1 ¡Kaꞌnu kuu Jitoꞌo!

Vi saꞌa kaꞌnu ni sivi Jitoꞌo.

Maa ni ja ka jinokuechi ni nuu ya, vi saꞌa kaꞌnu ni ya,

2 maa ni ja ka oo ni ini veñuꞌu maa Jitoꞌo,

vi maa ni ja ka oo ni ini nuu oo veñuꞌu ia Dios mao.

3 Vi saꞌa kaꞌnu ni Jitoꞌo, chi ia guaꞌa kuu ya,

vi kata ni yaa ja ka saꞌa kaꞌnu ni sivi ya, chi ia luu ndevaꞌa ini kuu ya.

4 Chi ni kaji ña Jitoꞌo jin Jacob ja suni kuu Israel,

ja vi kokui ñayiu maa ya.

5 Chi jini guaꞌa san ja ia kaꞌnu kuu Jitoꞌo,

te kaꞌnu ndevaꞌa ka, kuu ia Dios mao saa ndiꞌi chuꞌchi.

6 Te saꞌa Jitoꞌo ndiꞌi nagua kaꞌan maa ya ja koo

andivi vi nuu ñuꞌu vi nuu ndute mar vi ndiꞌi ndee kaꞌa ndute mar.

7 Chi saꞌa ya ja nukoo viko ninii ñuyiu,

vi saꞌa ya ja kani tajan nuu kuun sau,

vi saꞌa ya ja junkiꞌi niꞌi tachi, ndee ni nuu ni kuu.

8 Maa ia Dios ni saꞌa ja ni ka jiꞌi seyii xtnañuꞌu ndiꞌi ñayiu Egipto,

te ni ka jiꞌi seyii xtnañuꞌu ñayiu yun, vi ni ka jiꞌi seꞌe xtnañuꞌu ndiꞌi kiti tatai.

9 Te ni saꞌa ya kuaꞌa tniuu naꞌnu vi javii javaꞌa nuu ñuu Egipto,

vi ni tetniuu ya tnundoꞌo siki Faraón vi siki ndiꞌi ñayiu ka jinokuechi nuu de.

10 Te ni xnaa ya ñayiu nuu kuaꞌa ñuu naꞌnu,

vi ni jaꞌni ya tee ka kuu rey ja inu ndakui ndevaꞌa.

11 Ni jaꞌni ya Sehón tee ni okuu rey ñayiu amorreo,

vi Og, tee ni okuu rey ñayiu Basán,

vi ni jaꞌni ya ndiꞌi tee ni ka okuu rey ñayiu ñuu Canaán.

12 Te ni jiñaꞌa ya ñuꞌu ñayiu yun nuu ñayiu Israel,

te ni ka saꞌa jajin ñayiu ñuu ya.

13 Nikuii nikani oo sivi ni, vi Jitoꞌo san,

te siun ni vi kondakaꞌan ña ñayiu jin ni.

14 Chi saꞌa ndaa Jitoꞌo ja jaꞌa ñayiu ñuu ya,

te kundaꞌu ini ya ñayiu ka jinokuechi nuu ya.

15 Te chuꞌchi ñayiu sava ka ñuu yun, chi ninoꞌo ni oro vi plata ka kuu,

ja ni ka saꞌa ñayiu jin ndaꞌi ka kuu.

16 Ka oo yuꞌu, su tu kuu vi kaꞌan,

ka oo nduchi nuu, su tu kuu vi kondiaꞌa,

17 Ka oo soꞌo, su tu kuu vi konini,

ka oo xtnii, su tu kuu vi ndakuantachi.

18 Te na kandaa chuꞌchi yun saa kandaa maa ñayiu ka saꞌa ña jin,

vi suni saa kandaa ndiꞌi ñayiu ka kukanu ini ña jin chuꞌchi yun.

19 Maa ni ja ka kuu ni ñayiu Israel, vi saꞌa kaꞌnu ni Jitoꞌo,

vi maa ni ja ka kuu ni tatatnoꞌo Aarón, vi saꞌa kaꞌnu ni Jitoꞌo,

20 vi maa ni ja kuu ni tatatnoꞌo Leví, vi saꞌa kaꞌnu ni Jitoꞌo,

vi maa ni ja ka yuꞌu niꞌnu ni Jitoꞌo, vi saꞌa kaꞌnu ni ya.

21 Maa ni ja ka oo ni yuku Sión, vi saꞌa kaꞌnu ni Jitoꞌo,

ia oo ñuu Jerusalén.

¡Kaꞌnu kuu Jitoꞌo!