1 Yaꞌa kuu tnoꞌo jaꞌvi ja ni kaꞌan Salomón:

Seꞌe ndichi, chi jiñaꞌi jasii ini nuu tatai,

su seꞌe vasa jiñaꞌi tnoꞌo suchi ini nuu nanai.

2 Ja kuika nevaꞌa ñayiu jin tniuu kueꞌe ja saꞌi,

chi tu nagua jiniuꞌu nui.

Su tniuu ndaa ja saꞌa ñayiu,

skaku niꞌnu ña jin ja ma kui.

3 Ma kuandetu Jitoꞌo ja vi tnaꞌa ñayiu ndaa tnundoꞌo soko,

te tu jandetu ya ja vi niꞌi ñayiu kueꞌe nagua ka ndioo ini.

4 Na ñayiu kuu kuꞌndu ja satniui, te kuu ndaꞌui.

Su na ñayiu kuyu ja satniui, te kuu kuikai.

5 Te ñayiu ndaxtutu ja kee nuu ñundeꞌi yoo kei, kui ñayiu ndichi.

Su ñayiu kixin yoo kei yun, kui ñayiu ña kanoo.

6 Vii ndevaꞌa chindee chituu ña ia Dios jin ñayiu ndaa.

Su ñayiu kueꞌe, chi tayuꞌu tnoꞌi tniuu xeen ndevaꞌa ja saꞌi.

7 Ja ka ndakaꞌan ña jin ñayiu ndaa kuu in javii javaꞌa.

Su ja teku tnoꞌo ñayiu kueꞌe, chi ñama ka naa ini.

8 Jantaꞌu ñayiu ndichi ini anu tnoꞌo ja ka tatnuni nui.

Su ñayiu vasa ja nani guaa kaꞌan, chi kuaꞌin ja nai.

9 Te ñayiu ndaa, chi tu nagua yuꞌi.

Su na ñayiu jika ichi kueꞌe, te ndatui jin jakueꞌe saꞌi.

10 Te na ñayiu ndakuene jin nduchi nui, te ndukui tnoꞌo suchi ini.

Te ñayiu vasa ja nani guaa kaꞌan, chi kuaꞌin ja nai.

11 Tnoꞌo kaꞌan ñayiu ndaa kuu ja taa ja kotekuo.

Su ñayiu kueꞌe, chi tayuꞌu tnoꞌi tniuu xeen ndevaꞌa ja saꞌi.

12 Ja ka kaꞌan uꞌu tnaꞌa ñayiu saꞌa ja ka jaxin tnaꞌi.

Su ja ka kaꞌan too tnaꞌa ñayiu saꞌa ja ka jakaꞌnu ini ndiꞌi jakueꞌe ni ka saꞌa ña jin.

13 Yuꞌu ñayiu jinkuiꞌnu ini oo tnoꞌo ndichi.

Te yata ñayiu vasa jino in karroti.

14 Ka tavaꞌa ñayiu ndichi tnoꞌo ja ni ka jinkuiꞌnu ini.

Su tnoꞌo kaꞌan ñayiu vasa kuu ja saꞌa ja oo yatni ja nai.

15 Te jakuika ja nevaꞌa ñayiu kuika kuu ja ndesi guaꞌa ñui.

Te ja skunaa ña jin ñayiu ndaꞌu kuu ja kundaꞌui.

16 Yaꞌu ja niꞌi ñayiu ndaa kuu ja kotekui.

Su ja niꞌi ñayiu kueꞌe kuu ja tniuyaꞌui yika kuechi.

17 Na in tavaꞌa tnoꞌo ja xteku ña jin, te kuaꞌin ichi ja kotekui.

Su ñayiu skexiko ja ka ndakanu ichi ndaa ña jin, te ndoñuꞌi.

18 Ñayiu tnoꞌo, chi tayuꞌu tnoꞌi ja kaꞌan uꞌui inka ñayiu.

Te ñayiu kaꞌan siki inka ñayiu kui in ñayiu vasa.

19 Nuu kaꞌan ñayiu kuakuaꞌa tnoꞌo, te kuaꞌa tnoꞌo kueꞌe kaꞌin.

Su ñayiu jaꞌnu niꞌnu tnoꞌo kaꞌin kuu ñayiu ndichi.

20 Kaa vii ndevaꞌa ja kuu plata kuu tnoꞌo kaꞌan ñayiu ndaa.

Su anu ñayiu kueꞌe, chi tu nagua jiniuꞌu saꞌun.

21 Tnoꞌo ja kaꞌan ñayiu ndaa kuu tnoꞌo ndee ini ja ndakuñaꞌi nuu kuaꞌa ñayiu.

Su ñayiu vasa ka jiꞌi mai, chi tu ka jinkuiꞌnu ini.

22 Javii javaꞌa ja taa Jitoꞌo kuu ja saꞌa kuika ña,

te tu tetniuu ya jin tnoꞌo suchi ini.

23 Ñayiu vasa, chi kusii ini nuu saꞌi jakueꞌe.

Su ñayiu ndichi, chi kusii ini jin ja jinkuiꞌnu ini.

24 Nagua yuꞌu maa ñayiu kueꞌe yun, te yun kii siki.

Su ñayiu ndaa, chi vi niꞌi nagua ka ndioo ini.

25 Nagua yaꞌa in tikacha, saa vi naa ñayiu kueꞌe.

Su ñayiu ndaa, chi vi koyutnu nikuii nikani.

26 Ñayiu kuꞌndu, chi kui na kuinio vinagre ja kunjino nuu noꞌo

axi na kuinio ñuaꞌa ja jatu nuu tee tetniuu ña jin.

27 Ja yuꞌu niꞌnuo Jitoꞌo ndaskaya kuaꞌa ka kiuu ja kotekuo.

Su kindee kuia ja vi koteku ñayiu kueꞌe.

28 Ja ka ndetu kaꞌnu ñayiu ndaa kuu ja vi kokuu sii ini.

Su ja ka ndetu kaꞌnu ñayiu kueꞌe, chi ma kenta ja vi niꞌi.

29 Maa Jitoꞌo jito jini ña jin ñayiu ka saꞌa ndaa ja ka jika ichi ya.

Su xnaa ña ya jin ñayiu ka saꞌa jakueꞌe.

30 Ñayiu ndaa, chi ma vi xtajioo saꞌun ña jin.

Su ñayiu kueꞌe, chi ma vi koi nuu ñuꞌu ya.

31 Ñayiu ndaa, chi kaꞌin ninoꞌo tnoꞌo ndichi.

Su ma kuandetu ia Dios ja kaꞌan ñayiu kueꞌe.

32 Ñayiu ndaa, chi jini kaꞌin tnoꞌo ja junkuaan inio.

Su ñayiu kueꞌe, chi maa ni tnoꞌo kueꞌe kaꞌin.