1 Te nuu ni yaꞌa ja ni kaꞌan Jesús tnoꞌo yaꞌa, te ni kaji tuku ya uni xiko uxi ka de, te ni tetniuu ya ndi uu ndi uu de ka yoxnoꞌo de kuaꞌankuei de taka ñuu vi taka ichi nuu yaꞌa ya ja kiꞌin ya. 2 Te jiñaꞌa ya:

―Ja ndaa ndija ja oo kuaꞌa ndevaꞌa tniuu ja ndututu, te joo ni ñayiu vi satniuu ka oo. Yun guaa vi kakan ni nuu Jitoꞌo Dios, maa ia xiin nuu tniuu yaꞌa, nagua ja na tetniuu ka ya ñayiu vi satniuu. 3 Te tetniuu ña san ja kiꞌinkuei ni na kuinio lelu ja kiukuei neꞌu vaꞌu. 4 Te ma vi kindaꞌa ni ñunu xtaa, te ni itni xuꞌun, te ni ndijan, te ni ma vi jinkuiin ni ja vi ndakantnoꞌo ni, ni in ñayiu nuu ichi kuaꞌankuei ni. 5 Te nani kuu veꞌe nuu jinokuei ni, te xtnañuꞌu ka vi kuñaꞌa ni: “Na koo jamani ia Dios nuu veꞌe yaꞌa”, vi kuñaꞌa ni. 6 Te nuu ja ñayiu mani ini oo veꞌe yun, te koi jin jamani ia Dios. Axi nuu ja ñaꞌa, te ndajiokuiin jamani ya, ja vi koo jin maa ni. 7 Te ma vi kokaka ni veꞌe veꞌe, chi vi koo ni maa veꞌe nuu jinokuei ni yun. Te yun vi kaa vi koꞌo ni nagua vi taa ñayiu yun, chi in tee satniuu kanuu ja niꞌi yaꞌu de. 8 Te nani kuu ñuu nuu jinokuei ni, te ka jantaꞌu ña ñayiu ja vi koo ni, te vi kaa ni nani kuu ja ka taa ñayiu yun. 9 Te vi ndasaꞌa ni ñayiu ka kuꞌu ja ka oo ñuu yun, te vi kuñaꞌa ni: “Ja ka ndiaꞌa ni yaꞌa ka jini ni ja oo ia Dios tatnuni ya neꞌu ni”, vi kuñaꞌa ni. 10 Su nani kuu ñuu nuu jinokuei ni, ja tu ka jantaꞌu ña ñayiu, te ndekuei ni ñuu yun, te vi kuñaꞌa ni: 11 “Vi ndee ñuyaka ñuꞌu ñuu ni ja ni ka jiso jaꞌa san na vi skuei san ja kokuu in seña ja kokaꞌan kuechi siki ni. Su vi konaꞌa ni ja ja ka ndiaꞌa ni ja oo ia Dios ja tatnuni ya”, vi kuñaꞌa ni. 12 Te kaꞌan san ja kiuu tetniuu ia Dios tnundoꞌo, chi kuakuaꞌa ka tnundoꞌo vi tnaꞌa ñayiu ñuu yun, masu ñayiu ñuu Sodoma ―jiñaꞌa Jesús.

13 Yun te jiñaꞌa Jesús:

―¡Ndaꞌu ni ka ron ñayiu ñuu Corazín vi ndaꞌu ni ka ron ñayiu ñuu Betsaida! Chi vaa nuu suaꞌa, te nuu ñayiu ñuu Tiro axi Sidón ni kuvaꞌa in tniuu kaꞌnu ja ni saꞌa rin nuu ndiꞌi maa ron, vaa vi ndee nona kiuu ja ni ka kekuiꞌnui saꞌun ndayi vi ni ka jinkoi nuu yaa ñuꞌu ja ka ndatnaꞌu ini nuu yika kuechi. 14 Su kiuu ja tetniuu ia Dios tnundoꞌo, chi kuakuaꞌa ka tnundoꞌo vi tnaꞌa ron saa ñayiu ñuu Tiro vi Sidón. 15 Te roon ñayiu ñuu Capernaúm, ¿a ka kaꞌan ron ja suu ron ka kuu ja ndakuei ndee andivi? Su ñaꞌa, chi suu ron ka kuu ja vi kanakau ndee ñuu jiꞌi ―jiñaꞌa ya.

