1 Yun te nuu ni ndiꞌi ni kaꞌan Jesús ndiꞌi tnoꞌo yaꞌa, te jiñaꞌa ya nuu tee ka skuaꞌa jin ya:

2 ͏―͏Ja ka jini maa ni ja nuu uu ni ka kiuu, te koo viko pascua ñayiu ñuo, te vi xtuu ña ñayiu jin sein ja kuu san Seꞌe Teyii, te vi katakaa ña nuu ndaꞌa cruz ͏―͏jiñaꞌa ya.

3 Yun te ni ka ndututu tee ka kuu nijaꞌnu nuu sutu vi tee ka kaxtnoꞌo Ley vi tee ka kuu nijaꞌnu nuu ñayiu ñuu Israel nuu oo veꞌe tniuu sutu kuu nijaꞌnu ka nani Caifás. 4 Te ni ka skaꞌan tnaꞌa de naxa vi kakuiko de Jesús jin ninoꞌo tnoꞌo tnoꞌo, te vi kaꞌni ña de. 5 Su ni ka kachi de:

͏―͏Ma vi kakuiko de kiuu viko yaꞌa, chi nuu ñaꞌa, te vi saꞌa niꞌi vi saꞌa ioo ñayiu ñuo ͏―͏ni ka kachi de.

6 Te oo Jesús ñuu Betania, veꞌe Simón, tee ni okuꞌu kueꞌe ndiꞌyi teꞌi. 7 Te yun ni jino in ñasiꞌi nuu oo ya, nee ña in tindoꞌo yuu vii ndevaꞌa ñuꞌu chitu tatna xiko ja ndee yaꞌu ndevaꞌa. Te ni joso ña xini ya nuu nukoo ya nuu mesa jaa ya xtaa. 8 Su nuu ni ka jini tee ka skuaꞌa jin ya, te ni ka kiti ini de, te ka jiñaꞌa de:

͏―͏¿Nau ja skunaa ñaꞌa yaꞌa tatna xiko yaꞌa? 9 Guaꞌa ka kuu ni xiko ña, te niꞌi ña kuaꞌa xuꞌun, te skutaꞌu ña ñayiu ka kuu ndaꞌu nuu siun ͏―͏ka kachi de.

10 Su nuu ni jini Jesús ja siun ka kaꞌan de, te jiñaꞌa ya:

͏―͏¿Nau ja ka xnaꞌa ni ñaꞌa yaꞌa? Te in tniuu guaꞌa ni saꞌa ña jin san. 11 Kuu ka ñayiu ka kundaꞌu, chi ndiꞌi ni kiuu ni vi koo ni jin, su sein, chi masu ndiꞌi kiuu vi koo. 12 Chi ja ni joso ña ñaꞌa yaꞌa tatna xiko yaꞌa nuu yiki kuñu san kuu ja ni saꞌa tuaꞌa ña jin san ja jinkoyuꞌu san. 13 Te kaꞌan ndaa ndija san ja ndee ni nuu ni kuu ja ka kaxtnoꞌo ñayiu tnoꞌo vaꞌa ia Dios ninii ñuyiu yaꞌa, te suni vi ndakani ja ni saꞌa ñaꞌa yaꞌa nagua vi kondakaꞌan ña ñayiu jin ña ͏―͏jiñaꞌa ya.

14 Yun te kuaꞌan Judas Iscariote, in tee neꞌu ndi uxi uu tee ka skuaꞌa jin ya, ja vi ndatnoꞌo tnaꞌa de jin sutu ka kuu nijaꞌnu. 15 Te jiñaꞌa de:

͏―͏¿Nasaa ka kuini ni ja vi tniuyaꞌu ña ni, te na xtuu san Jesús nuu ni?

Te ni ka tniuyaꞌu ña tee yun oko uxi xuꞌun kaa kuu plata. 16 Te vi ndee ore saa ni kejaꞌa de nduku de naxa kuu ja xtuu de Jesús nuu sutu ka kuu nijaꞌnu yun.

