1 Konini ni joo tnoꞌo ndakuatu san nuu ni, vi Jitoꞌo.

Tanuu ni joo tnoꞌo ja jikantaꞌu san nuu ni.

Chituu ña ni jin san, chi ia ndaa kuu ni, vi saꞌa ndaa ni.

2 Te ma kana ña ni ja sandaa ni kuechi san ja jinokuechi san nuu ni,

chi tu na in ñayiu kachi ja tu na kuechi tavi nuu ni.

3 Chi ni ka sondikin ña ñayiu ka kaꞌan uꞌu ña jin san,

te ka kuini ja vi skunta ñai ndee ñuꞌu jin san.

Te ka tenini ñai ja koo san nuu nee,

na kuinio in ñayiu ja ni kuu naꞌa ni jiꞌi.

4 Te vi suaꞌa kanta anu san ja kusuchi ndevaꞌa ini san,

te vini ja tu na anu ka san.

5 Te ndakaꞌan san ndiꞌi tniuu naꞌnu ni saꞌa ni, ndee tiempu ja ni kuu nanaꞌa,

te ndakani ini san ndiꞌi ja ni saꞌa ni jin jakaꞌnu ni.

6 Te kaneꞌe san ndaꞌa san ichi nuu oo ni,

chi yichi kokin san ja koo san jin ni, na kuinio ñuꞌu yichi jin sau.

7 Neꞌe ñama ni, te chituu ña ni jin san, vi Jitoꞌo san, chi makuita saꞌun anu san.

Ma chiyata ña ni jin san, chi nuu tuu, te kokuu san na kuinio ndiyi,

ja kuaꞌan jinkoyuꞌu nuu yau ñaña.

8 Te ndee tnoꞌo neꞌe xneꞌe ni nuu san, ja kundaꞌu ini ña ni jin san,

chi kukanu ini ña san jin ni.

Xneꞌe ni nuu san na ichi kaka san, chi soko san maa san nuu ni.

9 Skaku niꞌnu ña ni nuu ndaꞌa ñayiu ka kaꞌan uꞌu ña jin san,

chi nuu maa ni nduku san ja tavaꞌa ña ni jin san.

10 Kaxtnoꞌo ni nuu san ja saꞌa san nagua kuini ni, chi maa ni kuu ia Dios san.

Te maa espíritu guaꞌa ni, na kondeka konduu ña jin san ja na kaka san ichi ndaa.

11 Te jin sivi maa ni, vi Jitoꞌo, te taa ni ja koteku san,

chi ia saꞌa ndaa kuu ni, te skaku niꞌnu ña ni nuu tnoꞌo suchi ini tnaꞌa san.

12 Te jin ja kundaꞌu ini ña ni, te xnaa ni ñayiu ka kaꞌan uꞌu ña jin san.

Xnaa ni ndiꞌi ñayiu ka taa tnoꞌo suchi ini nuu san,

chi tee jinokuechi nuu maa ni kuu san.