1 Te nuu ni ndiꞌi ni ndakuatu Jesús, te ni kekuei ya jin tee ka skuaꞌa jin ya kuaꞌankuei ya jioo yute Cedrón, in nuu ka oo yutnu kuii, te ni kiukuei ya jin tee ka skuaꞌa jin ya. 2 Te suni ja jini Judas, tee xtuu ña jin ya yun, chi kuaꞌa jichi ni ka ndututu Jesús jin tee ka skuaꞌa jin ya yun. 3 Yun te ni jino Judas jin soldado vi policia ka jito veñuꞌu, ja ni ka tetniuu ña sutu ka kuu nijaꞌnu vi tee ka kuu fariseo, ka ndiso xeen de, te ka tnuu de linterna vi ñuꞌu iti. 4 Su ja jini Jesús ndiꞌi tnundoo vaji siki ya, te ni kakoxnoꞌo ya, te ni jikan tnoꞌo ña ya:

―¿Na in ka ndanduku ni?

5 Te ka jiñaꞌa de:

―Ka ndanduku san Jesús, tee ñuu Nazaret.

Te jiñaꞌa ya:

―Maa san kuu.

Te suni ka ndeka tnaꞌa tee yun jin Judas, tee xtuu ña jin ya. 6 Te nuu jiñaꞌa Jesús: “Maa san kuu”, te ni ka ndakaka yata de, te ni ka ndondiso de ndee nuu ñuꞌu. 7 Te ni ndakan tnoꞌo tuku ña Jesús:

―¿Na in ka ndanduku ni?

Te ka jiñaꞌa de:

―Jesús, tee ñuu Nazaret.

8 Te jiñaꞌa Jesús:

―Ja ni kaꞌan san ja maa san kuu. Te nuu ja maa san ka ndanduku ni, te vi kakuiko ña ni jin maa san, su vi siaa ni tee yaꞌa na kiꞌinkuei maa de.

9 Saa ni kuu nagua ja skunkuu tnoꞌo ni kaꞌan ya nuu Tata ya: “Tu ni skiꞌin san ni in ñayiu ja ni taa ni nuu san”.

10 Te ndiso Simón Pedro in yuchi kani, ni tava de nuu ñii ñuꞌu, te ni jaꞌnde de soꞌo lado kuaꞌa in tee nani Malco ja jinokuechi de nuu sutu kuu nijaꞌnu. 11 Yun te jiñaꞌa Jesús nuu Pedro:

―Ndatavaꞌa ni yuchi kani ni nuu ñii ñuꞌi, chi nini kuu ja tnaꞌa san tnundoꞌo ja ni jandetu Tata san ja ndoꞌo ja tnaꞌa san ―jiñaꞌa ya.

12 Yun te ni ka kakuiko ña soldado vi tee kuu capitán vi policia tee judio jin Jesús, te ni ka juꞌni ña de jin ya. 13 Te xtnañuꞌu ka veꞌe Anás ni jaꞌankuei de jin ya, chi tee yun ni okuu tata xiso Caifás, tee ni okuu nijaꞌnu ka nuu sutu kuia yun. 14 Te suu maa Caifás kuu tee ni kaꞌan nuu tee ka kuu nijaꞌnu nuu ñayiu judio ja guaꞌa ka kuu ja invaa ni tee kuu ja jaꞌa nii ñuu de.

15 Te ka ndikin ña Simón Pedro vi inka tee ka skuaꞌa jin Jesús kuaꞌankuei de. Te inka tee skuaꞌa yun, chi ka jini tnaꞌa de jin sutu kuu nijaꞌnu yun, te yun guaa ni kiukuei de jin Jesús ndee ini patio veꞌe sutu kuu nijaꞌnu ka yun. 16 Su Pedro, chi ni kendoo de ndee yeꞌe yun. Yun guaa ni kee tee skuaꞌa ja jini tnaꞌa jin sutu kuu nijaꞌnu yun, te ni kaꞌan de jin ñaꞌa jito yeꞌe yun, te ni siaꞌa ña ña jin Pedro. 17 Yun te ni jikan tnoꞌo ñaꞌa jito yeꞌe yun jin Pedro:

―¿A masu suni in tee ka skuaꞌa jin tee yaꞌa kuu ni? ―jiñaꞌa ña.

