1 Te kuini ka uu kiuu ja kejaꞌa viko pascua ñayiu judio, ja ka jai xtaa vixin ja tu na levadura yiꞌi. Te ni ka skaꞌan tnaꞌa sutu ka kuu nijaꞌnu jin tee ka kaxtnoꞌo Ley Moisés naxa vi kakuiko de Jesús jin tnoꞌo tnoꞌo, te vi kaꞌni de jin ya. 2 Te ka kachi de:

―Ma vi kakuiko de kiuu viko yaꞌa, chi ndontakuei vaa ñayiu sikio ―ka kachi de.

3 Te nuu oo Jesús ñuu Betania, veꞌe Simón, tee ni okuꞌu kueꞌe ndiꞌyi teꞌi, te ka nukoo ya nuu mesa ka jaa ya xtaa, te ni jino in ñasiꞌi, nee ña in tindoꞌo yuu vii ndevaꞌa nani alabastro ñuꞌu chitu tatna xiko ja kuu ita nardo, in ja ndee yaꞌu ndevaꞌa. Te ni taꞌu ña tindoꞌo yun, te ni joso ña tatna xiko yun xini ya. 4 Te ni ka kiti ini sava tee ka oo yun, te ka ndatnoꞌo tnaꞌa de:

―¿Nau ja skunaa ñaꞌa yaꞌa tatna xiko yaꞌa? 5 Chi kuu xiko ña nuu siun, te niꞌi ña yaꞌu viꞌi ka uni ciento kiuu, te kuñaꞌa ña xuꞌun yun nuu ñayiu ka kuu ndaꞌu ―ka kachi de.

Te ni ka kiti ini de nuu ña. 6 Su jiñaꞌa Jesús:

―Kokuu maa maa ña, ¿nau ja ka xnaꞌa ni ña? Te in tniuu guaꞌa kuu ja ni saꞌa ña jin san. 7 Chi siun ni vi koo ni jin ñayiu ka kuu ndaꞌu, te kuu vi saꞌa ni jin javaꞌa na kiuu ka kuini maa ni. Su sein, chi masu vi siun ni vi koo ni jin san. 8 Chi ni saꞌa ñaꞌa yaꞌa nagua kuu ja kuu saꞌa ña, chi ni joso ña tatna xiko yiki kuñu san ja ni saꞌa tuaꞌa ña ña ja jinkoyuꞌu san. 9 Te kaꞌan ndaa ndija san ja ndee ni nuu ni kuu ja ka kaxtnoꞌo ñayiu tnoꞌo vaꞌa ia Dios ninii ñuyiu yaꞌa, te suni vi ndakani ja ni saꞌa ñaꞌa yaꞌa nagua ja vi kondakaꞌan ña ñayiu jin ña ―jiñaꞌa ya.

10 Yun te kuaꞌan Judas Iscariote, in tee ka skuaꞌa jin ya ja kuu ndi uxi uu de, ja vi ndatnoꞌo tnaꞌa de jin sutu ka kuu nijaꞌnu naxa kokuu ja xtuu de Jesús. 11 Te nuu ni ka onini sutu ka kuu nijaꞌnu yun ja siun jiñaꞌa de, te ni ka kusii ini de, te ni ka kee yuꞌu de ja vi kuñaꞌa de xuꞌun. Yun te ni jinkondee Judas nduku de naxa kuu ja xtuu de Jesús nuu ndaꞌa sutu ka kuu nijaꞌnu yun.

12 Yun te kiuu xtnañuꞌu ja kejaꞌa viko nuu ka jaa ñayiu judio xtaa vixin uun ja tu na levadura yiꞌi, nuu ka jaꞌni lelu ja ka sokoi nuu ia Dios viko pascua, te ni ka jikan tnoꞌo ña tee ka skuaꞌa jin ya:

―¿Ndenu kuu nuu kuini ni ja vi saꞌa tuaꞌa san nuu vi kaxinio viko pascua yaꞌa? ―ka jiñaꞌa de.

