1 Kachi ñayiu vasa jin anui:

“Tu na Dios oo”.

Chi ndiꞌi ka kuu ñayiu kueꞌe ndevaꞌa,

te ka saꞌi tniuu tneꞌe ndevaꞌa,

te tu na in ñayiu saꞌa javaꞌa.

2 Te ndee andivi jito nuu Jitoꞌo Dios

nuu ka oo seꞌe ñayiu ñuyiu,

nagua ja kondiaꞌa ya a oo na in ñayiu jinkuiꞌnu ini,

ja ndanduku ña jin ya.

3 Su ndiꞌi ñayiu ni ka kujioo nuu ichi ia Dios,

te janeꞌe jayichi ni ka saꞌi,

te tu na in ñayiu saꞌa javaꞌa, tu ni invaa in tnoꞌi.

4 “Te tu ka jinkuiꞌnu ini ñayiu yun, chi ndiꞌi ka saꞌa jakueꞌe,

te ka tandaꞌu ka takei ñayiu ñuu rin,

na kuinio nuu ka jai xtaa,

te ni tu ka ndakakuneꞌe ñai jin rin”, kachi ia Dios.

5 Te vi suaꞌa ka niꞌi ñayiu yun ja ka yuꞌi,

su oo maa ia Dios jin ñayiu ndaa.

6 Ka jaku ndee ña ñayiu kueꞌe jin ja ka ndakani ini ñayiu ndaꞌu ja vi saꞌi,

su tavaꞌa ña maa ia Dios jin.

7 Ndee ja ñuꞌu ka maa ia Dios,

te ndee Sión na tetniuu ya ia skaku niꞌnu ña jin ñayiu Israel.

Te nuu saꞌa Jitoꞌo Dios ja vi ndajiokuiin ñayiu ñuu ya ja ndekuei nuu ni ka ojinokuechi,

saa te vi kusii ini ndikin tata Jacob ja ka kui ñayiu Israel.