16
Ka jikan ñayiu ja na saꞌa Jesús in tniuu kaꞌnu
Yun te ni jinokuei tee ka kuu fariseo vi tee ka kuu saduceo ja vi koto tnuni ña de jin Jesús, te ni ka jikan de ja na saꞌa ya in tniuu kaꞌnu ja kokuu in seña ja vaji ndee andivi. Su yun te jiñaꞌa ya:
͏―͏Nuu mañini, te ka kaꞌan maa ni suaꞌa: “Guaꞌa kiuu kokuu, chi ndeꞌe ni ndukuaꞌa andivi”. Te tnoꞌo neꞌe ka kaꞌan ni: “Kuun ndevaꞌa sau vitna, chi ni ndukuaꞌa andivi vi ni ndachitu viko”, ka kachi ni. ¡Seꞌe ndijani ini! ¿Nagua kuu seña ja oo ichi andivi ja ka jinkuiꞌnu ini ni, su tu ka jinkuiꞌnu ini ni ja saꞌa san tiempu vitna? Tatatnoꞌo kueꞌe ja tu ka kandija ia Dios, ka jikan in tniuu kaꞌnu, su ma saꞌa san, chi maintnoꞌo ni tniuu kaꞌnu nagua ni ndoꞌo Jonás, tee ni ndakani tnoꞌo ia Dios ndee janaꞌa, kuu ja xneꞌe san ͏―͏jiñaꞌa ya, te kuaꞌan ya.
Skintnaꞌa Jesús tnoꞌo ka kaxtnoꞌo fariseo jin levadura
Yun te ni ka yaꞌa tee ka skuaꞌa jin ya inka jioo yuꞌu ndute mar yun, te ni ka naa ini de ja vi kindaꞌa de xtaa vixin. Yun te jiñaꞌa Jesús:
͏―͏Vi koto vaꞌa ni maa ni jin levadura tee ka kuu fariseo vi tee ka kuu saduceo.
Su yun te ka ndatnoꞌo tnaꞌa de:
͏―͏Yun kaꞌan de, chi chia tu ni ka yindaꞌo xtaa vixin.
Te ni jini Jesús, te jiñaꞌa ya:
͏―͏Tee tu ka kandija guaꞌa ka kuu ni. ¿Nau ja ka ndatnoꞌo tnaꞌa ni ja tu na xtaa vixin ka yindaꞌa ni? ¿A tu ka jinkuiꞌnu ini ni? ¿Axi tu ka naꞌa ni ja uꞌun vi xtaa vixin, te ni ka jaa uꞌun mil teyii, te nasaa ka chika ni ka ndaxtutu ni? 10 ¿A vini tu ka naꞌa ni ja uja ni xtaa vixin, te ni ka jaa kuun mil teyii, te nasaa ka chika ni ka ndaxtutu ni? 11 ¿Su nau ja tu ka jinkuiꞌnu ini ni ja masu xtaa vixin yun kaꞌan jin san? Chi kaꞌan san ja vi koto vaꞌa ni maa ni jin levadura tee ka kuu fariseo vi tee ka kuu saduceo ͏―͏jiñaꞌa ya.
12 Yun te saa ni ka jinkuiꞌnu ini de ja masu kaꞌan ya ja vi koto vaꞌa de maa de jin levadura xtaa vixin, chi ja vi koto vaꞌa de maa de jin tnoꞌo ja ka kaxtnoꞌo tee ka kuu fariseo vi tee ka kuu saduceo.
Ni kaꞌan kaji Pedro ja Jesús kuu ia ni tetniuu Dios
13 Yun te nuu ni jinokuei Jesús taka ñuu ka oo Cesarea Filipo, te ni jikan tnoꞌo ya tee ka skuaꞌa jin ya, te jiñaꞌa ya:
͏―͏¿Naxa ka kaꞌan ñayiu na in kuu sein ja kuu san Seꞌe Teyii?
14 Te ka jiñaꞌa de:
͏―͏Sava ñayiu ka kaꞌan ja Juan, tee ni oskuandute kuu ni, te savai, chi Elías, te sava kai ka kaꞌan ja Jeremías axi ndee inka tee ni ondakani tnoꞌo ia Dios ndee janaꞌa kuu ni ͏―͏ka kaꞌan de.