13 Te ni tetniuu ya uu tee ka skuaꞌa jin ya ja kiꞌinkuei de, te jiñaꞌa ya:

―Kuaꞌankuei ni ndee maa ñuu, te yun vi jinkuꞌun tnaꞌa ni jin in tee ndiso in kiyi ndute, te vi kondikin ni de kiꞌinkuei ni. 14 Te veꞌe nuu ndiuu de yun, vi kaꞌan ni jin maa tee xiin veꞌe yun: “Kachi Mastru: ¿Ndenu oo veꞌe ja tanuu ni vi kaxini san jin tee ka skuaꞌa jin san viko pascua yaꞌa?”, vi kuñaꞌa ni. 15 Te xneꞌe maa de in veꞌe kaꞌnu ja oo ndee sukun nuu ja otuaꞌa. Te yun vi savaꞌa ni ja vi kaxinio ―jiñaꞌa ya.

16 Yun te kuaꞌankuei nduu tee ka skuaꞌa jin ya, te ni jinokuei de maa ñuu, te ni ka niꞌi de veꞌe nagua ni kaꞌan ya. Te ni ka savaꞌa de ja vi kaxini de jin ya viko pascua yun. 17 Te nuu ni kunee, te ni jino Jesús jin ndi uxi uu tee ka skuaꞌa jin ya. 18 Te nuu ka nukoo ya nuu mesa, nini ka jaxini ya, te jiñaꞌa ya:

―Kaꞌan ndaa san ja ndee in maa ni ja ka jaxini ni jin san xtuu ña ―jiñaꞌa ya.

19 Yun te ni ka jinkondee de ka kusuchi ini de, te ndi in ndi in de ka jikan tnoꞌo ña jin ya:

―¿A sein kuu? ―jiñaꞌa in de.

―¿A sein? ―jiñaꞌa inka de.

20 Te jiñaꞌa ya:

―In tee neꞌu ndi uxi uu maa ni, tee ka xtajin jin san xtaa vixin in ni nuu koꞌo, kuu de. 21 Te jandaa ja sein ja kuu san Seꞌe Teyii, chi ndoꞌo san nagua yoso nuu tutu ii, su ndaꞌu ni ka maa tee xtuu ña jin san ja kuu san Seꞌe Teyii, chi vi guaꞌa ka kuu ja ma kaku de ñuyiu yaꞌa nuu siun ―jiñaꞌa ya.

22 Te vi nini ka jaxini de jin ya, te ni tnii ya xtaa vixin, te ni ndakuantaꞌu ya nuu ia Dios, te ni taꞌu ya, te ni jiñaꞌa ya nuu tee ka skuaꞌa jin ya, te jiñaꞌa ya:

―Vi tnii ni te vi kaa ni, chi yaꞌa kuu yiki kuñu san.

23 Yun te ni tnii ya vasu nuu ñuꞌu vinu, te ni ndakuantaꞌu ya nuu ia Dios, te ni jiñaꞌa ya nuu de, te ndiꞌi de ni ka jiꞌi nuu vasu yun. 24 Te jiñaꞌa ya:

―Yaꞌa kuu niñi san ja soko san ja kokuu in tratu jaa, te kati ja jaꞌa kuaꞌa ñayiu nagua ja konekaꞌnu ini ia Dios yika kuechi. 25 Te kaꞌan ndaa san ja ma koꞌo saꞌun ka san nduxi uva yaꞌa, guaa ndee kiuu ja koꞌo san nduxi uva jaa nuu tatnuni ia Dios ―jiñaꞌa ya.

26 Te nuu ni ndiꞌi ni ka jita ya in yaa nuu ia Dios, te kuaꞌankuei ya yuku Olivo. 27 Yun te jiñaꞌa Jesús:

―Ndiꞌi ni vi ndayuꞌu ja jaꞌa tnundoꞌo kii siki san jakuaa vitna, chi saa yoso nuu tutu ii: “Xtuji rin tee jito ndikachi, te yaꞌa yun ni ka vi kutenuu ti”, kachi tutu ii. 28 Su nuu na ndateku san, te kokoxnoꞌo san konoꞌo san Galilea, te saa ndajakuei ni ―jiñaꞌa ya.

