1 Guaꞌa ka kuu ja kao in xtaa yichi, su ka osii inio,

masu ja kosaꞌo kuaꞌa viko nuu veꞌo, te koskiti tnaꞌo.

2 Tee ndichi ja jinokuechi, chi kotatnuni de nuu seꞌe ja tu jini jakanoo,

te vi ndakaꞌnde de ja ni ka saꞌa jajin de jin sava ka ñani, tee tu jini jakanoo yun.

3 In nuu tijaꞌan ka xtuaꞌa plata ja ka jito tnuni, te in nuu jitnu ka xtuaꞌa oro ja ka jito tnuni.

Su anu ñayiu, chi maa Jitoꞌo guaa jito tnuni.

4 Ñayiu kueꞌe vi ñayiu tnoꞌo, chi ka nini tnoꞌo ja ka kaꞌan sava ka ñayiu kueꞌe yun.

5 Ñayiu jaku ndee ña jin ñayiu kundaꞌu, chi kaneꞌi jin ia ni saꞌa ña jin.

Te ñayiu kusii ini nuu tnaꞌa inka ñayiu tnundoꞌo, te ma kakui, chi tniuyaꞌui jin ja saꞌi yun.

6 Ja ka ndukutu jin ñayiu nijaꞌnu ka kuu señani,

te jayiñuꞌu ja ka oo nuu seꞌe kuu tatai.

7 Ñayiu vasa, chi masu vatuka kuu ja kaꞌin tnoꞌo guaꞌa.

Su tee tatnuni, chi masu vatuka kuu ja kaꞌan de tnoꞌo tnoꞌo.

8 Xuꞌun ja kutaꞌu yuꞌu ñayiu kuu na kuinio in yuu vii ja jantniui ja saꞌi tniuu tasi,

te jin yun kee guaꞌi jin ndiꞌi ni ja saꞌi.

9 Ñayiu jakaꞌnu ini jakueꞌe saꞌa inka ñayiu, chi ndukui ja vi koo vaꞌi jin ñayiu yun.

Su ñayiu jatenuu jakueꞌe yun, chi saꞌa siin ñayiu ndeka tnaꞌa guaꞌa ka jin.

10 Chituu ka ña jin ñayiu jinkuiꞌnu ini nuu ka kuxeen nui,

saa ñayiu vasa nuu ka kani ña yoꞌo jin in ciento jichi.

11 Te tee kueꞌe, chi maa ni nduku de ja ndakoo de siki tee netniuu.

Su vi tetniuu siki de in tee xeen ndevaꞌa ja ndakani tnoꞌo ja saꞌa ña jakueꞌe jin de.

12 Vi guaꞌa ka kuu ja jinkuntnaꞌo jin in osa xeen ja ni ka suꞌu seꞌe ti,

masu ja jinkuntnaꞌo jin tee vasa ja tu jini nagua saꞌa.

13 Ni tu kujioo jakueꞌe siki ñayiu veꞌe tee ndajioneꞌe jakueꞌe nuu tniuu javaꞌa.

14 Ñayiu skejaꞌa tnoꞌo kiti ini kui na kuinio in ñayiu ja ni siaa ndute nuu ñuꞌu kuaꞌa ndevaꞌa de,

te guaꞌa ka kuu ja kujioo ni ama ka ja kejaꞌa ja kiti ini.

15 Tee netniuu ja kaꞌan ja tu na kuechi tavi ñayiu kueꞌe yun, vi ñayiu kaꞌan kuechi siki ñayiu ndaa,

ndi nduu ñayiu yaꞌa inuu ni skexiko ña Jitoꞌo.

16 Tu nagua jiniuꞌu ja nee tee vasa xuꞌun ja kiꞌin de tnoꞌo ndichi

nuu ja tu jinkuiꞌnu ini de.

17 In ñayiu ndeka tnaꞌa guaꞌa jin ni, chi siun ni kaꞌan vaꞌa ñai,

te chituu ña ñayiu yun na kuinio in ñani ni nuu tnaꞌa ni tnundoꞌo.

18 In ñayiu tu ndakani guaꞌa ini nagua saꞌa,

chi kiundui ja kaꞌan niꞌnui ja jaꞌa tnaꞌi ja kinui xuꞌun kuantniuu ñayiu yun.

19 Na in junkuaan ini ja saꞌi jakueꞌe, te jinkuaan ini ja kaxin tnaꞌi.

Te na in june ndevaꞌa yuꞌi ja kaꞌin, te skunai mai.

20 Ñayiu nevaꞌa anu kueꞌe, chi ma niꞌi saꞌuin javaꞌa,

te ñayiu kaꞌan tnoꞌo tnoꞌo, chi kanakau mai nuu jakueꞌe.

21 Ñayiu nevaꞌa in seꞌe vasa, te maa ni tnoꞌo suchi ini tnaꞌi,

te tata in suchi vasa, chi tu na tnoꞌo sii ini oo jin de.

22 Anu ja osii ini, chi in tatna guaꞌa kuu,

su anu ja kusuchi ini, chi saꞌa ja yichi yiki kuñu.

23 Ñayiu kueꞌe, chi jantaꞌui ja ka skutaꞌu yuꞌu ña ñayiu,

nagua ja ma saꞌa ndai nuu jaꞌndei kuechi.

24 Ñayiu jinkuiꞌnu ini, chi ninoꞌo ni tnoꞌo ndichi ndukui.

Su ñayiu vasa, chi yaꞌa yun ni ja ndakani ini.

25 Seꞌe vasa, chi tnaꞌu ini tatai ja jaꞌi,

vi kusuchi ini nanai ja jaꞌi.

26 Jandaa ndija ja masu vatuka kuu ja xtavi kuechio ñayiu ndaa,

ni ja kanio ñayiu guaꞌa ja ka saꞌa ndai.

27 Ñayiu ndichi, chi jaꞌnu niꞌnui tnoꞌo kaꞌin,

te ñayiu jinkuiꞌnu ini, chi jandee ni ini.

28 Te vi ndee ñayiu vasa ka kaꞌan ja ñayiu ndichi ka kui nuu jasi yuꞌi,

te suni ka kaꞌan ja ñayiu jinkuiꞌnu ini kui nuu tu kaꞌin.