1 Saꞌa ndaa ni ja jaꞌa san, vi Jitoꞌo san, chi jika ndaa san, te tu na jakueꞌe saꞌa san,

te kukanu ini ña san jin maa ni, vi Jitoꞌo san, te tu kasiki san ja saꞌa san.

2 Koto tnuni ña ni, vi Jitoꞌo san, te kuni ni naxa oo san.

Skuaꞌa ni jajintnuni san vi anu san, te kuni ni.

3 Chi naꞌa san ja kundaꞌu ini ña ni,

te siun ni jika san ichi ndaa ni.

4 Te tu ka junkoo san jin tee inu tnoꞌo,

te ni tu ka nitnaꞌa san jin ñayiu ka saꞌa jani ini.

5 Te skexiko san nuu ka ndututu tee ka saꞌa jakueꞌe,

te tu ka junkoo in ni san jin tee kueꞌe ndevaꞌa.

6 Ndakate san ndaꞌa san ja xneꞌe san ja tu na yika kuechi san,

te kuu kiondita san nuu ka soko kiti nuu ni, vi Jitoꞌo san.

7 Te kata san yaa ja ndakuantaꞌu san nuu ni,

te ndakani san ndiꞌi tniuu naꞌnu saꞌa ni.

8 Kutoo san veꞌe nuu oo ni, vi Jitoꞌo san,

vi nuu oo ndiaꞌa ni ja yeꞌe tajan ni.

9 Te ma kuandetu ni ja in ni vi kuu san jin ñayiu ka saꞌa yika kuechi,

te ni ma ndakindee ni ja jichi ja kanda san inuu jin nagua saꞌa ni jin ñayiu ka jaꞌni ndiyi.

10 Chi ninoꞌo ni jakueꞌe ka saꞌa ñayiu yun jin ndaꞌi,

te ndaꞌa kuaꞌi ñuꞌu chitu ja ka kutaꞌui jin jakueꞌe ka saꞌi.

11 Su sein, chi jika ndaa san,

te kundaꞌu ini ña ni, te skaku niꞌnu ña ni jin san.

12 Chi nukuiin yutnu san nuu ichi ni,

te chiñuꞌu ña san jin ni, vi Jitoꞌo san, nuu ka ndututu ñayiu maa ni.