15 Te jiñaꞌa ya:
͏―͏Te maa ni, ¿naxa ka kaꞌan ni, na in kuu san?
16 Yun te jiñaꞌa Simón Pedro:
͏―͏Maa ni kuu Kristu, ia ni tetniuu Dios, vi Seꞌe ia Dios teku kuu ni ͏―͏jiñaꞌa de.
17 Yun te jiñaꞌa Jesús:
͏―͏Na taꞌu na ndetu ni, vi Simón seꞌe Jonás, chi ni in ñayiu tu na in ni ndaxtuu nuu ni, chi maintnoꞌo maa Tata Dios san, ia oo ndee andivi, kuu ia ni ndaskuni ña jin ni. 18 Te suni sein kaꞌan san ja Pedro kuu ni, te kuu ni na kuinio in kava, te siki kava yaꞌa saꞌa san veñuꞌu san ja ka kuu ñayiu ka kandija ña jin san, te ni in jakueꞌe vaji nuu nee ma kundee siki ni ni siki ñayiu ka kandija. 19 Te taa san ndakaa nuu tatnuni ia Dios ndee andivi ja kuu in tniuu kaꞌnu nuu ni, te ndiꞌi na in juꞌni ni nuu ñuyiu yaꞌa, te vi saa ni vi konuꞌni ndee andivi, te ndiꞌi na in ndajin ni nuu ñuyiu yaꞌa, te vi saa ni vi ndajin ndee andivi ͏―͏jiñaꞌa ya.
20 Yun te ni tatnuni ya nuu tee ka skuaꞌa jin ya ja ma vi kokaꞌan de nuu ni in ñayiu ja maa ya kuu Kristu, ia ni tetniuu Dios.
Ni kaxtnoꞌo Jesús ja kuu ya te ndateku ya
21 Ndee kiuu yun ni jinkondee Jesús kaxtnoꞌo ya nuu tee ka skuaꞌa jin ya ja nini kuu ja noꞌo ya Jerusalén, te tnaꞌa ya kuaꞌa ndevaꞌa tnundoꞌo, chi vi ndakoo tee ka kuu nijaꞌnu nuu ñuu, vi tee ka kuu nijaꞌnu nuu sutu, vi tee ka kaxtnoꞌo Ley, te vi kaꞌni ña de jin ya, su nuu uni kiuu, te ndateku ya. 22 Yun te ni keneꞌe siin ña Pedro jin ya, te kuxeen de nuu ya, jiñaꞌa de:
͏―͏¿Nau ja siun kaꞌan ni, vi Jitoꞌo san? Te ma kuandetu saꞌun ia Dios ja siun ndoꞌo ni ͏―͏jiñaꞌa de.
23 Su ni jiokuiin ya, te jiñaꞌa ya nuu Pedro:
͏―͏Kujioo ni nuu san, vi Tachi, ma kasi ni ichi kiꞌin san. Chi tu ndakani ini ni nagua ndakani ini ia Dios, chi na ni ka ndakani ini ñayiu ñuyiu yaꞌa ndakani ini ni.
24 Yun te jiñaꞌa Jesús nuu tee ka skuaꞌa jin ya:
͏―͏Nuu na in kuini ja kondikin ña jin san, te na skunai mai, te kuisoi siki cruz ja kuu tnundoꞌo, te na kondikin ñai jin san. 25 Chi na in kaꞌan ja skaku niꞌnui mai, te junai. Te na in skunaa mai ja jaꞌa sein, te ndaniꞌi ja kotekui. 26 Chi ¿nagua niꞌi ñayiu visi na konevaꞌi ndiꞌi ja oo ñuyiu yaꞌa, te skunai anui? ¿Axi nagua kuu ja tniuyaꞌu ñayiu ja skaku niꞌnui anui? 27 Chi sein ja kuu san Seꞌe Teyii, ndii san jin jayeꞌe jatajan maa Tata Dios vi ia ka jinokuechi nuu ya. Te yun kuu nuu tniuyaꞌu ña ia Dios jin in in ñayiu na kuu na kuu nagua ni ka saꞌi. 28 Te kaꞌan ndaa ndija san ja oo ndee in maa ni ja ka oo ni yaꞌa, ma vi kuu ni guaa ndee vi kuni ni jin sein ja kuu san Seꞌe Teyii ja ndii san ja tatnuni san ͏―͏jiñaꞌa ya.