7
Ni jinkondee seyu tnee ciento uu xiko kuun mil ñayiu Israel
1 Yun te nuu ni yaꞌa yun, te ni jini san kuun ia ka jinokuechi nuu ia Dios ja ka nukuiin ya ndi kuun lado ñuyiu ja ka jinkani ya tachi ja ma junkiꞌi ndi kuun lado, nagua ja ma kiꞌi saꞌun tachi nuu ñuꞌu ni nuu ndute mar ni nuu yutnu. 2 Te suni ni jini san inka ia jinokuechi nuu Dios ja vaji ya ichi nuu kana nikandii. Te yindaꞌa ya seyu Dios ia teku. Te ni kana jaa ya nuu ndi kuun ia ka jinokuechi yun ja ni ka niꞌi ya jakaꞌnu ja vi saꞌa ya jakueꞌe nuu ñuꞌu vi nuu ndute mar.
3 Te jiñaꞌa ya:
―Ma vi saꞌa ron jakueꞌe nuu ñuꞌu, ni nuu ndute mar, te ni nuu yutnu, chi vi kondetu ndee na vi teo seyu tnee ñayiu ka jinokuechi nuu ia Dios mao ―jiñaꞌa ya.
4 Yun te ni jini san ni kaꞌan ya ja oo ciento uu xiko kuun mil ñayiu ja ka ndee seyu tnei. Te ndiꞌi ñayiu yun ka kuu tatatnoꞌo Israel. 5 Chi uxi uu mil ñayiu ka kuu tatatnoꞌo Judá ja ni ka jinkondee seyu tnee, vi uxi uu mil tatatnoꞌo Rubén, vi uxi uu mil tatatnoꞌo Gad. 6 Uxi uu mil tatatnoꞌo Aser, vi uxi uu mil tatatnoꞌo Neftalí, vi uxi uu mil tatatnoꞌo Manasés. 7 Uxi uu mil tatatnoꞌo Simeón, vi uxi uu mil tatatnoꞌo Leví, vi uxi uu mil tatatnoꞌo Isacar. 8 Uxi uu mil tatatnoꞌo Zabulón, vi uxi uu mil tatatnoꞌo José vi uxi uu mil ja ka kuu tatatnoꞌo Benjamín. Ndiꞌi ñayiu yaꞌa ka kuu ndikin tata Israel ja ni ka jinkondee seyu tnee.
Kuaꞌa ndevaꞌa ñayiu ka niꞌnu saꞌun kuijin
9 Yun te nuu ni yaꞌa yun, ni ndiaꞌa san, te ni jini san kuaꞌa ndevaꞌa ñayiu, ja vini tu na kundee ja kaꞌu, ndiꞌi ñayiu ñuu naꞌnu jin taka tatatnoꞌo, vi ndiꞌi saꞌan ka kaꞌan ñayiu, vi ñuu kueli ka nukuiin ichi nuu mesa nuu tatnuni maa Dios jin nuu Lelu maa ia Dios. Te ka niꞌnui saꞌun yayaa vi ka yindaꞌi in ndaꞌa ñuu. 10 Te ndiꞌi ka kana jaa, te ka kachi:
Dios mao jin Lelu ya kuu ia skaku niꞌnu ña,
te nukoo maa ia Dios nuu mesa ja tatnuni ya.
Ka kachi.
11 Te ndiꞌi ia ka jinokuechi nuu Dios ka nukuiin, te ni ka jionduu ya mesa nuu tatnuni ia Dios jin ia ka kuu nijaꞌnu vi ndi kuun ia ka teku yun. Te ni ka chindei ya nuu ya ndee nuu ñuꞌu ichi nuu mesa yun, te ni ka chiñuꞌu ya ia Dios. 12 Te ka jiñaꞌa ya:
Saa na kokuu.
Na koo javii javaꞌa nuu ia Dios mao vi jayeꞌe tajan ya vi jandichi ya.
Te na vi ndakuantaꞌuo nuu ya, vi na vi chiñuꞌo ya,
chi kaꞌnu kuu ya vi ndakui ya, te oo ya nikuii nikani.
Saa na kokuu.
Ka kachi ya.
13 Yun te ni jikan tnoꞌo ña in ia kuu nijaꞌnu yun, te kachi ya:
―¿Na ñayiu ka kuu ñayiu ka niꞌnu saꞌun kuijin yun, te ndenu vajikuei? ―kachi ya.
14 Te jiñaꞌa san:
―Maa ni kuu ja jini, vi Jitoꞌo san ―jiñaꞌa san.
Te kachi ya:
―Ñayiu yaꞌa ka kuu ñayiu ni ka yaꞌa nuu kuaꞌa ndevaꞌa tnundoꞌo. Te ni ka ndakatei saꞌun ka niꞌnui jin niñi Lelu, te ni nduyaa vivii.
15 Te yun kuu ja ka oi ichi nuu mesa nuu tatnuni ia Dios, te nduu vi ñuu ka jinokuechi nuu veñuꞌu ya. Te kokoto ña ia nukoo nuu mesa ja tatnuni ya ja tu nagua vi ndoꞌi. 16 Te ma vi kokokin vi koyichi kai, ni ma teñuꞌu ka ña nikandii, ni ma vi tnaꞌa kai tnundoꞌo nuu kaꞌni. 17 Chi koto ña maa Lelu Dios, ia oo maꞌñu nuu oo mesa nuu tatnuni Dios, nagua jito in ñayiu ndikachi. Te kondeka ña maa ya jin ja kiꞌinkuei nuu kee ndute teku. Te ndasichi maa ia Dios ndiꞌi ndute nui ―kachi ia kuu nijaꞌnu yun.