1 Kuakuaꞌa ñayiu ni ka otaa tnoꞌo suchi ini guaa ndee nuu kuechi san.

Te na vi kaꞌan ñayiu Israel vitna:

2 Kuakuaꞌa ñayiu ni ka otaa tnoꞌo suchi ini guaa ndee nuu kuechio.

Su tu ni ka kundee ja vi xnaa ña jion.

3 Te ni ka xtuji yatao nuu ni ka kuun ni ka kani ña jin ñii,

te ni ka junkuiin jichi yatao, na kuinio ñuꞌu nuu ka jani ñayiu yukun.

4 Su ia ndaa kuu Jitoꞌo, te ni skaku niꞌnu ña ya nuu ndaꞌa ñayiu kueꞌe yun.

5 Te saꞌa ni ja ndiꞌi ñayiu ka kaꞌan uꞌu ña jin ñayiu ñuu Sión,

na vi kendoo kanoi, te na vi ndakaka yatai.

6 Te na vi kokui na kuinio yuku ja nana xtuu veꞌe,

ja vi kueli ni, te ka yichi,

7 ja vini ja tu niꞌi ñayiu jaꞌnde yuku yun ja chitu nuu ndaꞌi,

te ni ja niꞌi ñayiu kuꞌni ja saꞌa nuꞌni.

8 Te ni in ñayiu ka yaꞌa yun, ma vi kaꞌin nuu ñayiu ka kaꞌan uꞌu ña yun:

“Na saꞌa vii saꞌa ña Jitoꞌo jin in in ni”.

Te ni ma vi kaꞌin: “Jin sivi maa Jitoꞌo ka saꞌa vii ka saꞌa vaꞌa ña san”.