1 Nuu kuee ka te ni jika nuu Jesús ñuu naꞌnu vi ñuu kueli ja ni kaxtnoꞌo ya tnoꞌo vaꞌa nuu ñayiu naxa tatnuni ia Dios. Ni ka jika nuu ya jin ndi uxi uu tee ni chitniuu ya, 2 vi suni ni ka ondikin ña sava ñaꞌa ni ndasaꞌa ya ja ni tau ya espíritu tachi vi ñaꞌa ni ndasaꞌa ya nuu sava ka kueꞌe. Te neꞌu ñaꞌa yun kuaꞌan María Magdalena, ñaꞌa ni tau ya uja espíritu tachi, 3 vi Juana, ñasiꞌi Chusa, tee ni onetniuu nuu Herodes, vi inka ñaꞌa nani Susana vi sava ka ñaꞌa ni ka ochituu ña jin ya jin ja ka nevaꞌa ña.

4 Te kuakuaꞌa ñayiu ni kekuei taka ñuu ja vi konini tnoꞌo ni kaxtnoꞌo Jesús, te ni skintnaꞌa ya tnoꞌo ia Dios jin in tee jitu nuu ñundeꞌi. Yun te jiñaꞌa ya:

5 ―In kiuu ni kee in tee kuaꞌan ja siagua de ndikin tata. Su nuu ni siagua de, te sava ni jino yuꞌu ichi, te ni ka kachi jaꞌa ñayiu, te ni ka ndachii tisala. 6 Te sava ni jino neꞌu yuu, te ni jite. Su ndee saa ni kiuu, te ni yichi, chi tu na koꞌyo ni niꞌi. 7 Te sava ni jino neꞌu tnu iñu, guaa nuu ni jite, te tu ni kundee kuaꞌnu, chi ni saꞌa yoo ña tnu iñu yun. 8 Su sava ka ja ni jino nuu ñuꞌu guaꞌa, chi ni jaꞌnu vi ni kuvaꞌa, te vi uꞌun xiko ni kee nuu in in ndikin tata yaꞌa ―jiñaꞌa Jesús suaꞌa.

Te nuu ni ndiꞌi ni kaꞌan ya, te ni kana jaa ya:

―Na in oo soꞌo ja konini, te na konini ―jiñaꞌa ya.

9 Yun te ni ka jikan tnoꞌo ña tee ka skuaꞌa jin ya naxa kei tnoꞌo ni kaꞌan ya. 10 Te jiñaꞌa ya:

―Nuu maa ni, chi xneꞌe ia Dios tnoꞌo yiyuꞌu naxa tatnuni ya. Su nuu sava ka ñayiu, chi kaꞌan san jin tnoꞌo jioniꞌni, nagua ja visi ka ndiaꞌi, su ma vi kuni; te visi ka nini, su ma vi jinkuiꞌnu ini ―jiñaꞌa ya.

11 ’Te suaꞌa kei kaꞌan tnoꞌo jioniꞌni yun: Ndikin tata yun kuu tnoꞌo ia Dios. 12 Te ndikin tata ni junkuei yuꞌu ichi yun ka kuu ñayiu ka nini tnoꞌo ya. Su kiuu tachi, te xtajioo tnoꞌo ni kee ini anu ñayiu, nagua ja ma vi kandijai ja vi kaku niꞌnui nuu tnundoꞌo. 13 Te ndikin tata ja ni junkuei neꞌu yuu ka kuu ñayiu ka nini tnoꞌo ia Dios, te ka kusii ini ja ni ka jini tnoꞌo ya, su tu kuu kutu tnoꞌo ya ini anui. Te ka kandijai ndee saa ni tiempu, su kiuu ka tnaꞌi tnundoꞌo, te ka kujioi nuu tnoꞌo ya. 14 Te ndikin tata ja ni junkuei neꞌu tnu iñu ka kuu ñayiu ka nini tnoꞌo ia Dios, su ndee saa ni kiuu, te ka kujioi, chi ka kutneñui jin ja ka ndakani ini, vi ja vi kuu kuikai, vi ja vi kusii ini nuu ñuyiu yaꞌa, te tu ka xtutenui tnoꞌo ya nuu sava ka ñayiu. 15 Te ndikin tata ja ni junkuei nuu ñuꞌu guaꞌa ka kuu ñayiu ka kandija tnoꞌo ia Dios jin ndee ini ndee anui, te ka oo ini ja vi konini, te vi koyutnui nuu tnoꞌo ya ja vi xtutenui nuu sava ka ñayiu ―jiñaꞌa Jesús.

