1 Saꞌa kaꞌnu ña san jin ni, vi Dios, vi rey,

te nikuii nikani kokaꞌan vii kokaꞌan vaꞌa san jin ni.

2 Te in kiuu in kiuu kokaꞌan vii kokaꞌan vaꞌa san jin ni, vi Dios,

te nikuii nikani kosaꞌa kaꞌnu ña san jin ni.

3 Chi kaꞌnu kuu ni, vi Jitoꞌo Dios, te kanuu ja na koo ndiꞌi jayiñuꞌu nuu ni.

Te kaꞌnu ndevaꞌa kuu jakaꞌnu ni ja ma kentakuei san ja vi jinkuiꞌnu ini san.

4 Vi kondakani tata nuu seꞌe de vi nuu señani de tniuu saꞌa ni,

te vi kondakani taka tniuu naꞌnu ja saꞌa ni.

5 Vi kokaꞌin ja luu ndevaꞌa kaa ni vi yeꞌe tajan ni,

te ndakani ini maa san siki tniuu vii ndevaꞌa ja saꞌa ni.

6 Te vi kaꞌan ñayiu ja jaꞌa jakaꞌnu ja saꞌa ni tniuu guaꞌa,

te suni ndakani maa san siki tniuu naꞌnu saꞌa ni.

7 Te vi kana ndoso ñayiu ja vi kondakaꞌin ja ia guaꞌa ndevaꞌa kuu ni,

te vi kata ñayiu yaa ja ia saꞌa ndaa kuu ni.

8 Kaꞌnu ndevaꞌa ini Jitoꞌo Dios vi ndaꞌu ini ya.

Kuekuee kiti ini ya, vi kutoo ndevaꞌa ña ya jion.

9 Chi vaꞌa ini Jitoꞌo Dios jin ndiꞌi ñayiu,

te kundaꞌu ini ya ndiꞌi ja ni saꞌa ya.

10 Na vi saꞌa kaꞌnu ña ndiꞌi ja ni saꞌa ni jin ni, vi Dios,

te na vi kaꞌan vii vi kaꞌan vaꞌa ñayiu maa ni jin ni.

11 Na vi kaꞌin ja yeꞌe tajan nuu tatnuni ni,

te na vi ndakani tniuu naꞌnu ja saꞌa ni,

12 nagua ja na vi kuni ñayiu tniuu naꞌnu ja saꞌa ni,

vi ja vii ndevaꞌa yeꞌe tajan nuu tatnuni ni.

13 Chi nuu tatnuni ni kuu in nuu tatnuni nikuii nikani,

te siun ni kuu nijaꞌnu ni,

[chi skunkuu ni, vi Jitoꞌo Dios, tnoꞌo ni kee yuꞌu ni,

te luu ini ni jin ndiꞌi ja saꞌa ni].*145:13 Masu ndiꞌi nuu tutu ii yoso tnoꞌo yaꞌa.

14 Chi ndoneꞌe ni ndiꞌi ñayiu ka kanakau, vi Jitoꞌo Dios,

te tnii guaꞌa ni ñayiu ka tnaꞌa tnundoꞌo.

15 Ndiꞌi ñayiu ka yinuu nuu ni, te ka ndetu kaꞌnui

ja kuñaꞌa ni ja vi kai mamaa kiuu ja ka kuini.

16 Kune ni nuu ndaꞌa ni, te kuñaꞌa ni kuaꞌa javii javaꞌa ni,

nagua ja na vi niꞌi ja ka jichi ka kanda nagua ka jaꞌni ña jin.

17 Ndiꞌi ichi Jitoꞌo Dios kuu ichi ndaa,

te luu ini ya jin ndiꞌi ja ni saꞌa ya.

18 Yatni ñuꞌu oo Jitoꞌo Dios nuu ndiꞌi ñayiu ka ndakakuneꞌe ya,

ñayiu ja vi jandaa ja ka ndakakuneꞌi ya.

19 Chi skunkuu ya nagua ka ndioo ini ñayiu ka yuꞌu niꞌnu ya,

chi nini ya tnoꞌo ka kaꞌin nuu ka jikantaꞌui nuu ya,

te skaku niꞌnu ña ya.

20 Chi jito jini ña Jitoꞌo Dios jin ñayiu ka kutoo ya,

su xnaa ya ndiꞌi ñayiu kueꞌe.

21 Na kokaꞌan ni san ja ia kaꞌnu ndevaꞌa kuu Jitoꞌo Dios,

te ndiꞌi ñayiu ñuyiu na vi kokaꞌan vii vi kokaꞌan vaꞌi jin ya,

ndee vitna vi nikuii nikani.