29 Yun te jiñaꞌa Pedro:

―Visi ndiꞌi de na vi ndayuꞌu, su sein, chi ma ndayuꞌu saꞌun san ―jiñaꞌa de.

30 Te jiñaꞌa Jesús:

―Kaꞌan ndaa ndija san ja jakuaa vitna, te uni jichi kaꞌan ni ja tu jini ña ni jin san, ama ka ja kana liꞌli uu jichi ―jiñaꞌa ya.

31 Su kaꞌan te kaꞌan ni Pedro, te jiñaꞌa de:

―Visi na kuu san jin ni, su ma kaꞌan san ja tu jini ña san, ―jiñaꞌa de.

Te vi suni saa ni ka kaꞌan ndiꞌi tee ka skuaꞌa jin ya.

32 Yun te ni jinokuei ya jin tee ka skuaꞌa jin ya in nuu nani Getsemaní, te jiñaꞌa ya:

―Vi jinkoo ni yaꞌa nini kiꞌin san yun na ndakuatu san ―jiñaꞌa ya.

33 Yun te ni jaka ya Pedro vi Jacobo vi Juan, te kuaꞌankuei ya jin de. Te ni jinkondee ya kusuchi ini ya vi tnaꞌu ndevaꞌa ini ya. 34 Te jiñaꞌa ya:

―Kusuchi ndevaꞌa ini san ja vi ndee na kuu san. Vi kendoo ni yaꞌa, te vi kondito ni ―jiñaꞌa ya.

35 Yun te ni jika ya joo ni jaꞌan ya, te ni jinkuiin jiti ya vi ndee ni kunjino tnee ya nuu ñuꞌu, te ni ndakuatu ya nuu ia Dios ja nuu ja suaꞌa te na kuu, te ma tnaꞌa ya tnundoꞌo ja vaji siki ya. 36 Te jiñaꞌa ya:

―Tata maa san, ndiꞌi ni ja kuu ja saꞌa maa ni, xtajioo ni tnundoꞌo ndevaꞌa ja vaji siki san. Su ma kokuu nagua kaꞌan maa san, chi na kokuu nagua kuini maa ni ―jiñaꞌa ya.

37 Te vini ni ndajiokuiin ya ni ndajino ya nuu ka oo ndi uni tee ka skuaꞌa jin ya, te ni nukuꞌun ña ya ja ka kixin de. Te jiñaꞌa ya nuu Simón Pedro:

―Simón, ¿a kixin ni? ¿A vini in ore tu ni ka kundee ini ni ja vi kondito ni? 38 Vi kondito ni, te vi kondakuatu ni nuu ia Dios, nagua ja ma koto tnuni ña Tachi ja junkuei ni nuu jakueꞌe, chi jandaa ja anu ni, chi oo tuaꞌa ja skunkuu nuu ia Dios, su yiki kuñu ni, chi vita ndevaꞌa ―jiñaꞌa ya.

39 Yun te kuaꞌan tuku ya inka jichi ja ni ndakuatu ya, te inuu ni tnoꞌo ni kaꞌan ya. 40 Te nuu ni ndajino ya inka jichi, te ni nukuꞌun ña ya ja ka kixin tuku de, chi tu ka kundee nduchi nuu de jin ñuaꞌna, te tu ka niꞌi de na tnoꞌo vi kaꞌan de nuu ya. 41 Te ni ndajino ya jichi kuu uni nuu ka oo de, te jiñaꞌa ya:

―¿A vi ka kixin ni ni vi ka ndatatu ni? Su ja ni kuu ni, chi ja ni jino ore ja vi kakuiko ña ñayiu ka saꞌa jakueꞌe jin sein ja kuu san Seꞌe Teyii. 42 Vi ndakoo ni na kiꞌon, chi ja makuyatni tee xtuu ña jin san ―jiñaꞌa ya.

