1 Yun te jiñaꞌa Jesús nuu tee ka skuaꞌa jin ya:

―Ñuyiu yaꞌa chi vi siun ni koo ja skaꞌan ñayiu ja saꞌi jakueꞌe, su ndaꞌu ni ka ñayiu saꞌa ja kanakau inka ñayiu nuu yika kuechi. 2 Vi guaꞌa ka kuu ja na vi kuꞌni in yoso molinu sukun ñayiu yun, te na vi tnaa ña nuu ndute mar, masu ja saꞌi ja kanakau in ñayiu vi inka ni kiunduu jaa ichi ia Dios nuu yika kuechi. 3 Su vi koto guaꞌa ni maa ni, te nuu ja na in ñayiu saꞌa jakueꞌe siki ni, te kuxeen ni nui. Te nuu ja ndatnaꞌu ini, te konekaꞌnu ini ni jin. 4 Te visi uja jichi na saꞌi jakueꞌe siki ni ja in kiuu, te konekaꞌnu ini ni nuu ja vi ndi uja jichi ndajiokuiin nuu ni, te kachi ja ndatnaꞌu ini, te ma saꞌa ka ñai jakueꞌe ―jiñaꞌa Jesús.

5 Yun te ka jiñaꞌa tee ka skuaꞌa jin Jesús:

―Jitoꞌo san, chituu ña ni na vi kandija guaꞌa ka san ―ka jiñaꞌa de.

6 Yun te jiñaꞌa ya:

―Nuu ja ka kandija ni visi ja joo luluu na kuaꞌa in ndikin yuku, te kuu vi kuñaꞌa ni nuu yutnu kaꞌnu nukuiin yaꞌa: “Kana ndee yoꞌo ron, te kuaꞌan nukuiin ron ndee nuu ndute mar yun”, vi kuñaꞌa ni, te vi kuantnoꞌo tnu tnoꞌo vi kaꞌan ni ―jiñaꞌa ya.

7 ’Nuu ja ndee in ni nevaꞌa in tee jinokuechi nuu ni ja vi inka ni ndajaa kunu de ja ni jaꞌan de yuku ni satniuu de axi ni ojito de kiti ni, te ¿a kuñaꞌa ni: “Yaꞌa, te jinkoo ron kaa ron xtaa”? 8 Ñaꞌa, chi saa suaꞌa kuñaꞌa ni nuu tee jinokuechi yun: “Ndasama saꞌun ron, te savaꞌa ndei ja kaxini rin, te ndee na ndiꞌi kaa rin vi koꞌo rin, te saa jinkoo ron ja kaa koꞌo ron”, kuñaꞌa ni. 9 Te ni tu ndakuantaꞌu ni nuu tee jinokuechi yun ja ni saꞌa de nagua ni tatnuni ni. 10 Te suni saa ni maa ni, nuu ka skunkuu ni nagua ni tatnuni ia Dios, te vi kuñaꞌa ni: “Tata Dios, masu ñayiu ka jinokuechi guaꞌa ka kuu san, chi tu na in tniuu guaꞌa ka saꞌa san, chi maa ni tniuu ja ni tenuu ña ni jin san”, vi kuñaꞌa ni ―jiñaꞌa Jesús.

11 Nuu kuaꞌan Jesús ichi ñuu Jerusalén, te ni yaꞌa ya nuu netnaꞌa ñuu Samaria jin Galilea. 12 Te nuu ni jino ya in ñuu luluu, te ni kentakuei uxi tee ka kuꞌu kueꞌe ndiꞌyi teꞌi, te ni ka jinkuiin jika de, 13 te ni ka kana jaa de:

―Mastru Jesús, kundaꞌu ini ña ni ―ka jiñaꞌa de.

14 Te nuu ni jini ña Jesús, te jiñaꞌa ya:

―Kuaꞌankuei ni nuu sutu, te vi xneꞌe ni maa ni ja ni ka nduvaꞌa ni ―jiñaꞌa ya.

Te vi nini kuaꞌankuei de nuu ichi, te yun ni ka nduvaꞌa de. 15 Yun te nuu ni jini in de ja ni nduvaꞌa de, te ni ndajiokuiin de nuu ichi yun ndakakuneꞌe jaa de ia Dios ja ni nduvaꞌa de. 16 Ni jino de, te ni jinkuiin jiti de nuu Jesús, te ni kuneꞌe xini de ndee nuu ñuꞌu ja ndakuantaꞌu de nuu ya. Te tee yun, chi in tee ñuu Samaria kuu de. 17 Yun te jiñaꞌa Jesús:

―¿A masu uxi tee yaꞌa ka kuu ja ni ka nduvaꞌa? ¿Te ndenu ka oo iin ka de 18 ja tu ni ka ndajiokuiin de ja vi ndakuantaꞌu de nuu ia Dios? Chi vi invaa ni tee inka ñuu yaꞌa ni ndajiokuiin ja ndakuantaꞌu de nuu ia Dios ―jiñaꞌa ya.

