1 ¡Kaꞌnu kuu Jitoꞌo!

Nase guaꞌa kuu ja vi katao yaa ja ka saꞌa kaꞌnuo ia Dios mao,

chi luu ndevaꞌa kuu ja vi katao yaa ja ka saꞌa kaꞌnuo ya.

2 Chi ndasaꞌa Jitoꞌo ñuu Jerusalén,

te ndatatutu ya ñayiu Israel ja ni jatenuu ya ja ka oi nuu sava ka ñuu.

3 Te maa ya ndasaꞌa ñayiu ka kusuchi ini anui,

te kasi ya in saꞌun nuu ni ka tuji.

4 Te maa ya ni chikuaꞌa nasaa kimi ka oo andivi,

te kana sivi ya ndi in ndi in ti.

5 Kaꞌnu ndevaꞌa kuu Jitoꞌo, vi kaꞌnu kuu jakaꞌnu ya,

te ndiꞌi kuiti ni ja jinkuiꞌnu ini ya.

6 Te ndasaꞌa sukun ña Jitoꞌo jin ñayiu ka saꞌa ndaꞌu ka saꞌa kee mai,

su ndee ñuñuꞌu nuneꞌe ya ñayiu ka saꞌa jakueꞌe.

7 Vi kata ni yaa ja ka saꞌa kaꞌnu ni Jitoꞌo.

Vi kata ni yaa jin xnuu kaxin ja ka ndakuantaꞌu ni nuu ia Dios mao.

8 Chi maa ya saꞌa ja ndachitu viko andivi,

te maa ya tetniuu sau ja kuun nuu ñundeꞌi,

vi maa ya saꞌa ja nana yuku kuii taka nuu yuku.

9 Te maa ya jiñaꞌa ja ka jaa kiti,

vi jiñaꞌa ya ja ka jaa tikaka yikin nuu ka ndaꞌi ti.

10 Te tu kusii ini ya jin ja inu ndakui kuai,

te ni tu junkuaan ini ya ja inu ñama siꞌin teyii ja vi kunu de.

11 Chi ja junkuaan ini ya kuu ja vi koyuꞌu niꞌnu ña ñayiu jin ya,

vi ñayiu ka ndetu kaꞌnu ja kundaꞌu ini ña ya jin.

12 Te maa ni, ñayiu ñuu Jerusalén, vi saꞌa kaꞌnu ni Jitoꞌo.

Vi maa ni, ñayiu ñuu Sión, vi saꞌa kaꞌnu ni ia Dios maa ni.

13 Chi ni ndasaꞌa ndakui ya ndakaa yiꞌi yeꞌe ñuu ni,

vi ni saꞌa vii ni saꞌa vaꞌa ya ñayiu ka oo ñuu ni.

14 Te maa ya saꞌa ja koo jamani nuu ñuu ni,

te taa ya kuaꞌa ndevaꞌa nuni guaꞌa ja vi kokaa ni.

15 Te tetniuu ya tnoꞌo ya nuu ñayiu ñuyiu,

te ñama kuiti jika jino tnoꞌo ya.

16 Te saꞌa ya ja junkau yaa ti iñu ninii nuu ñuꞌu na kuinio kachi,

te skuun ia Dios ti iñu na kuinio yaa oo nuu ñuꞌu.

17 Te skuun ya ñiñi na kuinio yuu kueli,

te tu na in kundee ini ja vijin ndevaꞌa.

18 Yun te tetniuu ya tnoꞌo ya, te xtute ña jin yuaꞌa yun.

Saꞌa ya ja junkiꞌi in tachi niꞌi, te xtute ña jin, te jika ndute yuaꞌa yun.

19 Te ni xneꞌe ia Dios tnoꞌo ya nuu ndikin tata Jacob,

vi ni jiñaꞌa ya tnoꞌo tatnuni ya vi tnoꞌo kaxtnoꞌo ya nuu ñayiu Israel.

20 Te tu ni saꞌa ya siun jin ñayiu sava ka ñuu,

te ni tu ni ka jini ñayiu yun tnoꞌo tatnuni ya.

¡Kaꞌnu kuu Jitoꞌo!