1 Vinu, chi saꞌa ja janeꞌe jayichi ni saꞌa ñayiu,

te texeen, chi skuiko ini ña, te ka kuvaa ñayiu,

te nani kuu ñayiu ja ka jini jin ndixi yun,

te masu ñayiu ndichi ka kui.

2 Te ja kiti ini rey kuu na kuinio nuu kañu xeen ndikaꞌa,

te na in skiti ini ña jin de, te xtavi kuechi mai.

3 Oo jayiñuꞌu nuu ñayiu jaꞌnu niꞌnu mai ja vi tee tnaꞌi.

Su ñayiu vasa, chi mai skejaꞌa ja kiti ini.

4 Nuu kenta yoo ja nduvaꞌa ñuꞌu, te ñayiu kuꞌndu, chi tu ndataꞌui ñundeꞌi.

Su nuu kenta yoo ja ndututu, te kiꞌin ja ndaxtutui, su tu nagua ndaniꞌi saꞌuin.

5 Tnoꞌo ja xteku ña ja oo ini anu ñayiu, te kuu na kuinio ndute ja ñuꞌu kunu de.

Su ñayiu jinkuiꞌnu ini, chi niꞌi tnoꞌo yun.

6 Kuaꞌa ñayiu ka kuu vixin ja ñayiu ndaa ka kui.

Su tu na ñayiu niꞌi in ñayiu ndaa ndija.

7 Ñayiu ndaa, chi jikai ichi ndaa,

te na taꞌu na ndetu seꞌi ja ka ndikin ichi jikai yun.

8 Nuu jinkoo rey nuu mesa ja jaꞌnde de kuechi,

te invaa ni ndakondiaꞌa de, te skunu de ndiꞌi jakueꞌe.

9 Te tu na in kuu kachi: “Ja ni ndasavii san anu san,

te ja ni nduvii san nuu yika kuechi san”.

10 Nuu tu chikuaꞌa ndaa ñayiu vi nuu tu jiñaꞌa ndai,

vi ndi nduu kuu ja skexiko Jitoꞌo.

11 Te vi ndee ja saꞌa in suchi kueli xneꞌe kaji na suchi kui,

a saꞌa vii saꞌa vaꞌi.

12 Soꞌo ja nini vi nduchi nuu ja ndiaꞌa,

ndi nduu ni saꞌa maa Jitoꞌo.

13 Ma kokutoo ni ja kusun ni, nagua ja ma kokuu ndaꞌu ni,

kondito ni, te konevaꞌa kuaꞌa ni xtaa kokaa ni.

14 “Kueꞌe ndevaꞌa ndatniuu kuu”, kachi tee jaan ndatniuu yun.

Su nuu ni yaꞌa de kuaꞌan de, te kuu teyii de jin ja ni jaan de yun.

15 Yaꞌu ka ndee tnoꞌo ndichi ja kaꞌan ñayiu,

saa oro vi kuaꞌa yuu vii ndevaꞌa.

16 Vi kindee ni saꞌun ñayiu tau yika ja jaꞌa ñayiu inka ñuu,

te na kava ndee saꞌuin, nagua ja kuu vi kuñaꞌa ni nuu ñayiu ja tu ka jini ni.

17 Asin ndevaꞌa ka jaa xtaa niꞌi ñayiu nuu xndaꞌui inka ñayiu.

Su sandiꞌi, te saꞌa kueꞌe ña jin mai, chi na kuinio ja ninoꞌo ni ka ñuꞌu jai.

18 Nduku ni ja vi xteku ña jin ni, nagua ja kuu saꞌa ni jin nagua ndakani ini ni,

te chikuaꞌa guaꞌa ni naxa kasi ni nuu vi kaxin tnaꞌa ni.

19 Ñayiu jika jin kuentu, chi ndaxtui taka ja oyuꞌu,

te yun kuu ja ma vi nitnaꞌa ni jin ñayiu inu kuentu ini yun.

20 Ñayiu ja xtau tniaꞌa tatai axi nanai,

chi ndaꞌvai in nuu nee ndevaꞌa.

21 Nuu ja ñama niꞌi ñayiu ndee jaxtnañuꞌu ja kuu kuikai,

te sandiꞌi, te ma koo vii koo vaꞌa jin.

22 Ni in kiuu ma kachi ni: “Na ndaxtenaa san ñayiu ni saꞌa ña jakueꞌe jin san”,

chi kondetu kaꞌnu ni Jitoꞌo, te maa ya skaku niꞌnu ña jin ni.

23 Skexiko Jitoꞌo ja tu yikuaꞌa ndaa,

te masu guaꞌa kuu ja ma chikuaꞌa ndao, te koxndaꞌuo ñayiu.

24 Maa Jitoꞌo ndeka in in pasu ja ka skaa ñayiu nuu ka jikai,

¿te naxa kuu kuni ñayiu ichi jikai?

25 In ja skanakau ña jin ñayiu kuu ja tu ndakani guaꞌa ini,

te kee yuꞌi nuu ia Dios ja sokoi nuu ya,

te nuu kuee ka, te ndachikuaꞌi tnoꞌo ni kaꞌin yun.

26 Rey ndichi, chi skunta ña de jin ñayiu kueꞌe ndevaꞌa,

te kaxin yuu ña de jin yoso molinu.

27 Anu ñayiu kuu lámpara maa Jitoꞌo ja sieꞌe nii ini anu ñayiu,

te jini ya naxa oo.

28 Jin tniuu guaꞌa vi ja saꞌa ndaa rey tavaꞌa ña jin de,

te jin ja ndaꞌu ini de oo yutnu nuu tatnuni de.

29 Nuu jandakui suchi kuechi oo tnoꞌo sii ini,

te nuu vixi ñayiu nijaꞌnu oo jayiñuꞌu.

30 Ja ka kuun ka kani ña jin ñayiu kueꞌe, te ka xtuji ña, kuu na kuinio in tatna ja xtajioo ndiꞌi jakueꞌe.

Te yoꞌo ja ka kani ña yun ndasavii ndee ini ndee anu ñayiu yun.