1 Konini ni joo tnoꞌo kaꞌan san nuu jikantaꞌu san nuu ni, vi Dios,

chi maa ni kaꞌan niꞌnu ja jaꞌa san,

te maa ni ndasaꞌa sii ini ña nuu kusuchi ini san.

Kaꞌan ndaꞌu kaꞌan kee ña ni, te konini ni joo nuu ndakuatu san.

2 Te maa ni ja ka kuu ni tee ka kuu nijaꞌnu,

¿Nasaa ka kiuu guaa vi kotaa ni ja kanoo san nuu tniuu jayiñuꞌu?

Chi ka kutoo ni ja tu jiniuꞌu,

te ka nduku ni ninoꞌo ni ja vi kaꞌan tnoꞌo ni.

3 Vi kuni ni ja Jitoꞌo, chi junkuaan ini ya jin ñayiu ndaa,

te yun guaa nini ya nuu jikantaꞌu san nuu ya.

4 Nuu ja vi ka kisi ni ja ka kiti ini ni,

su ma vi saꞌa ni yika kuechi.

Te nuu ka nduei ni nuu jito ni, te vi kasi yuꞌu ni,

te vi ndakani ini ni nagua kuu ja saꞌa kueꞌe ña jin ni.

5 Vi soko ni nuu Jitoꞌo jin in anu ndaa ni,

te vi kukanu ini ni ya.

6 Chi kuaꞌa ñayiu ka kaꞌan: “¿Na in kuu ja xneꞌe in jaguaꞌa nuo?”

Kaꞌan ndaꞌu kaꞌan kee ña ni jin in in san, vi Jitoꞌo san.

7 Maa ni saꞌa ja kusii ndevaꞌa ini san, vi Jitoꞌo san,

te kusii ini ka san saa ñayiu ka niꞌi kuaꞌa triu vi vinu.

8 Jinkotuu san jin tnoꞌo mani, te saa kixin san,

chi maintnoꞌo maa ni, vi Jitoꞌo, taa tnoꞌo kanu ini.