―Ñaꞌa, ma suu san kuu ―jiñaꞌa de.

18 Te ja siun saꞌa vijin, guaa tee ka jinokuechi vi policia yun ni ka xnaꞌa de ñuꞌu, te ka ndondee de yuꞌu ñuꞌu yun ka ndasaa de. Te suni nukuiin Pedro yuꞌu ñuꞌu yun jin tee ka oo yun ka ndasaa de.

19 Yun te ni jinkondee sutu kuu nijaꞌnu yun xtichi de Jesús na tee ka kuu tee ka skuaꞌa jin ya, vi nagua kuu ja kaxtnoꞌo ya. 20 Te jiñaꞌa Jesús:

―Sein chi kaꞌan ndijin san jin nuu ndiꞌi ñayiu, te siun ni kaxtnoꞌo san nuu ñayiu veꞌe ii sinagoga vi veñuꞌu kaꞌnu nuu ka ndututu ndiꞌi tnaꞌo judio, te ni in tnoꞌo tu nagua kaꞌan yuꞌu san. 21 ¿Te nau ja saa sein jikan tnoꞌo ña ni? Kakan tnoꞌo ni ñayiu ni ka onini na tnoꞌo ni kaꞌan san, te mai na vi ndakani nagua ni kaxtnoꞌo san, chi ka jini guaꞌa mai na tnoꞌo ni kaꞌan san.

22 Te nuu ni kaꞌan Jesús siun, te in policia nukuiin yatni yun, ni katu ni in tikatu nuu ya, te jiñaꞌa de:

―¿A vi ndee siun kaꞌan ni jin sutu kuu nijaꞌnu?

23 Te jiñaꞌa Jesús:

―Nuu ja ni kaꞌan san in tnoꞌo kueꞌe, te kaꞌan ni ndee ja kuu jakueꞌe, su nuu ja vatuka ni kaꞌan san, ¿te nau ja kani ña ni? ―jiñaꞌa ya.

24 Te vi saa ni nuꞌni ya, ni tetniuu ña Anás ja kuaꞌan ya nuu Caifás, tee kuu nijaꞌnu ka nuu sutu.

25 Te nukuiin ni Pedro yuꞌu ñuꞌu yun ndasaa de. Te ka jiñaꞌa nuu de:

―¿A masu in tee ka skuaꞌa jin tee yun kuu ni?

Te ña ni ndaa yuꞌu Pedro, te jiñaꞌa de:

―Ñaꞌa, ma suu san kuu ―jiñaꞌa de.

26 Yun te ni jikan tnoꞌo ña in tee jinokuechi nuu sutu kuu nijaꞌnu ka, in tee kuu tnaꞌa tee xiin soꞌo ni jaꞌnde Pedro, te jiñaꞌa de:

―¿A masu ni jini ña san jin ni ja ka ndeka tnaꞌa ni jin de neꞌu xtnuu kuii yun? ―jiñaꞌa de.

27 Te tu ni ndaa tuku yuꞌu de ja jini de ya, te vi ore saa ni kana in liꞌli.

28 Yun te ni ndekuei de jin Jesús veꞌe Caifás, te kuaꞌankuei de jin ya nuu veꞌe tniuu nuu oo tee ñuu Roma ja tatnuni. Te ja makundijin ja matuu, te ñayiu judio, chi tu ni kiukuei de ini veꞌe tniuu yun, nagua ja ma vi kutneꞌe de, chi yoso nuu Ley ja nuu ja kiukuei de veꞌe ñayiu inka tatatnoꞌo, te vi kutneꞌe de. Te saa ni ka saꞌa de, nagua ja kuu vi kaxini de viko pascua maa ñayiu judio. 29 Yun te ni kee Pilato, tee tatnuni ñuu yun, ja kaꞌan de jin ñayiu yun, te jiñaꞌa de:

―¿Na kuechi ka xtavi ni tee yaꞌa?

