1 Nase luluu kaa veꞌe nuu oo ni, vi Jitoꞌo san, ja kuu ni ia ndakui ndevaꞌa.

2 Te ndioo ndevaꞌa ini anu san ja koo san veñuꞌu ni, vi Jitoꞌo san,

te ndiꞌi san jin anu san vi jin yiki kuñu san kata san yaa ja kusii ini san nuu ni, vi Dios, ja kuu ni ia teku.

3 Te vi ndee tisala ka kuu tixiꞌi ka niꞌi ti veꞌe ti ini veñuꞌu ni,

vi tixiko ka saꞌa ti taka ti nuu vi taꞌu seꞌe kueli ti yatni nuu oo altar ni, vi Jitoꞌo san,

ja kuu ni ia ndakui ndevaꞌa, vi rey san vi Dios san.

4 Na taꞌu na ndetu ñayiu ka oo veꞌe ni,

chi nikuii nikani ka saꞌa kaꞌnu ñai jin ni.

5 Na taꞌu na ndetu ñayiu ka niꞌi jandakui nuu ni,

te maa ni ka ndioo ini ja vi kakai nuu ichi ni ja kentakuei ndee yuku Sión, vi Dios.

6 Te nuu ka jikai in chikoꞌi nani “nuu ka ndaꞌi” ja kuu ñuꞌu yichi,

te ndasama ja nduu na kuinio in nuu kee ndute,

te kuun sau, te chitu ndute nuu pila.

7 Te in kiuu in kiuu vi nduu ndakui kai nuu kuaꞌankuei,

te nuu kentakuei Sión, te yun vi kuni ia Dios.

8 Konini ni joo tnoꞌo ja ndakuatu san nuu ni, vi Jitoꞌo san, ja kuu ni ia ndakui ndevaꞌa.

Konini ni joo tnoꞌo kaꞌan san, vi Dios Jacob.

9 Kondiaꞌa guaꞌa ni tee kuu rey ja ni kaji maa ni, vi Dios,

chi maa ni kuu ia jito jini ña jin in in san.

10 Chi guaꞌa ka kuu ja koo san in kiuu nuu veꞌe maa ni, vi Dios,

masu ja koo san in mil kiuu ndee inka nuu.

Chi junkuaan ka ini san ja kokoto san yeꞌe veꞌe ia Dios, masu ja koo san nuu oo jakueꞌe.

11 Chi yeꞌe ia Dios nuu ka oo vi jito jini ña ya jion.

Te jiñaꞌa ya javaꞌa vi jayiñuꞌu nuu ñayiu ka jika ndaa nuu ya,

te tu kuxii ya javii javaꞌa ya nui.

12 Te na taꞌu na ndetu ñayiu ka kukanu ini ña jin ni, vi Jitoꞌo san,

ja kuu ni ia ndakui ndevaꞌa.