43 Te vi nini kaꞌan ka ya, te ni jino ni Judas, in tee ni ka okuu uxi uu tee ka skuaꞌa jin ya, ndeka de kuaꞌa ñayiu ka nee yuchi kani vi ñayiu ka nee yutnu, ja ni ka tetniuu ña sutu ka kuu nijaꞌnu ka vi tee ka kaxtnoꞌo Ley Moisés vi tee ka kuu nijaꞌnu nuu ñuu. 44 Te ja ni kaxtnoꞌo Judas, tee ni xtuu ya, nagua kokuu in seña nuu tee yun, te jiñaꞌa de:

―Tee xiin nuu ja tetuyuꞌu san kuu tee vi kakuiko ni. Te vi kotnii guaꞌa ni de kiꞌinkuei ni, masu ja vi siaa ni de ―jiñaꞌa de.

45 Te nuu ni jino de, te ni kuyatni de nuu oo Jesús, te jiñaꞌa de:

―Oo vaꞌa ni, Mastru.

Te ni tetuyuꞌu de nuu ya. 46 Yun te ka kakuiko ña sava ka tee yun jin ya. 47 Su in tee ka oo jin ya ni keneꞌe de yuchi kani de, te ni jaꞌnde de soꞌo in tee jinokuechi nuu sutu kuu nijaꞌnu ka. 48 Yun te jiñaꞌa Jesús nuu ñayiu yun:

―¿Nau ja ka nee ni yuchi kani vi yutnu vajikuei ni ja vi kakuiko ña ni jin san na kuinio ja kuiꞌna kuu san? 49 Te in in kiuu ni ka oo in nio nuu veñuꞌu kaꞌnu ja ni okaxtnoꞌo san tnoꞌo ia Dios, te tu ni ka kakuiko ña ni. Su saa kokuu nagua ja skunkuu nuu tutu ii ―jiñaꞌa ya.

50 Yun te ni ka xndoo ña ndiꞌi tee ka skuaꞌa jin ya, te ni ka jino yuꞌu de kuaꞌankuei de.

51 Su ni jata ndikin ña in tee kuechi jin ya, ndii de in saꞌun kuijin kuaꞌan de, te ni ka kakuiko ña tee yun jin de. 52 Su ni xndoo de saꞌun de yun, te vi suaꞌa vichi tiaꞌa de, te ni jino yuꞌu de kuaꞌan de.

53 Yun te ni ka junsiaꞌa de Jesús nuu sutu kuu nijaꞌnu ka. Te yun ni ka ndututu ndiꞌi sutu ka kuu nijaꞌnu vi tee ka kuu nijaꞌnu nuu ñayiu ñuu vi tee ka kaxtnoꞌo Ley Moisés. 54 Te Pedro, chi ndikin jika ni ña de kuaꞌan de guaa ndee ini nuu oo veꞌe sutu kuu nijaꞌnu ka yun, te ni jinkoo de nuu ka nukoo ndajaꞌa ja ka ndasaa de yuꞌu ñuꞌu yun.

55 Te sutu ka kuu nijaꞌnu vi ndiꞌi tee ka netniuu nuu ka ndututu de yun, ka nduku de tee vi kaꞌan tnoꞌo siki ya, nagua ja kuu vi xtavi kuechi ña de ja kuu ya. Su tu ka niꞌi de na kuechi vi xtavi ña de. 56 Chi kuaꞌa de ka kaꞌan tnoꞌo tnoꞌo siki ya, su tu kintnaꞌa tnoꞌo ka kaꞌan de. 57 Yun te ni ka ndakoo sava de, te ni ka kaꞌan kuechi de siki ya jin tnoꞌo tnoꞌo, te ka jiñaꞌa de:

58 ―Maa san, chi ni ka onini san tnoꞌo ni kaꞌan de: “Sein chi kani san veñuꞌu yaꞌa ja ni ka saꞌa ñayiu jin ndaꞌi, te nuu uni kiuu, te ndasaꞌa san inka veñuꞌu ja masu ka saꞌa ñayiu jin ndaꞌi”, kachi de ―ka jiñaꞌa de.