30 Te ka jiñaꞌa de:

―Nuu suaꞌa te masu tee saꞌa jakueꞌe kuu de, chi ma vi kisiaꞌa san de nuu ndaꞌa ni ―ka jiñaꞌa de.

31 Yun te jiñaꞌa Pilato:

―Vi ndakuaka maa ni de, te vi saꞌa ndaa maa ni kuechi de nagua oo nuu Ley ka nevaꞌa maa ni ―jiñaꞌa de.

Yun te ka jiñaꞌa tee ka kuu nijaꞌnu nuu ñayiu judio:

―Su sein ñayiu judio, chi ma kuu vi kaꞌni san ni in ñayiu.

32 Saa te ni skunkuu tnoꞌo ni kaꞌan Jesús ja kaxtnoꞌo naxa ndoꞌo ya nuu kuu ya. 33 Yun te ni ndiokuiin Pilato, ni ndiuu de ini maa veꞌe tniuu, te ni kana de Jesús, te jiñaꞌa de:

―¿A suu ron kuu rey ñayiu judio?

34 Te jiñaꞌa Jesús:

―¿A kaꞌan ni tnoꞌo yaꞌa ja jini maa ni axi inka ñayiu ni kaꞌan nuu ni ja jaꞌa san? ―jiñaꞌa ya.

35 Yun te jiñaꞌa Pilato:

―¿A ñayiu judio kuu ruꞌun ja kuni rin? Te ñayiu ñuu maa ron vi tee ka kuu nijaꞌnu nuu sutu ka kuu tee ka tnaa ña jin ron nuu rin. ¿Te nagua ni saꞌa ron nuu saa? ―jiñaꞌa de.

36 Te jiñaꞌa Jesús:

―Nuu tatnuni san, chi masu ñuyiu yaꞌa oo, chi nuu suaꞌa te ñuyiu yaꞌa oo, vaa vi kaxin tnaꞌa tee ka jinokuechi nuu san, nagua ja ma kanakau san nuu ndaꞌa tnaꞌa san judio nuu siun. Su nuu tatnuni san, chi masu yaꞌa oo ―jiñaꞌa ya.

37 Yun te ni jikan tnoꞌo ña Pilato jin ya:

―Nuu saa te ¿a rey kuu ron? ―jiñaꞌa de.

Te jiñaꞌa Jesús:

―Saa kaꞌan maa ni ja rey kuu san. Te yun guaa ni kaku san, te vaji san nuu ñuyiu yaꞌa nagua ja ndakani san tnoꞌo ndaa. Te ndiꞌi ñayiu ka oo jin tnoꞌo ndaa ka nini tnoꞌo kaꞌan san ―jiñaꞌa ya.

38 Te jiñaꞌa Pilato:

―¿Te nagua kuu tnoꞌo ndaa yun?

Te nuu ni ndiꞌi ni jikan tnoꞌo ña Pilato jin Jesús, te ni ndee tuku de nuu ka oo ñayiu judio, te jiñaꞌa de:

―Tu saꞌun na kuechi nukuꞌun san siki tee yaꞌa. 39 Su maa ni, chi ka nevaꞌa ni in costumbre ja siaa uun san in tee yiꞌi vekaa nuu viko pascua ni, ¿te a ka kuini ni ja siaa uun san rey ñayiu judio? ―jiñaꞌa de.

40 Yun te ndiꞌi ni ka kana jaa tuku, te ka jiñaꞌi:

―Ñaꞌa, ma siaa ni tee jian, chi siaa ni Barrabás ―ka jiñaꞌi. Te Barrabás, chi in tee kuiꞌna kuu de.