1 Maa ni, vi Jitoꞌo Dios,

nase vivii kaꞌnu kuu ni nuu ndiꞌi ñuyiu yaꞌa,

te vii ndevaꞌa yeꞌe tajan ni ndee andivi.

2 Te vi ndee yuꞌu suchi kueli vi suchi ka jaxin

ni savaꞌa ni ja vi katai yaa nuu ni,

ja jaꞌa ñayiu ka kaꞌan uꞌu ña jin ni,

nagua ja saa, te vi skasi yuꞌu ñai

jin ñayiu ka kaꞌan uꞌu ña

vi ñayiu ka ndakoo siki ni.

3 Te nuu ndiaꞌa san andivi ja ni saꞌa maa ni,

vi yoo vi kimi ja ni jani ni,

4 te ndakani ini san: “¿Nagua ka kuu ñayiu ja kokuꞌun ini ni ja jaꞌi?”

Te tu nagua ka kuu saꞌun seꞌe teyii ja kondiꞌni ni ja jaꞌi.

5 Chi ni saꞌa lule ka ni jin joo saa ia ka jinokuechi nuu ni,

te ni ndaskutu ni jin jayiñuꞌu vi javii javaꞌa.

6 Chi ni chitniuu ni jin ja vi kotatnuni nuu ndiꞌi ja ni saꞌa ni,

te ndiꞌi tuꞌu ni xndendoo ni nuu ndaꞌi:

7 Ndiꞌi ndikachi vi ndiꞌi isndiki vi ndiꞌi kiti yuku,

8 vi ndiꞌi kiti ka ndagua ichi andivi, vi chiaka ja ka ñuꞌu nuu ndute mar,

vi ndiꞌi kiti ka jika ichi nuu ndute mar.

9 Maa ni, vi Jitoꞌo Dios,

nase vivii kaꞌnu kuu ni nuu ndiꞌi ñuyiu yaꞌa.