17 Yun te kiuu xtnañuꞌu ja ni kejaꞌa viko yun nuu ka jaa ñayiu xtaa vixin uun ja tu na levadura yiꞌi, ni ka juntnaꞌa tee ka skuaꞌa jin Jesús, te ka jiñaꞌa de:

͏―͏¿Ndenu kuini ni ja vi savaꞌa san lelu nuu vi kaxinio viko pascua yaꞌa? ͏―͏ka jiñaꞌa de.

18 Yun te jiñaꞌa ya:

͏―͏Kuaꞌankuei ni ndee maa ñuu, veꞌe in tee ka jini tnaꞌa jin san, te vi kuñaꞌa ni: “Kaꞌan Mastru suaꞌa: Ja oo yatni kiuu ja kuu san, te veꞌe ni kuini san ja vi saꞌa san viko pascua jin tee ka skuaꞌa jin san”, vi kuñaꞌa ni ͏―͏jiñaꞌa ya.

19 Yun te ni ka saꞌa tee ka skuaꞌa jin ya nagua ni tatnuni ya, te ni ka savaꞌa de ja vi kaxini ya jin de viko pascua yun.

20 Te nuu ni kunee, te ni ka junkoo ya jin ndi uxi uu tee ka skuaꞌa jin ya. 21 Te nini ka jaxini ya jin de, te jiñaꞌa ya:

͏―͏Kaꞌan ndaa ndija san ja in maa ni xtuu ña jin san ͏―͏jiñaꞌa ya.

22 Te ni ka kusuchi ndevaꞌa ini in in de, te ni ka jinkondee de ka jikan tnoꞌo ña de:

͏―͏¿A sein kuu, vi Jitoꞌo san?

23 Yun te jiñaꞌa ya:

͏―͏Na in ka jaa jin san in ni nuu koꞌo, te suu kuu ja xtuu ña jin san. 24 Te sein ja kuu san Seꞌe Teyii, chi vi ja ndaa ja ndoꞌo san nagua yoso nuu tutu ii. Su ndaꞌu ni ka maa tee xtuu ña jin san, chi vi guaꞌa ka kuu ja ma kaku de ja koo de ñuyiu yaꞌa nuu siun ͏―͏jiñaꞌa ya.

25 Yun te jiñaꞌa Judas, tee nduku ja xtuu ña jin ya:

͏―͏¿A sein kuu, Mastru?

͏―͏Suu ni kaꞌan maa ni ͏―͏jiñaꞌa ya.

26 Te vi nini ka jaa de jin ya xtaa, te ni tnii ya xtaa vixin yun, te ni ndakuantaꞌu ya nuu ia Dios, te ni taꞌu ya, te ni jiñaꞌa ya nuu tee ka skuaꞌa jin ya, te jiñaꞌa ya:

͏―͏Vi tnii ni te vi kaa ni, chi yaꞌa kuu yiki kuñu san.

27 Yun te ni tnii ya vasu nuu ñuꞌu vinu, te ni ndakuantaꞌu ya nuu ia Dios, te ni siaꞌa ya vasu yun, te jiñaꞌa ya:

͏―͏Ndiꞌi ni vi koꞌo vinu ñuꞌu nuu vasu yaꞌa. 28 Chi yaꞌa kuu niñi san ja soko san ja kokuu in tratu jaa, te kati ja jaꞌa kuaꞌa ñayiu nagua ja konekaꞌnu ini ia Dios yika kuechi. 29 Su kaꞌan san ja vi ndee ore vitna, te ma koꞌo ka san nduxi uva yaꞌa guaa ndee kiuu vi koꞌo tukuo vinu jaa nuu tatnuni ia kuu Tata san.

30 Te nuu ni ndiꞌi ni ka jita ya in yaa vaji nuu Salmo, te kuaꞌankuei ya yuku Olivos.

31 Yun te jiñaꞌa Jesús:

͏―͏Ndiꞌi ni vi ndayuꞌu ja jaꞌa tnundoꞌo kii siki san jakuaa vitna, chi yoso nuu tutu ii: “Xtuji rin tee jito ndikachi, te yaꞌa yun ni ka vi kutenuu ti”, kachi tutu ii. 32 Su nuu na ndateku san, te kokoxnoꞌo san konoꞌo san Galilea, te saa ndajakuei ni ͏―͏jiñaꞌa ya.

33 Yun te jiñaꞌa Pedro:

͏―͏Visi ndiꞌi de na vi ndayuꞌu, su sein, chi ma ndayuꞌu saꞌun san.