16 Te jiñaꞌa Jesús:

―Tu na in ñayiu ka jinio ja xtnui in lámpara, te chisaꞌui jin in kisi, axi chinee chii jito, chi suaꞌa sonee sukuin nagua ja kondijin kiukuei ñayiu ini veꞌi. 17 Te suni tu nagua kuu ja koyuꞌu ja ma ndajinotuu, axi in ja yiyuꞌu ja ma vi kuni ñayiu, chi ndiꞌi ndatuu ndijin. 18 Te yun guaa vi konini guaꞌa ni, chi ndiꞌi ñayiu ka nevaꞌa, te kuñaꞌa ka ia Dios. Su ndiꞌi ñayiu tu nagua ka nevaꞌa, chi vi ndee joo luluu ja ka ndakani ini ja ka nevaꞌi, ndakindee ya ―jiñaꞌa Jesús.

19 Yun te ni jinokuei nana Jesús vi ñani ya, su tu ni kuu ja vi jintnaꞌa ña ndee nuu oo ya, chi ka oo kuaꞌa ndevaꞌa ñayiu. 20 Te ni ka kaxtnoꞌo nuu ya, te ka jiñaꞌa:

―Nana ni vi sava ka ñani ni, chi yeꞌe yun ka oo ña, te ka kuini ña ja vi kaꞌan ña jin ni ―ka jiñaꞌi.

21 Te jiñaꞌa Jesús:

―Ñayiu ka nini tnoꞌo ia Dios, te ka skunkui, ka kuu nana san vi ñani san ―jiñaꞌa ya.

22 Ni oo in kiuu ni kekuei Jesús jin tee ka skuaꞌa jin ya nuu in barco, te jiñaꞌa ya:

―Kiꞌon na vi yaꞌo inka jioo ndute mar ―jiñaꞌa ya.

Yun te kuaꞌankuei de jin ya. 23 Su nini ka skaka de barco yun, te ni kixin ya. Te vi ore saa ni jinkiꞌin sanaa in tachi niꞌi, te ni kuu tikacha nuu ndute, te ni kejaꞌa de makee de nuu barco yun, te nuu ja na chitu de, te kee kiꞌin. 24 Yun te ni jinokuei de ja ni ka xndoto de Jesús, te ka jiñaꞌa de:

―Mastru, Mastru, ndoto ni, chi makekueio nuu ndute yaꞌa ―ka jiñaꞌa de.

Yun te ni ndakoo Jesús, te ni tatnuni ya nuu ndute mar vi nuu tachi yiꞌi yun, te ni ka jinkuiin. 25 Yun te jiñaꞌa ya nuu tee ka skuaꞌa jin ya:

―¿Nau ja tu ka kandija ni? ―jiñaꞌa ya.

Su ni ka yuꞌu ndevaꞌa de vi ni ka saꞌu kuii ini de ka ndiaꞌa de ja siun ni saꞌa Jesús, te ni ka jinkondee de ka ndatnoꞌo de:

―¿Na in kuu tee yaꞌa ja vi ndee nuu tikacha vi nuu ndute mar tatnuni de, te ka jantnoꞌo tnoꞌo kaꞌan de? ―ka ndatnoꞌo de suaꞌa.

26 Yun te ni jinokuei ya yuku ja tnii Gadara, ñuu ja kaa inka jioo ndute mar Galilea. 27 Te vi inka ni nuu Jesús nuu barco yun, te ni kenta in tee ndukueꞌe oo yuku yun, chi ñuꞌu ña tachi jin de. Te ja ni kuu naꞌa ndevaꞌa ndoꞌo de siun, te vini saꞌun ka de tu nagua niꞌnu de. Te ni masu ka oo de veꞌe de, chi neꞌu nuu ka yiyuꞌu ndiyi oo de. 28 Te nuu ni jini tee yaꞌa Jesús, te ni kana jaa de, te ni jinkuiin jiti de nuu ya, te ni kana jaa tachi yun ndee anu de:

―¿Nagua kuini ron, vi Jesús, Seꞌe ia Dios oo ndee sukun, ja vaji ron nuu oo rin? Jikantaꞌu rin ja ma saꞌa ndevaꞌa ña ron ―jiñaꞌa.

