4
Tnoꞌo ndichi ja xteku ña
Vi konini tnoꞌo ja xteku ña tata ron jin ron, vi seꞌe,
te vi tanuu tnoꞌo kaꞌan rin, nagua ja vi jinkuiꞌnu ini ron.
Chi tnoꞌo guaꞌa kaxtnoꞌo rin,
te yun guaa ma vi xndendoo ron tnoꞌo ja kaꞌan rin nuu ron.
Chi suni in chiluluu ni okuu rin nuu tata rin,
te invaa maa rin ni okutoo ndevaꞌa nana rin.
Te ni okaxtnoꞌo tata rin nuu rin, te ni okachi de:
“Tnaa tnoꞌo kaꞌan rin ini anu ron,
te kuantnoꞌo tnoꞌo tatnuni rin, saa te koteku ron.
Nduku tnoꞌo ndichi, vi nduku ja jinkuiꞌnu ini ron,
te ma ndunaa ini ron tnoꞌo kaꞌan rin, te ni ma kujioo ron.
Ma xndendoo saꞌun ron tnoꞌo ndichi, te koto kuni ña jin ron.
Kokutoo, te tavaꞌa ña jin ron.
Te ja kanuu ka kuu tnoꞌo ndichi, te nduku tnoꞌo ndichi yun.
Te jin ndiꞌi ja niꞌi ron ja konevaꞌa ron, nduku ja jinkuiꞌnu guaꞌa ini ron.
Kokutoo tnoꞌo ndichi, te saꞌa kaꞌnu ña jin ron.
Kanu niꞌnu, te na saꞌa ja koo jayiñuꞌu nuu ron.
Chi tnaa in ja vii ndevaꞌa ja ndukutu xini ron,
te taa in ja ni ndukutu vii ndevaꞌa nuu ron”, ni okachi de.
 
10 Konini tnoꞌo kaꞌan rin, vi seꞌe, te kuantaꞌu,
nagua ja na kaya kuaꞌa kuia ja koteku ron ñuyiu.
11 Chi nuu ichi tnoꞌo ndichi ni janu ichi ña rin,
te ni jani ña rin ja kaka ron nuu ichi ndaa.
12 Te tu nagua kosaꞌa tneñu nuu ichi jika ron,
te ni tu nagua kachi jaꞌa ron nuu jino ron.
13 Kakuiko guaꞌa tnoꞌo ja ni kaꞌan rin nuu ron, te ma siaa ron.
Tavaꞌa guaꞌa, chi yun kuu ja teku ron.
14 Te ma kiꞌin ron nuu ichi ka jika ñayiu kueꞌe,
te ni ma kondikin ron ichi ka jika ñayiu kueꞌe ndevaꞌa yun.
15 Xndendoo, ma yaꞌa ron nuu ichi yun.
Kujioo nuu ichi yun, te kuaꞌan.
16 Chi tu ka kixin ñayiu kueꞌe yun nuu ja tu na jakueꞌe ka saꞌi.
Te ndee ka skunai ñuaꞌna kusuin nuu ja tu ka niꞌi ja na in junkuei nuu ndaꞌi.
17 Chi xtaa ka jai kuu jakueꞌe ka saꞌi yun,
te vinu ja ka jiꞌi kuu ja ka kindee ndevaꞌi.
 
18 Te ichi ka jika ñayiu ka saꞌa ndaa kuu na kuinio nuu yeꞌe kuaan kuaan ja jinonta nikandii,
te vi saa vi saa kuaꞌan yeꞌe guaa ndee jinkonaꞌa maa ja in kiuu kuu.
19 Su ichi ka jika ñayiu ka saꞌa jakueꞌe kuu na kuinio ñunee,
te ni tu ka jini nagua ka kachi jaꞌi.
 
20 Tanuu tnoꞌo kaꞌan rin, vi seꞌe,
te konini tnoꞌo ja xteku ña rin.
21 Te ma saꞌu nuu ron tnoꞌo kaꞌan rin,
chi tavaꞌa ndee ini ndee anu ron.
22 Chi suu jiñaꞌa ja ka teku ñayiu ka ndaniꞌi,
vi tatna guaꞌa kuu nuu ndiꞌi yiki kuñui.
23 Te siki ndiꞌi ndatniuu ja ni tavaꞌa ron, koto vaꞌa anu ron,
chi ndee anu ron kana ja teku ron.
24 Xtajioo tnoꞌo kueꞌe ja ma kaꞌan yuꞌu ron,
vi saꞌa siin tnoꞌo tnoꞌo ja ma kaꞌan ñii yuꞌu ron.
25 Kondiaꞌa ichi nuu ron,
te kinuu nagua oo ichi nuu kuaꞌan ron.
26 Kondiaꞌa guaꞌa ichi chindaa nuu jika ron,
te ndiꞌi ichi jika ron na kokuu ichi ndaa.
27 Te ma chixiin ron ni ichi kuaꞌa ni ichi satni,
te kujioo nuu jakueꞌe.