12
Ka tnoꞌo tee ka skuaꞌa jin Jesús yoko triu in kiuu ndatatu
1 Te in kiuu ndatatu ni ka yaꞌa Jesús jin tee ka skuaꞌa jin ya in nuu kaa triu. Te ni ka kokin tee yun, te ni ka tnoꞌo de yoko triu yun, te ni ka saꞌa vii de, te ni ka jaa de. 2 Su ni ka jini tee ka kuu fariseo, te ka jiñaꞌa de:
͏―͏Kondiaꞌa ni ñayiu ka skuaꞌa jin ni ja ka saꞌa de in ja oo ii ja ma kuu saꞌo kiuu ndatatu.
3 Yun te jiñaꞌa ya:
͏―͏¿A tu ka kaꞌu ni nuu tutu ii naxa ni saꞌa David vi tee ka oo jin de nuu ni ka kokin de, 4 naxa ni kiuu de veꞌe maa ia Dios, te ni ka jaa de xtaa vixin ii, ja oo ii ja ma kuu vi kaa de, ni maa de, te ni tee ka oo jin de, chi maintnoꞌo sutu guaa kuu vi kaa? 5 ¿Axi tu ka kaꞌu ni nuu Ley Moisés naxa kaꞌan ja vi kuantniuo kiuu ndatatu? Su sutu, chi ka satniuu ni de kiuu yun ini veñuꞌu, te tu na kuechi ka tavi de. 6 Su sein, chi kaꞌan san ja yaꞌa oo in tee kaꞌnu ka saa veñuꞌu. 7 Su nuu suaꞌa te vi jinkuiꞌnu ini ni naxa kee kaꞌan tnoꞌo yaꞌa: “Ja kuini rin kuu ja vi kundaꞌu ini ron ñayiu, masu ja vi soko ron kiti nuu rin”, kachi ya. Nuu saa te ma vi kaꞌan kuechi ni siki ñayiu tu na kuechi. 8 Chi maa san ja kuu Seꞌe Teyii kuu san Jitoꞌo ja ndiso tniuu san ja tatnuni san siki kiuu ndatatu ͏―͏jiñaꞌa ya.
Ni ndasaꞌa Jesús in tee ni yichi ndaꞌa kiuu ndatatu
9 Te nuu ni yaꞌa ya yun, te ni jino ya veꞌe ii sinagoga nuu ka skuaꞌa ñayiu judio. 10 Te yun oo in tee ni yichi ndaꞌa. Te ni ka jikan tnoꞌo ña tee ka kuu fariseo yun jin Jesús, nagua ja kuu vi kaꞌan kuechi de siki ya, te ka jiñaꞌa de:
͏―͏¿A tu oo ii ja ndasaꞌo in ñayiu kuꞌu kiuu ndatatu?
11 Yun te jiñaꞌa ya:
͏―͏Ndee in tee kuu ja ka oo jin ni yaꞌa, nuu ja nevaꞌa de in ndikachi, te kanakau ti in yau kiuu ndatatu, te ¿a ma kiꞌin de te ndatau de ti? 12 ¿Te a masu ndee ka in ñayiu saa in ndikachi? Su yun guaa masu ii kuu ja saꞌo javaꞌa kiuu ndatatu.
13 Yun te jiñaꞌa ya nuu tee kuꞌu yun:
͏―͏Skaa ni ndaꞌa ni.
Te ni skaa de ndaꞌa de, te ni nduvaꞌa nagua oo inka ndaꞌa de. 14 Yun te ni ndekuei tee ka kuu fariseo yun, te ni ka ndatnoꞌo de naxa vi kaꞌni de Jesús.
Ni skunkuu tnoꞌo ni kaꞌan Isaías
15 Su nuu ni jini Jesús, te ni kee ya kuaꞌan ya. Te ni ka jata ndikin ña kuaꞌa ñayiu, te ni ndasaꞌa ya ndiꞌi ñayiu ka kuꞌu. 16 Te ni tatnuni ya ja ma vi xtuu ña ñayiu na in kuu ya. 17 Saa te ni skunkuu nagua ni kaꞌan Isaías, tee ni ndakani tnoꞌo ia Dios ndee janaꞌa nuu ni jiñaꞌa de:
18 Yaꞌa oo in tee jinokuechi nuu rin ja ni kaji rin de.
Te kutoo rin de vi osii ini rin jin de,
te kuñaꞌa rin Espíritu rin nuu de,
te kaxtnoꞌo de tnoꞌo ndaa rin nuu ñayiu sava ka tatatnoꞌo.
19 Te ni ma tee tnaꞌa de jin ñayiu, ni ma kana jaa de,
te ni in ñayiu ma vi kuni ja kaꞌan niꞌi de taka ichi.