29 Saa ni kaꞌan, chi ja ni tatnuni Jesús nuu tachi xeen yun ja na kana nuu anu tee yun. Chi ja ni kuu naꞌa ndevaꞌa ñuꞌu ña tachi yun jin de. Te visi ka juꞌni ña ñayiu jin cadena, nagua ja ma kiꞌin ka de, su ni ojaꞌnde tachi yun cadena, te ni oskunu ña taka nuu tu na veꞌe oo. 30 Yun te ni jikan tnoꞌo ña Jesús:

―¿Naxa nani ron?

Te jiñaꞌa:

―Legión ka nani rin, chi kuaꞌa rin ka ñuꞌu nuu anu tee yaꞌa ―jiñaꞌa.

31 Te ni ka jikantaꞌu tachi yun nuu Jesús ja ma tnaa ña ya ndee kunu ka nuu ñuu jiꞌi. 32 Te yatni yun ka jiondita kuaꞌa kini ka jaa ti nuu yuku yun. Te ni ka jikantaꞌu ja na kuandetu Jesús ja kekuei ini kini yun ja vi koo, te ni jandetu ya. 33 Te ni kanakuei anu tee yun, te ni kekuei ini kini yun. Te ni ka jiko ini ti, te ni ka jino ti, ni kekuei ti in nuu oo ndeyi, te ni ka tnaa ti maa ti nuu ndute mar, te ni ka jiꞌi ti.

34 Te nuu ni ka jini tee ka jito kini yun ja siun ni kuu, te ni ka jino de kuanoꞌokuei de ja ni ka kaxtnoꞌo de nuu ñayiu ñuu de vi nuu ñayiu ka oo taka nuu yuku ja siun ni saꞌa Jesús. 35 Yun te ni kekuei ñayiu ja mavijinkotoi. Te nuu ni jinokuei nuu oo Jesús, te ni ka jini ja yun oo tee ni ondukueꞌe yun, niꞌnu de saꞌun de, nukoo de nuu oo Jesús, te vija ni nukuꞌun ndaa ini de, guaa ni ka yuꞌu ndevaꞌa ñayiu yun. 36 Su ni ka ndakani tee ka jito kini yun naxa ni kuu ja ni kanakuei tachi yun, te ni nduvaꞌa tee ni ondukueꞌe yun. 37 Te vija siun ni kuu, te ndiꞌi ñayiu ñuu ja tnii Gadara ni ka jikantaꞌui nuu Jesús ja na kujioo ya, chi ka yuꞌu ndevaꞌi. Yun te ni ndekuei Jesús nuu barco yun, te kuanoꞌokuei ya Galilea. 38 Te tee ni kanakuei ña tachi xeen, chi ni jikantaꞌu de nuu Jesús ja na kondeka ña ya kiꞌinkuei de. Su tu ni kuini Jesús, chi ni tatnuni ya ja na ndoo de, te jiñaꞌa ya:

39 ―Kuanoꞌo ni veꞌe ni, te ndakani ni ndiꞌi javii javaꞌa ni saꞌa ia Dios jin ni, te ni nduvaꞌa ni ―jiñaꞌa ya.

Yun te kuanoꞌo de ja ni ndakani de nuu ndiꞌi ñayiu ñuu yun naxa ni saꞌa ña Jesús ja ni nduvaꞌa de.

40 Nuu ni ndajino Jesús inka jioo ndute mar Galilea, te ni ka kusii ndevaꞌa ini ñayiu, chi ka oo kuaꞌi ka ndetui ja ndajino ya. 41 Yun te ni jino in tee nani Jairo, tee kuu nijaꞌnu nuu veꞌe ii sinagoga. Te ni jinkuiin jiti de nuu Jesús, te ni jikantaꞌu de ja na kiꞌinkuei de jin ya veꞌe de. 42 Chi oo invaa seꞌe siꞌi de ja oi ndee uxi uu kuia, te vija oi ja kui, jiñaꞌa de.

