1 Masu guaꞌa kuu ja kuun yuaꞌa yoo iꞌni,

te ni ja kuun sau yoo ka ndaxtutu ñayiu ja kee nuu ñundeꞌi.

Te suni saa masu guaꞌa kuu ja koo jayiñuꞌu nuu tee vasa.

2 Na kuinio tixiko ja tu jini ti ndenu kiꞌin ti nuu ndagua ti,

axi na kuinio tisala yaꞌa ja tu na taka ti,

saa kuu jin tniaꞌa, chi ma kenta nuu ja tu na kuechi tavi ñayiu.

3 Na vi kanio kuai jin yoꞌo kuiñi, te na vi junkanio mentu jin yoꞌo yuꞌu ti,

te suni na vi kanio yata ñayiu vasa jin xtnuu xii.

4 Ma ndakaꞌan ron tnoꞌo ja tu jiniuꞌu nuu ñayiu vasa,

nagua ja ma kokuu inuu ron jin ñayiu vasa yun.

5 Ndakaꞌan nuu ñayiu vasa naxa kuini ja kaꞌan ron nui,

nagua ja ma kokuu teyii ja ñayiu ndichi kuu mai.

6 Te na kuinio ñayiu jaꞌnde siꞌin, te tnaꞌa mai tnundoꞌo jin jakueꞌe yun,

saa kuu in ñayiu tetniuu in tnoꞌo nuu ndaꞌa in tee vasa.

7 Te na kuinio siꞌin tee yakua ja tu jiniuꞌu ja kaka de,

saa tu jiniuꞌu tnoꞌo jaꞌvi ja kaꞌan ñayiu vasa.

8 Tu nagua jiniuꞌu ja tnaa ñayiu yuu nuu yoꞌo yuu nuu ja ni juꞌni yuu yun.

Te suni tu jiniuꞌu ja vi konee yiñuꞌu ñayiu nuu in ñayiu vasa.

9 Na kuinio iñu ja ni kiuu ndaꞌa in tee jini, te tu jini de ja uꞌu,

saa kuu jin tnoꞌo jaꞌvi ja kaꞌan ñayiu vasa, chi tu jinkuiꞌnu ini mai na tnoꞌo kaꞌin.

10 Na kuinio tee tiuu jin kuji ja xtuji de ndiꞌi ni ñayiu ka yaꞌa yun,

saa kuu jin tee ni jiñaꞌa tniuu saꞌa ñayiu vasa ja kosatniui veꞌe de.

11 Te na kuinio tiꞌina ja ndajiokuiin ti ndakaa ti ja ni ndujan ti,

saa kuu jin ñayiu vasa ja ndajiokuiin saꞌi ja tu jiniuꞌu.

12 ¿A jini ron in tee ja kaꞌan de ja tee ndichi kuu maa de?

Te guaꞌa ka kuu ja kukanu inio in tee vasa, masu tee kaꞌan ja tee ndichi kuu de.

13 Te ñayiu kuꞌndu, chi kachi: “Ma kuu kiꞌin san satniuu san vitna,

chi nuu ichi yun oo in ndikaꞌa, te kaa ña ti”.

14 Te nagua jiko xtnuu yeꞌe nuu kaa ja tnii ña jin tnu,

saa jiko ñayiu kuꞌndu, te ndajiokuiin nuu jitoi.

15 Ñayiu kuꞌndu, chi skendaꞌi nuu koꞌo, su kuitai,

te tu tnai yuꞌi ja kai.

16 Ñayiu kuꞌndu, chi ndakani ini mai ja ñayiu ndichi ka kui,

saa uja ñayiu ka jini vi kaꞌan guaꞌa.

17 Nuu kiunduu ñayiu nuu oo ja kiti ini inka ñayiu,

kuu na kuinio ja kakuikoi in tiꞌina jin soꞌo ti.

18 Na kuinio ñayiu ndukueꞌe ja tiuu jin kuji,

te skuntai yutnu ndugua ja kai koko koko ñuꞌu, te jaꞌni ñayiu,

19 saa kuu jin ñayiu xndaꞌu ñayiu ndeka tnaꞌa guaꞌa jin,

te jiñaꞌi: “Nani tnoꞌo siki kaꞌan san”.

20 Nuu tu na tutnu kai, te ndaꞌva ñuꞌu,

te nuu tu na ñayiu jika jin kuentu, te tu na ñayiu vi kotee tnaꞌa.

21 Jin tikayi koko ñuꞌu, te jin tutnu jikin ñuꞌu,

te jin ñayiu jika jin jakiti ini kuu ja skuikin ñuꞌu ja ka tee tnaꞌa ñayiu.

22 Tnoꞌo ja kaꞌan ñayiu jika jin kuentu kuu na kuinio in javixin,

te kunjino ndee kunu kunu ini anu ñayiu.

23 Te na kuinio in kisi ñuꞌu ja ni ka joso jin plata,

saa kuu jin tnoꞌo luu ndevaꞌa ja kaꞌan ñayiu ndakani kueꞌe ini.

24 Ñayiu kaꞌan uꞌu ña, chi tu xtui mai nuu kaꞌin,

su ndee ini anui, chi ndakani kueꞌe ini.

25 Te ma kandija ron nuu kaꞌan vaꞌa ndevaꞌi,

chi ñuꞌu chitu jakueꞌe ini anui.

26 Te visi tu xtui mai ja kaꞌan uꞌu ñai,

su ndatuu jakueꞌe saꞌi yun nuu ka ndututu ñayiu.

27 Na in jate in yau ja kanakau inka ñayiu,

te yun nanakau mai.

Te na in skiotuu in kava ja xtuji inka ñayiu,

te siki mai nanakau kava yun.

28 Ñayiu kaꞌan tnoꞌo tnoꞌo, chi kaꞌan uꞌui inka ñayiu.

Te ñayiu kaꞌan luu ndevaꞌa ja xndaꞌui inka ñayiu, chi saꞌi ja kanakau ñayiu yun nuu jakueꞌe.