20 Te ni ma kaꞌnu de in ndoo ja ni taxin,
te ni ma ndaꞌva de ni in yuaꞌa ja inka ni jinkondee kana ñuaꞌa ja kai,
vi guaa ndee na kundee de ja kotatnuni ndaa de.
21 Te vi kokukanu ini ña ñayiu sava ka tatatnoꞌo jin de,
ni kaꞌan Isaías.
Ka xtavi kuechi de Jesús ja oo ya jin jakaꞌnu maa Tachi
22 Yun te ni ka kisiaꞌa ñayiu in tee ñuꞌu ña tachi ja kuꞌu nuu de vi ñiꞌi kuu de nuu Jesús. Te ni ndasaꞌa ña ya ja ni ndayeꞌe nduchi nuu de vi ni ndakaꞌan de. 23 Te ndiꞌi ñayiu ni ka saꞌu kuii kuiti ini, te ka ndatnoꞌi:
͏―͏¿A masu tee yaꞌa kuu ndikin tata ndee David ja tetniuu ia Dios?
24 Su nuu ni ka onini tee ka kuu fariseo, te ka jiñaꞌa de:
͏―͏Tee yaꞌa, chi skunu de tachi jin jakaꞌnu maa Beelzebú, ja kuu tachi kaꞌnu ka, ja ñuꞌu ña jin de.
25 Te ni jini Jesús ja siun ka ndakani ini de, te jiñaꞌa ya:
͏―͏Ndiꞌi tee ka netniuu ja ka saꞌa siin tnaꞌa de ka jaxin tnaꞌa ndisa maa de, te ka xnaa tnaꞌa maa de. Te ndiꞌi ñuu axi veꞌe ja ka saꞌa siin tnaꞌa, te suni ma kuu vi koo. 26 Te suni saa ni tachi kuu kaꞌnu, nuu ja maa skunu tachi kueli yun, te jaxin tnaꞌa maa jin maa, te ¿naxa kuu koo guaꞌa nuu tatnuni nuu saa? 27 Su ka kaꞌan maa ni ja jin jakaꞌnu tachi kuu kaꞌnu kuu ja skunu san tachi kueli. Te nuu ja saa kuu, te ¿na in ni jiñaꞌa in jakaꞌnu nuu ñayiu ka ndikin ña jin maa ni ja ka skunu de tachi? Te ja jaꞌa tee yun vi kuni ni ja masu vatuka ka kaꞌan ni. 28 Su nuu ja jin Espíritu ia Dios kuu ja skunu san tachi, te jin yun kei ja ni kee ia Dios nuu ka oo maa ni ja tatnuni ya.
29 ’Chi ma kuu kiuu in tee veꞌe in tee ndakui, te suꞌu de nagua nevaꞌa tee yun. Chi xtnañuꞌu ka kuꞌni ña de, te saa kuu ja suꞌu de veꞌe tee yun.
30 ’Te na in tu chituu ña jin san, te siki san oo de. Te na in tu ka ndaxtutu jin san, te saꞌa de ja ka jitenuu ñayiu.
31 ’Te yun guaa kaꞌan san ja kuakaꞌnu ini ia Dios ndiꞌi yika kuechi ñayiu vi ja ka kaꞌan neꞌi siki ya. Su na in kaneꞌe siki Espíritu ia Dios, chi ma kuakaꞌnu ini ya. 32 Te na in kuu ja kaneꞌe siki Seꞌe Teyii, te kuakaꞌnu ini ia Dios. Su na in kaneꞌe siki Espíritu ia Dios, te ma kuakaꞌnu ini ya, ni ja ñuyiu yaꞌa, te ni ja vaji nuu kuee ka.
Jin ndiaꞌa tnu te vi kunio na yutnu kuu tnu
33 ’Vi kokuu ni na kuinio in yutnu guaꞌa, ja kuun ndiaꞌa guaꞌa nuu tnu, axi vi kokuu ni na kuinio in yutnu kueꞌe ja kuun ndiaꞌa kueꞌe nuu tnu. Chi nagua kuun nuu tnu, te kunio na yutnu kuu tnu. 34 ¡Tatatnoꞌo koo! ¿Naxa kuu vi kaꞌan ni tnoꞌo vaꞌa, te ñayiu kueꞌe ka kuu ni? Chi nagua oo chitu anuo, te yun guaa kaꞌan yuꞌo. 35 Chi in tee guaꞌa tavaꞌa de javaꞌa anu de ja kaꞌan de tnoꞌo vaꞌa. Te in tee kueꞌe tavaꞌa de jakueꞌe anu de, ja kaꞌan de tnoꞌo kueꞌe. 36 Su sein, chi kaꞌan ndaa san ja ndiꞌi ñayiu ja ka kaꞌin tnoꞌo tu jiniuꞌu, vi ndakuñaꞌi kuenta nuu ia Dios kiuu sandiꞌi ja saꞌa ndaa ya kuechi. 37 Chi jin tnoꞌo ka kaꞌan ni, te kekuei ni ja ñayiu ndaa ka kuu ni. Te suni jin tnoꞌo ka kaꞌan ni, te vi xtavi kuechi ni maa ni ja vi tniuyaꞌu ni yika kuechi ni ͏―͏jiñaꞌa Jesús.