Yun te ni kee Jesús kuaꞌan ya, te ni ka jata ndikin ña kuaꞌa ndevaꞌa ñayiu, guaa vi suaꞌa ka jexin niꞌnu ñai ichi kuaꞌan ya. 43 Te neꞌu ñayiu kuaꞌa yun kuaꞌan in ñaꞌa ja ni kuu uxi uu kuia kuꞌu ña kueꞌe taꞌu ña niñi. Te ja ni ndiꞌi ja nevaꞌa ña xiko ña ja tniuyaꞌu ña tee tatna, te vi ni in de tu kundee ja nduvaꞌa ña. 44 Yun te ni jintnaꞌa ña ichi yata Jesús, te ni keꞌe ña yuꞌu saꞌun niꞌnu ya, te vi nuu saa ni jinkuiin ja taꞌu ña niñi jin ña. 45 Yun te ni jikan tnoꞌo Jesús:

―¿Ndee ni kuu ja ni keꞌe ña? ―jiñaꞌa ya.

Te ndiꞌi ñayiu ka jiñaꞌa ja tu ka jini. Yun te jiñaꞌa Pedro:

―Mastru, ndiꞌi ñayiu yaꞌa ka jexin niꞌnu ña jion vi katu ndaꞌa ña, te ¿nau ja jikan tnoꞌo ni ja ndei ni keꞌe ña? ―jiñaꞌa de.

46 Su jiñaꞌa Jesús:

―Oo ndee in ñayiu ni keꞌe ña jin san, chi ni jini san ja ni nduvaꞌa in ñayiu jin jakaꞌnu ndiso san ―jiñaꞌa ya suaꞌa.

47 Te nuu ni jini ñaꞌa yun ja ma kuu kuyuꞌu ña, te vi suaꞌa kisi ña ja yuꞌu ña, te ni jinkuiin jiti ña nuu Jesús, te ni kaxtnoꞌo ña jin nuu ndiꞌi ñayiu nau ja ni keꞌe ña saꞌun ya, te vi nuu saa ni nduvaꞌa ña. 48 Yun te jiñaꞌa Jesús:

―Sesiꞌi, ni nduvaꞌa ni, chi ni kandija ña ni jin san. Te kuanoꞌo sii ini ni ―jiñaꞌa ya.

49 Vi yun kaꞌan ka Jesús nuu ni jino in tee ni kaxtnoꞌo nuu Jairo, tee kuu nijaꞌnu nuu veꞌe ii sinagoga, te jiñaꞌa de:

―Ja ni jiꞌi sesiꞌi ni, te makii kaxtnoꞌo san ja ma koxnaꞌa ka ni mastru yun ja kiꞌin de veꞌe ni ―jiñaꞌa de.

50 Su nuu ni onini Jesús tnoꞌo yun, te jiñaꞌa ya:

―Ma koyuꞌu ni. Suaꞌa ni kandija ni, te nduvaꞌa sesiꞌi ni ―jiñaꞌa ya.

51 Te nuu ni jino ya veꞌe Jairo, te tu ni jandetu ya ja kiukuei ñayiu jin ya, chi maa ni tee ni kiukuei ka kuu Pedro vi Jacobo vi Juan vi tata vi nana suchi siꞌi yun. 52 Te ndiꞌi ñayiu veꞌe yun ka jaku vi ka ndaꞌi ka kanai ja jaꞌa suchi siꞌi yun, su jiñaꞌa Jesús:

―Ma vi kuaku ni, chi kixin, masu ni jiꞌi ―jiñaꞌa ya.

53 Te ni ka jaku ndee ña ñayiu ja siun ni kaꞌan ya, chi ja ka jini ja ni jiꞌi suchi siꞌi yun. 54 Yun te ni tnii Jesús ndaꞌi, te ni kaꞌan jaa ya:

―Xiku, ndakoo ―jiñaꞌa ya.

55 Yun te ni ndatekui, te vini ni ndakoi. Te ni tatnuni Jesús ja na vi kuñaꞌa ja kai. 56 Te vi ka saꞌu kuii kuiti ini tatai vi nanai, su ni tatnuni Jesús ja ma vi kaꞌan de nuu ni in ñayiu ja siun ni kuu.