59 Su visi ni saa, te tu kintnaꞌa tnoꞌo ja ka kaꞌan de siki ya. 60 Yun te ni ndakoo sutu kuu nijaꞌnu ka maꞌñu ndiꞌi ñayiu yun, te ni jikan tnoꞌo de Jesús:

―¿Nau ja vi tu kaꞌan saꞌun ron ja ka kaꞌan tee yaꞌa siki ron? ―jiñaꞌa de.

61 Su Jesús, chi ni jasi yuꞌu ya, te tu ni ndajioneꞌe saꞌun ya ni in tnoꞌo. Yun te ni jikan tnoꞌo tuku ña sutu kuu nijaꞌnu ka yun, te jiñaꞌa de:

―¿A suu ron kuu Kristu vi Seꞌe Dios, ia vii ia vaꞌa? ―jiñaꞌa de.

62 Te jiñaꞌa Jesús:

―Suu san kuu. Te vi kuni ni Seꞌe Teyii ja konukoo ichi ndaꞌa kuaꞌa maa ia Dios jin jakaꞌnu ya, te ndii ndee nuu viko ichi andivi ―jiñaꞌa ya.

63 Yun te ni ndata sutu kuu nijaꞌnu ka yun saꞌun de ja kuu in seña ja kiti ini de, te jiñaꞌa de:

―Tu ka jiniuꞌu kao testiu ja vi kaꞌan kuechi siki de. 64 Chi ja ka onini maa ni ja kaneꞌe de jin Dios. ¿Te naxa ka kaꞌan tna ni? ―jiñaꞌa de.

Te ndiꞌi de ni ka kaꞌan:

―Na kuu de.

65 Te ni ka jinkondee sava de ka tiusii ña de, vi ni ka jasi de nuu ya, te ni ka kani de ya jiki, te ka jiñaꞌa de:

―Kaꞌan na in ni kani ña jin ron, ―ka jiñaꞌa de.

Te ka katu ndajaꞌa yun tikatu nuu ya.

66 Te Pedro, chi oo de ndee ndiꞌi nuu oo veꞌe yun. Te ni jino in ñaꞌa satniuu veꞌe sutu kuu nijaꞌnu ka. 67 Te nuu ni jini ña ja oo Pedro yuꞌu ñuꞌu yun ndasaa de, te ni ndiaꞌa guaguaꞌa ña nuu de, te jiñaꞌa ña:

―Maa ni, chi suni ni ka oo ni jin Jesús, tee ñuu Nazaret ―jiñaꞌa ña.

68 Su ni tayuꞌu tnoꞌo Pedro, te jiñaꞌa de:

―Tu jini san ndee tee kuu de, te ni tu jini san na tnoꞌo kaꞌan ni ―jiñaꞌa de.

Te ni ndee de yeꞌe yun, te ni kana ni in liꞌli. 69 Te jini tuku ña ñaꞌa satniuu yun ja oo de yun, te ni jinkondee ña kaꞌan ña jin ñayiu ka oo yun:

―Tee yaꞌa, chi suni tee ni ka oo jin tee yun kuu de ―jiñaꞌa ña.

70 Su ni tayuꞌu tnoꞌo tuku de inka jichi. Te nunuu ka, te ka jiñaꞌa tuku ñayiu ka oo yun nuu Pedro:

―Vi jandaa ndija ja suni tee ka oo jin tee yun kuu ni, chi tee ñuu Galilea kuu ni, te tnoꞌo kaꞌan ni, chi inuu ka kaꞌan ni jin de ―ka jiñaꞌi.

71 Yun te ni jinkondee de xtau tniaꞌa de maa de, te ni kee yuꞌu de, te jiñaꞌa de:

―Tu jini saꞌun san tee yun ndee tee kuu ja ka kaꞌan ni ―jiñaꞌa de.

72 Te vi ore saa ni kana liꞌli jichi kuu uu. Yun te ni ndakankaꞌan Pedro tnoꞌo ni kaꞌan Jesús: “Ama ka ja kana liꞌli uu jichi, te tayuꞌu tnoꞌo ni uni jichi ja tu jini ña ni”.

Te nuu ni ndakani ini de tnoꞌo yun, te ni kana ndaꞌi de, te ni jaku ndevaꞌa de.