1 Maa Jitoꞌo kuu rey, te nukoo ya ichi siki nuu ka oo ia ka jinokuechi nuu ya ja ka nani querubin,

te ñayiu ndiꞌi ni ñuu ka niꞌi ja ka yuꞌi, vi kisi nii ñuyiu.

2 Kaꞌnu kuu Jitoꞌo nuu yuku Sión,

te kaꞌnu ka kuu ya siki ndiꞌi ñuu.

3 Na vi saꞌa kaꞌnu ñayiu sivi Jitoꞌo, chi ia kaꞌnu ndevaꞌa kuu ya,

te ioo ndevaꞌa tniuu saꞌa ya, chi ia ii kuu ya.

4 Maa ni, vi Dios, kuu rey ndakui ndevaꞌa, te kutoo ni ja saꞌa ndaa ni,

te maa ni saꞌa ja inuu ka kuu ñayiu, te ni jaꞌnde ndaa ni kuechi ñayiu,

vi ni saꞌa ndaa ni ja jaꞌa ndikin tata Jacob.

5 Vi saꞌa kaꞌnu ni Jitoꞌo, ia kuu Dios mao,

te vi junkuiin jiti ni nuu jaꞌa ya, chi ia ii kuu ya.

6 Chi Moisés vi Aarón ni ka oo de neꞌu tee ni ka okuu sutu ya,

te Samuel ni oo de neꞌu ñayiu ni ka ojikantaꞌu nuu ya.

Te nuu ni ka ojikantaꞌu de nuu Jitoꞌo ja chituu ña ya,

te ni onini ya tnoꞌo ni ka okaꞌan de.

7 Te ndee nuu viko kani ni okaꞌan ia Dios jin de,

te ni ka skunkuu de tnoꞌo ni tatnuni ya, vi ley ja ni jiñaꞌa ya nuu de.

8 Te ni onini maa ni tnoꞌo ja ni ka ojikantaꞌu de nuu ni, vi Jitoꞌo, ja kuu ni ia Dios maa san,

te ni okuu ni in ia Dios ja ni ojakaꞌnu ini ni ja ni ka osaꞌa de,

visi suni ni tetniuu ni tnundoꞌo ni ka tnaꞌa de ja jaꞌa jakueꞌe ni ka osaꞌa de.

9 Vi saꞌa kaꞌnu ni Jitoꞌo, ia kuu Dios mao,

te vi junkuiin jiti ni nuu yuku ii ya,

chi ia ii kuu Jitoꞌo, ia kuu Dios mao.