97
Maa Jitoꞌo kuu ia tatnuni nuu ñuyiu
Vi kokuu sii ini maa ni ja ka oo ni nii ñuyiu,
te vi kokusii ini ndiꞌi ni ja ka oo ni ndee yuꞌu ndute mar, chi maa Jitoꞌo tatnuni.
 
Te ni jionduu ña viko kokin vi viko tnutnuu jin ya,
te yituu guaꞌa ña tniuu ndaa vi tniuu guaꞌa jin nuu tatnuni ya.
Te yoxnoꞌo ñuꞌu ichi nuu ya kuaꞌan,
te teñuꞌu ña jin ñayiu ka kaꞌan uꞌu ña jin ya, ja ka oo xiin ya.
Te yeꞌe niꞌnu ja kuun tajan ya nuu ñuyiu,
te nuu jini ñuꞌu, te kisi.
Te ka ndute yuku na kuinio ñuma nuu ka jini Jitoꞌo,
ia kuu Jitoꞌo ndiꞌi ñuyiu.
Te kana andivi kaxtnoꞌo tniuu ndaa saꞌa ya,
te ñayiu ndiꞌi ñuu ka ndiaꞌa ja yeꞌe tajan ya.
Te ka kendoo kanoo ñayiu ja ka chiñuꞌu chuꞌchi,
vi ñayiu ka kuu teyii jin chuꞌchi yun.
Te ndiꞌi roon, chuꞌchi, vi jinkindei nuu ia Dios.
 
Nuu ni ka onini ñayiu yuku Sión tnoꞌo yaꞌa, te ni ka kusii ini,
vi ni ka kusii ini ñayiu ñuu Judá ja saꞌa ndaa ni, vi Jitoꞌo san.
Chi ia oo ndee sukun yun kuu ni, vi Jitoꞌo san,
te tatnuni ni siki ndiꞌi ñuyiu, vi kaꞌnu ndevaꞌa ka kuu ni saa ndiꞌi chuꞌchi.
 
10 Te maa ni ja ka kutoo ni Jitoꞌo, vi skexiko ni jakueꞌe,
chi jito jini ña ya jin ñayiu maa ya,
vi skaku niꞌnu ña ya nuu ndaꞌa ñayiu ka saꞌa jakueꞌe.
11 Chi yeꞌe niꞌnu ya nuu ñayiu ndaa,
te jiñaꞌa ya jasii ini nuu ñayiu ka oo ndaa ini anui.
12 Te maa ni ja ka kuu ni ñayiu ndaa, vi kokusii ini ni nuu Jitoꞌo,
te vi saꞌa kaꞌnu ni ya, chi ia ii kuu ya.