5
1 Chi ndiꞌi sutu ja ka kuu nijaꞌnu, ni kaji ña maa ia Dios neꞌu ñayiu, te ni jani ña ya ja na vi kokaꞌan niꞌnu de ja jaꞌa ñayiu nuu maa ia Dios, te na vi kosoko de kiti vi ndatniuu nuu ya ja jaꞌa yika kuechi ñayiu. 2 Te ja siun suni ka jini sutu ja ka oo vita de nuu ia Dios, te suni vi kuandee ini de jin ñayiu tu ka jini vi ñayiu ka skiꞌin ichi. 3 Te ja jaꞌa ja ka oo vita de, yun guaa kanuu ja vi soko de kiti nuu ia Dios ja jaꞌa yika kuechi in in maa de, vi ja jaꞌa yika kuechi ñayiu ñuu de.
4 Te ni in tee ma kuu saꞌa kaꞌnu de maa de ja kokuu de sutu kuu nijaꞌnu, chi maa ni tee kana maa ia Dios, te jiñaꞌa ya jayiñuꞌu nuu de, nagua ni ndoꞌo Aarón ndee janaꞌa. 5 Te suni saa ni kuu jin Kristu, chi masu maa ya ni saꞌa kaꞌnu ya maa ya ja kokuu ya sutu kuu nijaꞌnu, chi suaꞌa maa ia Dios ni jiñaꞌa tniuu kaꞌnu yun, chi ni kaꞌan ya nuu tnoꞌo ya:
Seꞌe maa rin kuu ron,
te maa rin ni saꞌa kaꞌnu ña jin ron vitna, ja kuu rin tata ron.
6 Te suni nagua kaꞌan tuku nuu tutu ii:
Maa ron kuu sutu ja oo nikuii nikani,
te kokuu inuu ron jin naxa oo Melquisedec.
7 Te nuu ni oo Kristu nuu ñuyiu yaꞌa, ni okana ni ondaꞌi ya jin kuaꞌa tenuu ya ja ni ojikantaꞌu ya nuu ia Dios ja na skaku niꞌnu ña ya ja ma kuu ya. Te ni onini Dios tnoꞌo ni ndakuatu ya ja jaꞌa ja ni yindei ni yititi ya. 8 Te visi Seꞌe Dios kuu ya, te jin tnundoꞌo ni tnaꞌa ya yun, ni kutuaꞌa ya ja jantnoꞌo guaꞌa ya. 9 Te ja siun ni skunkuu ya ndiꞌi tniuu ni chitniuu ña ia Dios, guaa maa ya kuu ia skaku niꞌnu ñayiu ka jantnoꞌo ña jin ya ja vi kotekui nikuii nikani. 10 Te maa ia Dios ni tau ña jin ya ja kokuu ya sutu kuu nijaꞌnu, te kokuu inuu ya jin naxa oo Melquisedec.
Vi koto mao ja ma vi xndoo tnoꞌo ni ka kandijao
11 Te oo kuakuaꞌa tnoꞌo ja kaꞌan san siki tnoꞌo yaꞌa, su vijin kuu ja kaxtnoꞌo guaguaꞌa san, chi inu uun ndevaꞌa ini ni, te tu ka tniuu ini ni tnoꞌo ka nini ni. 12 Chi ja ni kunaꞌa ka skuaꞌa ni, te ja vi ndakaxtnoꞌo maa ni nuu siun. Su saa suaꞌa ka jaꞌni ña jin maa ni ja ndakaxtnoꞌo tuku san tnoꞌo xtnañuꞌu ia Dios ja ni ka jini ni, te ni ka nduyikin ni ja kuini ja vi koꞌo ni xikui nuu tniuu ja vi kaa ni ndei. 13 Te ndiꞌi ñayiu ja ka jaxin ii ka kui na kuinio suchi yikin ja chiaꞌan ka vi jinkuiꞌnu ini tnoꞌo ndaa. 14 Su ñayiu naꞌnu ja jai ndei, chi ja ni kutuaꞌi ja kuu saꞌa siin siin ndee ja kuu javaꞌa te ndee ja kuu jakueꞌe.