1 Ma kuxeen ni nuu san jin ja kiti ini ni, vi Jitoꞌo san,

ni ma tetniuu ni tnundoꞌo siki san jin ja kiti ini ndevaꞌa ni.

2 Kundaꞌu ini ña ni jin san, vi Jitoꞌo san, chi kuꞌu san.

Ndasaꞌa ña ni jin san, vi Jitoꞌo san, chi vi suaꞌa niꞌi ninii yiki kuñu san ja jatu san.

3 Yuꞌu ndevaꞌa san, vi Jitoꞌo san,

¿te na kiuu saa ndasaꞌa ña ni?

4 Ndajiokuiin ni, vi Jitoꞌo san, te skaku niꞌnu ni anu san.

Skaku niꞌnu ña ni jin san jin jandaꞌu ini ni.

5 Chi ñayiu ni ka jiꞌi, tu na in kondakaꞌan ka ña jin ni,

te ñuu jiꞌi, tu na in kosaꞌa kaꞌnu ka ña jin ni.

6 Ja ni kuita san ja ndaꞌi san, te vi suaꞌa tnana ndaꞌu ni ka san,

chi ndiꞌi ni jakuaa ndaꞌi san, te xtajin san jito nuu kixin san jin tenuu san.

7 Ja ni kuita nduchi nuu san jin tnoꞌo suchi ini ja tnaꞌa san,

te ja mandesi nuu san ja jaꞌa ñayiu ka kaꞌan uꞌu ña jin san.

8 Vi kujioo ni nuu san, ndiꞌi ni ja ka saꞌa ni jakueꞌe,

chi ja ni onini Jitoꞌo ja ndaꞌi kana san nuu ya.

9 Ja ni onini Jitoꞌo ja jikantaꞌu san nuu ya,

te ni jantaꞌu ya tnoꞌo kaꞌan san ja ndakuatu san nuu ya.

10 Te ndiꞌi ñayiu ka kaꞌan uꞌu ña jin san vi kukanoi,

te vi suaꞌa ka niꞌi ja ka yuꞌu ndevaꞌi,

chi vi sanaa ni vi ndukanoi, te vi ndakaka yatai ja ma vi saꞌa ñai jakueꞌe.