16 Yun te jiñaꞌa ya nuu tee ni tetniuu ya:

―Na ñayiu ka nini tnoꞌo ka kaꞌan ni, te suni ka nini tnoꞌo kaꞌan san. Te na ñayiu ka skexiko ña jin ni, te suni ka skexiko ñai jin san. Te na ñayiu ka skexiko ña jin san, te suni ka skexikoi ia ni tetniuu ña jin san ―jiñaꞌa ya.

17 Te sii ini ndevaꞌa ni ka ndajiokuiin ndi uni xiko uxi tee ni tetniuu Jesús, te ka jiñaꞌa de:

―Jitoꞌo san, vi guaa ndee tachi xeen ni ka jantnoꞌo ña nuu ni ka ndakakuneꞌe san sivi ni ―ka jiñaꞌa de.

18 Te jiñaꞌa Jesús:

―Ni jini san ja ni kanakau Tachi ichi andivi na kuinio in tajan, 19 chi maa san ni taa jakaꞌnu ja vi kuain niꞌnu ni siki koo vi siki ndiloꞌlo. Te vi kundee ni siki ndiꞌi ja ka kaꞌan uꞌu ña jin ni, te tu nagua vi ndoꞌo ni. 20 Su ma vi kusii ini ni ja ni ka jantnoꞌo ña tachi xeen jin ni, chi vi kusii ini ni ja ni ka jinkoso sivi ni andivi ―jiñaꞌa ya.

21 Te vi maa nuu saa, ni kusii ndevaꞌa ini Jesús ni saꞌa Espíritu maa ia Dios, te jiñaꞌa ya:

―Ndakuantaꞌu san nuu ni, vi Tata Dios, ja kuu ni Jitoꞌo andivi vi ñuyiu, chi ni tayuꞌu ni taka yaꞌa nuu ñayiu ndichi vi ñayiu jinkuiꞌnu guaꞌa ini, te ni ndaxneꞌe ni nuu ñayiu ka kuu na kuinio suchi kueli. Saa, vi Tata, chi saa junkuaan ini maa ni ―jiñaꞌa ya.

22 Te ni kaꞌan ka ya nuu ñayiu:

―Ndiꞌi yaꞌa ni niꞌi san nuu Tata Yua san. Te ni in ñayiu tu na in jini na in kuu Seꞌe ia Dios, chi maintnoꞌo maa Yua, guaa jini ya. Te ni in ñayiu, tu na in jini na in kuu Yua, chi maintnoꞌo maa Seꞌe ya, guaa jini, te nani kuu nuu ñayiu kaꞌan maa Seꞌe ia Dios ja vi kuni, te xneꞌe ya na in kuu Tata Dios ―jiñaꞌa Jesús.

23 Yun te ni jionenuu ya nuu tee ka skuaꞌa jin ya, te ni kaꞌan ya nuu maa ni maa de:

―Na taꞌu na ndetu ñayiu ka ndiaꞌa ndiꞌi ja ka ndiaꞌa ni vitna. 24 Chi kaꞌan san ja kuakuaꞌa tee ni ka ndakani tnoꞌo ia Dios ndee janaꞌa vi tee ka kuu rey ni ka ndioo ini de ja vi kuni de ja ka ndiaꞌa ni vitna, su tu ni ka jini de. Vi ni ka ndioo ini de ja vi konini de tnoꞌo ka nini ni vitna, su tu ni kuu vi konini de ―jiñaꞌa ya.

25 Yun te ni jaꞌan in tee kaxtnoꞌo Ley Moisés, ja ni ka ndatnoꞌo de jin Jesús, te ni kuini de ja kiꞌin vijin ña de, te ni jikan tnoꞌo ña de:

―Mastru, ¿nagua kuu ja saꞌa san ja niꞌi taꞌu san ja koteku san nikuii nikani? ―jiñaꞌa de.

26 Te jiñaꞌa Jesús:

―¿Naxa yoso nuu Ley? ¿Naxa kaꞌan nuu kaꞌu ni? ―jiñaꞌa ya.

27 Te jiñaꞌa tee yun:

―Kachi: “Kutoo ron ia Jitoꞌo Dios jin ndiꞌi ndee ini ndee anu ron, vi jin ndiꞌi jandakui ron, vi jin ndiꞌi jajintnuni ron, te kaꞌan too ron in ñani in tnaꞌa ron nagua kaꞌan too ron maa ron”, kaꞌan suaꞌa ―jiñaꞌa de.