19 Yun te jiñaꞌa ya nuu tee yun:

―Ndakoo ni te kuanoꞌo ni, chi ni kandija ni ja ndasaꞌa ña ia Dios, guaa ni nduvaꞌa ni ―jiñaꞌa ya.

20 Te ni ka jikan tnoꞌo ña tee ka kuu fariseo jin Jesús:

―¿Na kiuu kii ia Dios ñuyiu yaꞌa ja tatnuni ya? ―ka jiñaꞌa de.

Te jiñaꞌa Jesús:

―Ma xneꞌe ia Dios ni in seña ama ka ja kii ya ja tatnuni ya. 21 Te ma vi kachi ja yaꞌa oo ya axi yun oo ya, chi ja oo ya neꞌu nuu ka oo maa ni yaꞌa ja tatnuni ya ―jiñaꞌa ya.

22 Yun te jiñaꞌa ya nuu tee ka skuaꞌa jin ya:

―Koo in kiuu vi kuini ni ja vi kuni ni jin sein, ja kuu san Seꞌe Teyii, ja tatnuni san. Su ma vi kuni ka ña ni jin san. 23 Te vi koo ñayiu vi kachi ja yaꞌa oo san axi yun oo san, su ma vi kandija ni tnoꞌo ka kaꞌin, ni ma vi kata ndikin ni. 24 Chi kiuu na ndajiokuiin sein, ja kuu san Seꞌe Teyii, chi yeꞌe niꞌnu nii ichi andivi na kuinio ja yeꞌe in lado, te kejioo ndee inka lado ja kuun tajan. 25 Su nini kuu ja xtnañuꞌu ka kuni san kuaꞌa ndevaꞌa tnundoꞌo, te vi skexiko ña ñayiu ka oo tiempu vitna. 26 Chi nagua ni kuu tiempu Noé, saa kokuu kiuu ja ndajiokuiin sein, ja kuu san Seꞌe Teyii. 27 Chi ninoꞌo ni ja ni ka ojaa ni ka ojiꞌi ñayiu vi ni ka osaꞌi viko tnandaꞌa ndee ni kenta kiuu ja ni kiuu Noé nuu arca, te ni chitu ndute ninii ñuyiu ja ni ka naa ndiꞌi. 28 Te suni saa ni kuu tuku tiempu na ni oo Lot. Suni ni ka ojaa ni ka ojiꞌi ñayiu, vi ni ka ojain vi ni ka oxikoi, vi ni ka osaꞌi veꞌi, vi ni ka ojitui nuu ñundeꞌi. 29 Su kiuu ni kee Lot ja ni kujioo de ñuu Sodoma, te ni kuun sau ñuꞌu ja saka tnaꞌa jin azufre, te ni ka naa ndiꞌi ñayiu yun. 30 Te suni saa kokuu kiuu na ndenta sein, ja kuu san Seꞌe Teyii.

31 ’Te kiuu saa na in yoxnei siki veꞌi, te ma ndioo ini ja ndiuu kai veꞌi ja keneꞌi ndatniui. Te na in ñayiu satniuu nuu yuku, te ma ndioo ini ja ndajiokuiin kai veꞌi. 32 Vi ndakaꞌan ni naxa ni ndoꞌo ñasiꞌi Lot. 33 Chi ñayiu nduku ndee ja skaku niꞌnui mai, te junai. Su ñayiu skunaa mai ja jaꞌa sein, te kaku niꞌnui ja kotekui.

34 ’Te kaꞌan san ja jakuaa yun, chi nuu ka kixin uu ñayiu nuu in jito, te in ndakuaka ia Dios, te inkai kendoo. 35 Te nuu ka oo uu ñaꞌa ka ndiko ña, in ña ndakuaka ya, te inka ña kendoo. 36 Te suni nuu ka oo uu tee ka oo yuku, in de ndakuaka ya, te inka de kendoo ―jiñaꞌa Jesús.

37 Yun te ni ka jikan tnoꞌo ña de:

―Te ¿ndenu kokuu siun, vi Jitoꞌo san? ―ka jiñaꞌa de.

Te jiñaꞌa ya:

―Nuu katuu in kiti ni jiꞌi, yun kuu nuu ka kututu kuaꞌa chioko ―jiñaꞌa ya.