95
Neꞌekuei ni na vi katao nuu ia Dios
1 Neꞌekuei ni na vi katao nuu Jitoꞌo Dios ja ka kusii inio,
na vi katao vi kanao ja ka kusii ndevaꞌa inio nuu ia kuu kava
ja jito jini ña ya vi skaku niꞌnu ña ya.
2 Na kiꞌinkueio nuu oo ya, ja vi ndakuantaꞌuo nuu ya.
Te na vi katao yaa nuu ya.
3 Chi maa Jitoꞌo kuu ia Dios kaꞌnu ndevaꞌa,
te maa ya kuu rey kaꞌnu ka saa ndiꞌi chuꞌchi.
4 Te nuu ndaꞌa maa ya oo ndee nuu kunu ka chii ñuꞌu,
te kuenta maa ya ka kuu yuku sukun.
5 Te suni kuenta maa ya kuu ndute mar,
chi maa ya ni saꞌa,
te jin ndaꞌa maa ya ni saꞌa ya ñuꞌu yichi.
6 Neꞌekuei ni na vi jinkindei vi jinkititio nuu ia Dios,
ja vi chiñuꞌo ya.
Na vi junkuiin jitio nuu Jitoꞌo Dios, ia ni saꞌa ña jion.
7 Chi maa ya kuu ia Dios mao,
te yoon ka kuu ñayiu ñuu ya ja ka oo nuu ite kuii ya,
chi ka kuo na kuinio ndikachi ja jito maa ya.
Vitna te vi konini ni tnoꞌo kaꞌan ya:
8 Ma vi saꞌa ndee ron ini anu ron,
nagua ni ka saꞌa ñayiu nuu ni ka oi nuu nani Meriba,*95:8 Meriba kei kaꞌan: ndakoo siki.
vi nagua ni ka saꞌi in kiuu nuu suni nani Masah†95:8 Masah kei kaꞌan: jito tnuni. nuu ñuꞌu teꞌa yun,
9 na ni ka ndakoo ndi nijaꞌnu ron siki rin,
te ni ka jito tnuni ñai,
visi ni ka jini tniuu naꞌnu saꞌa rin.
10 Te uu xiko kuia ni okiti ini rin nuu ñayiu yun,
te ni kachi rin: “Ñayiu ñuu yaꞌa, chi yaꞌa yun ni ka jikai,
te tu ka jini ichi mao”, ni kachi rin.
11 Te yun kuu ja ni kee yuꞌu rin jin ja kiti ini rin,
ja ma kiukuei saꞌuin nuu ñuu kuñaꞌa maa rin ja vi ndatatui,
kachi ya.