28 Te jiñaꞌa Jesús:

―Vatuka kaꞌan ni. Saa saꞌa ni, te niꞌi taꞌu ni ja koteku ni ―jiñaꞌa ya.

29 Te vi ja kuini de ja kendoo vaꞌa de nuu ya, te ni jikan tnoꞌo tuku ña de:

―Te ¿na in kuu in ñani in tnaꞌa san? ―jiñaꞌa de.

30 Te jiñaꞌa Jesús:

―In kiuu ni kee in tee ñuu Jerusalén ja kuaꞌan de ñuu Jericó, te nuu ichi kuaꞌan de yun, ni ka jinkuꞌun ña kuiꞌna, te ni ka kindee ndiꞌi ja nee de vi ndee saꞌun niꞌnu de ni ka kindee. Te ni ka kani ña vi ndee ni ka xtuji ña, te vi saa ndee ni ka ja vi kaꞌni ña, te kuaꞌankuei. 31 Yun te ni kenta in tee kuu sutu, ja kuaꞌan de ichi yun, su nuu ni jini ña de, te ni jiko de, te ni yaꞌa jioo ni de kuaꞌan de. 32 Te suni ichi yun ni kenta in tee jinokuechi nuu veñuꞌu, te suni nuu ni jini ña de, te ni jiko de, te ni yaꞌa jioo ni de kuaꞌan de. 33 Su yun te ni kenta in tee ñuu Samaria ja suni ichi yun kuaꞌan de. Te nuu ni jini ña de, te ni kundaꞌu ini ña de. 34 Te ni jintnaꞌa ña de, te ni saꞌa tatna ña de. Ni chiꞌi de texeꞌen vi vinu nuu ni tuji tee yun. Te ni tniutuu de in saꞌun vita, te ni sonee de tee yun siki kiti ndeka de, te kuaꞌankuei de. Te nuu ni jinokuei de in veꞌe, te yun ni jito ña de. 35 Te kiuu tnee suaꞌa nuu ni kuu yatni ja kiꞌin de, te ni jiñaꞌa de uu xuꞌun kaa ja kuu denario ndaꞌa tee xiin veꞌe yun, te jiñaꞌa de: “Tanundaꞌa ni koto ni tee yaꞌa, te nuu ja kaꞌni ka ña xuꞌun ja jaꞌa de, te ndatniuyaꞌu san kiuu ja ndajiokuiin san”, jiñaꞌa de. 36 Te naxa kaꞌan tnaa ni, ¿ndee ndi uni tee yun guaa kuu de ñani tnaꞌa tee ni ka suꞌu ña kuiꞌna yun? ―jiñaꞌa ya.

37 Te jiñaꞌa tee yun:

―Tee ni kundaꞌu ini ña jin tee ni tuji yun.

Yun te jiñaꞌa Jesús:

―Vatuka kaꞌan ni. Kuaꞌan ni, te saꞌa ni nagua ni saꞌa tee yun ―jiñaꞌa ya.

38 Yun te ni kee tuku Jesús kuaꞌan ya ja ni jino ya in ñuu luluu. Te yun ni kaꞌan ña in ñaꞌa nani Marta ja ni jino ya veꞌe ña. 39 Te oo in kuꞌu Marta yaꞌa, nani María. Te ni jinoi ni jinkoi nuu oo Jesús, nini tnoꞌo kaxtnoꞌo ya. 40 Su Marta, chi vi kutneñu ndevaꞌi jin tniuu saꞌi. Te ni jintnaꞌi nuu oo Jesús, te jiñaꞌi:

―Jitoꞌo san, ¿a vi tu ndiꞌni kuiti ni ja maintnoꞌo ni san ni xndoo ña kuꞌu san jin ndiꞌi tniuu yaꞌa? Kaꞌan ni nui ja na chituu ñai ―jiñaꞌi.

41 Yun te jiñaꞌa Jesús:

―Marta, ndiꞌni ndevaꞌa ni vi kutneñu ni jin kuaꞌa tniuu saꞌa ni. 42 Su oo invaa ni tniuu ja kanuu ka, te tniuu kanuu ka yun ni kaji María, te ni in tu na in kuu ja kindee ―jiñaꞌa ya suaꞌa.