34 Te jiñaꞌa Jesús:

͏―͏Kaꞌan ndaa ndija san ja jakuaa vitna, te uni jichi kaꞌan ni ja tu jini ña ni jin san ama ka ja kana liꞌli.

35 Yun te jiñaꞌa Pedro:

͏―͏Visi na kuu san jin ni, su ma kaꞌan san ja tu jini ña san ͏―͏jiñaꞌa de.

Te vi suni saa ni ka jiñaꞌa ndiꞌi tee ka skuaꞌa jin ya.

36 Yun te kuaꞌankuei ya jin tee ka skuaꞌa jin ya, te ni jinokuei ya in nuu nani Getsemaní, te jiñaꞌa ya:

͏―͏Vi jinkoo ni yaꞌa nini kiꞌin san yun na ndakuatu san ͏―͏jiñaꞌa ya.

37 Te ni jaka ya Pedro vi nduu seyii Zebedeo, te ni jinkondee ya ni kusuchi ini ya vi ni tnaꞌu ndevaꞌa ini ya. 38 Yun te jiñaꞌa ya:

͏―͏Kusuchi ndevaꞌa ini san vi ndee na kuu san. Vi kendoo ni yaꞌa ni, te vi kondito ni jin san.

39 Yun te ni kuu jika ya joo, te ni jinkuiin jiti ya vi ndee ni kunjino tnee ya nuu ñuꞌu, te ni ndakuatu ya, jiñaꞌa ya:

͏―͏Tata maa san, nuu ja suaꞌa te kuu, te xtajioo ni tnundoꞌo vaji siki san. Su ma kokuu nagua kaꞌan maa san, chi na kokuu nagua kuini maa ni ͏―͏jiñaꞌa ya.

40 Te vini ni ndajiokuiin ya ni ndajino ya nuu ka oo tee ka skuaꞌa jin ya, te ni nukuꞌun ña ya ja ka kixin de. Te jiñaꞌa ya nuu Pedro:

͏―͏¿A vini in ore, tu ni ka kundee ini ni ja vi kondito ni jin san? 41 Vi kondito ni, te vi ndakuatu ni nuu ia Dios nagua ja ma koto tnuni ña jakueꞌe, chi ja ndaa ja anu ni oo tuaꞌa ja kuantnoꞌo nuu ia Dios, su yiki kuñu ni, chi vita kuu ͏―͏jiñaꞌa ya.

42 Yun te kuaꞌan tuku ya ja kuu uu ja ni ndakuatu ya, te jiñaꞌa ya:

͏―͏Tata maa san, nuu ja ma kuu ja xtajioo ni tnundoꞌo yaꞌa ja tnaꞌa san, te saꞌa ni nagua kuini maa ni ͏―͏jiñaꞌa ya.

43 Te ni ndajino ya inka jichi, te ni nukuꞌun ña ya ja ka kixin tuku de, chi tu ka kundee ka nduchi nuu de jin ñuaꞌna. 44 Te ni xndoo tuku ña ya, te kuaꞌan ya ja ndakuatu ya jichi kuu uni, te inuu ni tnoꞌo ni kaꞌan ya. 45 Yun te ni ndajino ya nuu ka oo tee ka skuaꞌa jin ya, te jiñaꞌa ya:

͏―͏¿A vi ka kixin ni ni vi ka ndatatu ni? Te ja ni jino ore ja vi kakuiko ña ñayiu ka saꞌa yika kuechi jin sein ja kuu san Seꞌe Teyii. 46 Vi ndakoo ni na kiꞌon, chi ja makuyatni tee xtuu ña jin san ͏―͏jiñaꞌa ya.

47 Te vi nini kaꞌan ka ya, te ni jino ni Judas, in tee neꞌu ndi uxi uu tee ka skuaꞌa jin ya, ndeka de kuaꞌa tee ka nee yuchi kani vi tee ka nee yutnu ja ni ka tetniuu ña tee ka kuu nijaꞌnu nuu sutu vi tee ka kuu nijaꞌnu nuu ñuu. 48 Te ja ni kaxtnoꞌo Judas, tee ni xtuu ya, nagua kokuu in seña, te jiñaꞌa de:

͏―͏Na xiin nuu tetuyuꞌu san, te tee yun kuu tee vi kakuiko ni ͏―͏jiñaꞌa de.

