa maa ni ja ka kuu ni na kuinio seꞌe maa san, guaa tnaꞌu ndevaꞌa ini san inka jichi, na kuinio in ñasiꞌi nuu jatu ña ja kaku lulu ña, vi guaa ndee na kuni san ja vi koyutnu ni nuu Jesukristu. 20 Nuu suaꞌa te kuu, su vi vitna koo san jin ndiꞌi ni, te kaꞌan vita ka san, chi tu jini san nagua kuu ja saꞌa ka san ja jaꞌa ni.

21 Te maa ni ja ka kuini ni ja vi kunukuechi ni nuu Ley Moisés, vi kaꞌan ni yaꞌa, ¿a tu ka nini ni naxa kaꞌan nuu Ley yun? 22 Chi kaꞌan ja ni ka oo uu seyii Abraham, te in kuu seꞌe ñaꞌa ni ojinokuechi nuu ñasiꞌi de, te inkai kuu seꞌe ñasiꞌi maa de ja tu na xiin nuu jinokuechi ña. 23 Te seꞌe ñaꞌa jinokuechi yun, ni kakui nagua ka kaku sava ka suchi kueli. Su seꞌe ñaꞌa ja tu na xiin nuu jinokuechi ña yun, chi ni kakui nagua ja skunkuu tnoꞌo ni kee yuꞌu ia Dios. 24 Te tnoꞌo yaꞌa kaꞌan ja skintnaꞌa uu ñasiꞌi ja xneꞌe naxa ni saꞌa ia Dios uu tratu. Te in tratu yun kuu ja vaji ndee yuku Sinaí, te suu skintnaꞌa jin Agar, te seꞌe ñaꞌa yaꞌa ka kuu suchi ka jinokuechi. 25 Chi Agar kintnaꞌa jin yuku Sinaí ja oo Arabia, te suu kintnaꞌa inuu jin ñuu Jerusalén ñuyiu yaꞌa, chi ndiꞌi ñayiu ñuu yun jin seꞌi ka jinokuechi vitna. 26 Su Jerusalén ja oo ndee andivi, kintnaꞌa jin Sara, ñaꞌa tu na xiin nuu jinokuechi, te suu ña kuu siꞌi ndiꞌo ja ka kandijao. 27 Chi yoso nuu tutu ii:

28 Te saa, vi ñani vi kuaꞌa, chi ka kuo na kuinio Isaac, seyii Sara, chi seꞌe ni kee yuꞌu ia Dios ka kuo. 29 Te suni ndee tiempu yun, chi suchi ni kaku inuu jin nagua ka kaku sava ka suchi kueli, ni sondikin ñai jin Isaac, suchi ni kaku jin nagua kuini maa Espíritu ia Dios, te suni saa ni kuu vitna. 30 Su kaꞌan nuu tutu ii: “Skunu ñaꞌa jinokuechi jian jin seꞌe ña, chi ma saꞌa jajin seꞌe ñaꞌa jinokuechi jian jin seꞌe ñaꞌa tu na xiin nuu jinokuechi ña” kaꞌan suaꞌa. 31 Te yun guaa masu seꞌe ñaꞌa jinokuechi ka kuo, vi ñani vi kuaꞌa, chi seꞌe ñaꞌa tu na xiin nuu jinokuechi ka kuo.