116
Na vi ndakuantaꞌuo nuu Dios, ia skaku niꞌnu ña jion
Kutoo san Jitoꞌo, chi nini ya tnoꞌo ja jikantaꞌu san nuu ya.
Chi chindei ya xini ya, te nini ya tnoꞌo ja kaꞌan san nuu ya,
te yun guaa kondakakuneꞌe san ya ndiꞌi ni kiuu ja teku san.
Te vi ja oo san ja kuu san, te ni junkuntnaꞌa san jin tnoꞌo suchi ini
ja vi sandee ni ka ja kanakau san nuu yau ñaña,
chi ni tnaꞌa san tnundoꞌo vi tnoꞌo suchi ini.
Yun te ni ndakakuneꞌe san Jitoꞌo, te jiñaꞌa san:
“Jikantaꞌu san nuu ni, vi Jitoꞌo san, ja skaku niꞌnu ña ni jin san”.
 
Kaꞌnu ndevaꞌa ini Jitoꞌo vi ia ndaa kuu ya,
chi ndija ja kundaꞌu ndevaꞌa ini ña ia Dios mao.
Te jito jini ña Jitoꞌo jin ñayiu ka saꞌa ndaꞌu ka saꞌa kee,
chi nuu vi ja ni kuita saꞌun san, te ni skaku niꞌnu ña ya jin san.
Vitna te kuu ndatatu sii ini ron, vi anu,
chi ni saꞌa guaꞌa ña Jitoꞌo jin ron.
 
Chi ni skaku niꞌnu ña ni jin san, vi Dios, ja tu ni jiꞌi san,
te ni jaꞌa ni tenuu san,
vi tu ni jandetu ni ja ndondiso san.
Te yun kuu ja siun ni kokaka san nuu ichi maa ni, vi Jitoꞌo,
nuu ka oo ñayiu ñuyiu.
10 Ni kandija san ia Dios, te yun guaa ni kaꞌan san:
“Tnaꞌa ndevaꞌa san tnoꞌo suchi ini”,
11 te nuu tu ni niꞌi ini ka san nagua saꞌa san,
te ni kachi san: “Ndiꞌi ñayiu inu tnoꞌo”.
 
12 ¿Te nagua kuu ja tniuyaꞌu san nuu Jitoꞌo,
jin ndiꞌi jaguaꞌa ja ni saꞌa ña ya jin san?
13 Te soko san vinu nuu Jitoꞌo ja ndakakuneꞌe san ya
ja ni skaku niꞌnu ña ya jin san.
14 Te skunkuu san tnoꞌo ni kee yuꞌu san nuu Jitoꞌo
jin nuu ndiꞌi ñayiu ñuu ya.
15 Te kusuchi ndevaꞌa ini Jitoꞌo nuu ndiaꞌa ya
ja ka jiꞌi ñayiu vii maa ya.
16 Te jandaa, vi Jitoꞌo, ja maa san kuu tee jinokuechi nuu ni,
chi maa san kuu seyii ñaꞌa jinokuechi nuu ni,
te ni jaꞌnde ni kaa ja ni onuꞌni san.
17 Te soko san kiti ja ndakuantaꞌu san nuu ni,
te ndakakuneꞌe san sivi ni, vi Jitoꞌo san.
18 Te skunkuu san tnoꞌo ni kee yuꞌu san nuu ni, vi Jitoꞌo,
jin nuu ndiꞌi ñayiu ñuu ni,
19 ini nuu oo veñuꞌu maa ni, vi Jitoꞌo,
maꞌñu sagua nuu oo maa ron, vi Jerusalén.
¡Kaꞌnu kuu Jitoꞌo!