49 Yun te ni jintnaꞌa de Jesús, te jiñaꞌa de:

͏―͏Oo vaꞌa ni, Mastru.

Te ni tetuyuꞌu de nuu ya.

50 Te jiñaꞌa Jesús:

͏―͏Amigo, saꞌa ni na tniuu vaji ni.

Yun te ni ka jintnaꞌa ña sava ka tee yun, te ni ka kakuiko ña de jin ya.

51 Su in tee ka oo jin Jesús, ni keneꞌe de yuchi kani de, te ni jaꞌnde de soꞌo in tee jinokuechi nuu sutu kuu nijaꞌnu ka. 52 Yun te jiñaꞌa Jesús:

͏―͏Ndatavaꞌa ni yuchi kani ni nuu ñuꞌu maa, chi ndiꞌi tee jaxin tnaꞌa jin yuchi kani, te suni jin yuchi kani yun kuu de. 53 ¿Chi a tu jini ni ja kuu kakantaꞌu san nuu Tata san, te vitna ñuꞌni tetniuu ya viꞌi ka uni xiko uxi uu mil ia ka jinokuechi nuu ya ja vi skaku niꞌnu ña jin san? 54 Su nuu ja saa saꞌa san, ¿te naxa skunkuu nagua yoso nuu tutu ii nuu kaꞌan ja nini kuu ja saa ndoꞌo san? ͏―͏jiñaꞌa ya.

55 Te vi ore saa jiñaꞌa Jesús nuu tee yun:

͏―͏¿Nau ja ka nee ni yuchi kani vi yutnu vajikuei ni ja vi kakuiko ña ni jin san na kuinio ja kuiꞌna kuu san? Te in in kiuu ni ka oo in nio nuu veñuꞌu kaꞌnu ja ni okaxtnoꞌo san tnoꞌo ia Dios, te tu ni ka kakuiko ña ni. 56 Su saa kokuu ndiꞌi yaꞌa, nagua ja skunkuu nagua yoso nuu tutu ii ja ni ka kaꞌan tee ni ka ndakani tnoꞌo maa ia Dios ndee janaꞌa ͏―͏jiñaꞌa ya.

Yun te maintnoꞌo ni ka ya, ni ka xndoo ña tee ka skuaꞌa jin ya, te ni ka jino yuꞌu de kuaꞌankuei de.

57 Yun te ni ka jaka ña tee ni ka kakuiko ña jin Jesús nuu sutu kuu nijaꞌnu ka nani Caifás nuu ka otutu tee ka kaxtnoꞌo Ley vi tee ka kuu nijaꞌnu nuu ñuu. 58 Su Pedro, chi jika ni ndikin ña de kuaꞌan de guaa ndee ini nuu oo veꞌe tniuu sutu kuu nijaꞌnu ka yun. Te ni kiuu de, te ni jinkoo de nuu ka nukoo ndajaꞌa yun, nagua ja kuni de naxa vi saꞌa ña de jin Jesús.

59 Su tee ka kuu nijaꞌnu nuu sutu vi tee ka kuu nijaꞌnu nuu ñuu vi ndiꞌi tee ka netniuu nuu ka ndututu yun, ka nduku de in ja kaꞌan tnoꞌo siki Jesús, nagua ja kuu vi xtavi kuechi ña de ja kuu ya. 60 Su tu ni ka niꞌi de kuechi ya, visi kuaꞌa tee tnoꞌo ni jinokuei ja ka kaꞌan kuechi de siki ya. Yun te saa ndiꞌi ni ka, ni jinokuei uu testiu ja vi kaꞌan tnoꞌo siki ya. 61 Te ka jiñaꞌa de:

͏―͏Tee yaꞌa ni kaꞌan de: “Kuu kani san veñuꞌu ia Dios, te nuu uni kiuu, te ndasaꞌa san”, kachi de ͏―͏ka jiñaꞌa de.