Ka jikan ñayiu kueꞌe ja na saꞌa Jesús in tniuu kaꞌnu
38 Yun te ka jiñaꞌa sava tee ka kaxtnoꞌo Ley vi tee ka kuu fariseo:
͏―͏Mastru, ka kuini san ja saꞌa ni in tniuu kaꞌnu.
39 Yun te jiñaꞌa ya:
͏―͏Ñayiu yaꞌa, chi inu kueꞌe ndevaꞌi, te tu ka jantaꞌu kuiti ia Dios, ka jikan ja na saꞌa san in tniuu kaꞌnu. Su tu ka na tniuu kaꞌnu saꞌa san, chi maa ni nagua ni ndoꞌo Jonás, tee ni ndakani tnoꞌo ia Dios ndee janaꞌa. 40 Chi nagua ni inee Jonás chii chiaka kaꞌnu uni kiuu vi uni jakuaa, te saa ni sein ja kuu san Seꞌe Teyii, chi kuinee san uni kiuu vi uni jakuaa chii ñuꞌu. 41 Te vi ndakoo ñayiu ñuu Nínive kiuu sandaa ia Dios kuechi, te vi xtavi kuechi ñai jin ñayiu ka oo tiempu vitna, chi ni ka ndatnaꞌu ini ñayiu ñuu Nínive yun, te ni kiukuei ichi ia Dios, nuu ni ka onini tnoꞌo vaꞌa ia Dios ja ni kaxtnoꞌo Jonás. Te kaꞌnu ka kuu maa san ja oo san yaꞌa, saa Jonás. 42 Te suni ndakoo in ñaꞌa ni okuu reyna ni otatnuni ichi sur, kiuu sandaa ia Dios kuechi, te xtavi kuechi ña jin ñayiu ka oo tiempu vitna, chi jika ndevaꞌa ñuu ñaꞌa yun, su ni kii ña ni onini ña tnoꞌo ndichi ni kaꞌan rey Salomón. Te kaꞌnu ka kuu maa san ja oo san yaꞌa, saa rey Salomón.
Ni ndajiokuiin tachi kueꞌe ini anu in ñayiu
43 ’Te nuu kana in tachi kueꞌe ni ñuꞌu ña jin in ñayiu, te kuaꞌan jiondita in nuu ñuꞌu yichi nduku ndenu ndatatu. Su nuu tu niꞌi, 44 yun te kaꞌan: “Na ndajiokuion veꞌe nuu ni keo ja vajio”, kachi. Te nuu ndajiokuiin tachi yun, te nukuꞌun ini anu ñayiu yun na kuinio in veꞌe ja tu na in oo, te ni ka ndaxtaa vi ni ka ndaskutu vii. 45 Yun te kiꞌin junkuaka uja tachi kueꞌe ndevaꞌa ka saa maa, te ndajinokuei, te kiukuei ja vi koo ini anu ñayiu yun. Nuu saa, te kueꞌe ndevaꞌa ka ñayiu kokui saa jaxtnañuꞌu. Te suni saa vi ndoꞌo ñayiu ka oo tiempu vitna, chi ñayiu kueꞌe ndevaꞌa ka kui ͏―͏jiñaꞌa ya.
Ni jinokuei nana Jesús vi ñani ya
46 Te vi nini kaꞌan ka ya jin ñayiu yun, te ni jinokuei nana ya vi ñani ya ka ndetu ña yeꞌe yun ja vi kaꞌan jin ya. 47 Te jiñaꞌa in tee nuu ya:
͏―͏Yun ka ndetu ña nana ni vi ñani ni yeꞌe yun, te ka kaꞌan ja vi kaꞌan jin ni.
48 Yun te jiñaꞌa ya nuu tee ni kaꞌan yun:
͏―͏¿Na in kuu nana san, te na in ka kuu ñani san?
49 Yun te ni xnendaꞌa ya nuu ka oo ñayiu ka skuaꞌa jin ya, te jiñaꞌa ya:
͏―͏Yaꞌa oo nana san vi yaꞌa ka oo ñani san. 50 Chi ndiꞌi ñayiu ka saꞌa nagua kuini Tata san, ia oo ndee andivi, te ñayiu yun ka kuu ñani san, vi kuaꞌa san vi nana san ͏―͏jiñaꞌa ya.