62 Yun te ni ndakoo tee kuu nijaꞌnu nuu sutu yun, te jiñaꞌa de nuu Jesús:

͏―͏¿Nau ja tu kaꞌan saꞌun ron? ¿Na tnoꞌo kuu ja siun ka kaꞌan tee jian siki ron? ͏―͏jiñaꞌa de.

63 Su Jesús, chi tu ni kaꞌan saꞌun ya. Yun te jiñaꞌa tee kuu nijaꞌnu nuu sutu yun:

͏―͏Yaꞌa oo maa ia Dios teku, te tatnuni rin ja kaꞌan ndaa ron, te kaꞌan a suu ron kuu Kristu, Seꞌe ia Dios ͏―͏jiñaꞌa de.

64 Te jiñaꞌa Jesús:

͏―͏Suu san kuu kaꞌan maa ni. Te suni kaꞌan san ja ndee vitna, te vi kuni ni Seꞌe Teyii ja konukoo ichi ndaꞌa kuaꞌa maa Dios, ia kaꞌnu ndevaꞌa, te ndii ndee nuu viko ichi andivi ͏―͏jiñaꞌa ya.

65 Yun te ni ndata sutu kuu nijaꞌnu ka yun saꞌun de, ja kuu in seña ja kiti ini de, te jiñaꞌa de:

͏―͏Ni kaneꞌe tee yaꞌa jin ia Dios. ¿Te nagua vi kokuu kao testiu ja vi kaꞌan kuechi siki de? Te vitna ja ni ka onini maa ni ja kaneꞌe de jin ia Dios. 66 ¿Naxa ka kaꞌan tna ni? ͏―͏jiñaꞌa sutu kuu nijaꞌnu ka yun.

Te ka jiñaꞌa sava ka tee yun:

͏―͏Tee oo kuechi kuu de, te na kuu de.

67 Yun te ni ka tiusii de nuu ya vi ni ka kani ña de jiki, te sava de ni ka katu tikatu nuu ya. 68 Te ka jiñaꞌa de:

͏―͏Nuu ja maa ron kuu Kristu, ia netniuu Dios, te kaꞌan, na ndee tee kuu ja ni kani ña jin ron ͏―͏ka jiñaꞌa de.

69 Te Pedro, chi yeꞌe juera ni yun nukoo de. Te ni jino in ñasiꞌi jinokuechi nuu sutu yun, te jiñaꞌa ña:

͏―͏Maa ni, chi suni ni ka oo ni jin Jesús, tee Galilea ͏―͏jiñaꞌa ña.

70 Su Pedro, chi ni tayuꞌu tnoꞌo de nuu ndiꞌi ñayiu ka oo yun, te jiñaꞌa de:

―Tu jini san na tnoꞌo kaꞌan ni.

71 Te vi inka ni ndee de yeꞌe yun, te ni jini ña inka ñaꞌa jinokuechi yun, te jiñaꞌa ña nuu sava ka ñayiu ka oo yun:

͏―͏Tee yaꞌa, chi suni ni ka oo de jin Jesús, tee Nazaret ͏―͏jiñaꞌa ña.

72 Su ni tayuꞌu tnoꞌo tuku de, te jiñaꞌa de:

͏―͏Kaꞌan ndaa san nuu ia Dios ja tu jini san na ndee tee kuu tee yun ͏―͏jiñaꞌa de.

73 Te nunuu ka joo, te ni ka jintnaꞌa ña ñayiu ka oo yun, te ka jiñaꞌi nuu Pedro:

͏―͏Vi ja ndaa ja suu ni kuu in tee ka ndeka tnaꞌa jin tee yun, chi vi ndee tnoꞌo kaꞌan ni ndaxtuu ña ͏―͏ka jiñaꞌi.

74 Yun te ni jinkondee de ni kaneꞌe de vi kee yuꞌu de jin sivi ia Dios, te jiñaꞌa de:

͏―͏Tu jini san tee yun.

Te vi nuu saa ni kana in liꞌli. 75 Yun te ni ndakaꞌan Pedro tnoꞌo ni kaꞌan Jesús nuu jiñaꞌa ya: “Ama ka ja kana liꞌli, te uni jichi kaꞌan ni ja tu jini ña ni jin san”. Yun te ni ndee de kuaꞌan de, te ni ndaꞌi ni kana de ja tnaꞌu ndevaꞌa ini de.