11
Tetniuu ia Dios uu testiu
1 Yun te ni taa ya in ndoo ja kaa na kaa in yutnu chikuaꞌa, te kachi ya:
―Ndakoo te chikuaꞌa ron veñuꞌu ia Dios vi nuu ka soko, te kaꞌu ron nasaa ñayiu ka oo yun ja ka chiñuꞌu ya. 2 Su ma chikuaꞌa ron ñuꞌu ja oo ichi nuu veñuꞌu, chi ja ni jiñaꞌa ia Dios nuu ñayiu sava ka tatatnoꞌo, te sui guaa vi saꞌa jakueꞌe ñuu ii Jerusalén yaꞌa nuu uu xiko uu yoo. 3 Te tetniuu rin uu testiu rin ja vi ndakani tnoꞌo rin nuu in mil uu ciento uni xiko kiuu. Te vi kuiꞌnu de saꞌun ndayi ja ka tnaꞌu ini de ―kachi ya.
4 Te nduu testiu yaꞌa ka kuu nduu yutnu olivo vi nduu kandeleru ja ka nukuiin nuu ia Dios kuu Jitoꞌo ñuyiu yaꞌa. 5 Te nuu ja na in kuini ja saꞌa ña jakueꞌe jin nduu testiu yaꞌa, te kee ñuꞌu yuꞌu ndi nduu de, te teñuꞌu ndiꞌi ña jin na in kaꞌan uꞌu ña jin de. Saa te nani kuu ja ka kuini ja vi saꞌa ña jakueꞌe jin de vi kuu. 6 Te testiu yaꞌa, chi ka nevaꞌa de jakaꞌnu ja vi kasi de andivi nagua ja ma kuun ka sau kiuu vi kaka nuu de ja vi ndakani de tnoꞌo ia Dios. Te suni ka nevaꞌa de jakaꞌnu ja vi sama de ndute ja nduu de niñi. Te suni ja vi tetniuu de tnundoꞌo nuu ñuyiu jin ndiꞌi ni nuu kueꞌe, nasaa ni jichi ka kuini maa de. 7 Te nuu na vi xndiꞌi de ja vi ndakani de tnoꞌo ia Dios, te kee in ja kaa na kuinio in kiti xeen ja kana nuu yau kunu yun. Te vi kaxin tnaꞌa jin de, te kundee kaꞌni ña jin de. 8 Te vi konduei yiki kuñu nduu de nuu yaꞌu ñuu kaꞌnu yun, nuu ni ka jatakaa Jitoꞌo yika cruz. Te ñuu yun kuu na kuinio ñuu Sodoma vi Egipto. 9 Te ñayiu ka oo ñuu naꞌnu vi ñuu kueli, ndiꞌi tatatnoꞌo vi taka saꞌan ja ka kaꞌin, vi kuni ja vi konduei yiki kuñu nduu ndiyi yun nuu uni kiuu yosava, te ma vi kuandetui ja vi jinkoyuꞌu. 10 Te vi kusii ini ndevaꞌa ñayiu nii ñuyiu ja siun ni ka jiꞌi nduu de, te vi saꞌi in viko nuu vi skutaꞌu tnaꞌi, chi nduu tee ni ka ndakani tnoꞌo ia Dios yaꞌa ni ka jiñaꞌa ndevaꞌa de tnundoꞌo nuu ñayiu ñuyiu. 11 Su nuu ni yaꞌa nuu uni kiuu yosava, te ni ndakuñaꞌa Dios ja ka jichi ka kanda de. Te ni ndontakuei de, ni ka nukuiin de. Te ni ka yuꞌu ndevaꞌa ndiꞌi ñayiu ni ka jini ja ni ka ndateku de. 12 Yun te ni ka onini nduu testiu yun ja ni kana jaa in tnoꞌo ichi andivi, te jiñaꞌa:
―Mananakuei ndee yaꞌa.
Te ni ka jini ñayiu ka kaꞌan uꞌu ña jin de ja mandakuei de ndee andivi in nuu viko.
13 Te vi ore saa ni tnaa xeen ndevaꞌa, te ni kuei in ja uxi parte ñuu kaꞌnu yun, te ni ka jiꞌi uja mil ñayiu ja jaꞌa ñutnaa yun. Te ni ka yuꞌu ndevaꞌa sava ka ñayiu ka teku yun, te ni ka chiñuꞌi ia Dios oo ndee andivi.
14 Ja ni yaꞌa tnundoꞌo kuu uu, su yituu yatni tnundoꞌo kuu uni vaji.
Ni ndaꞌi trompeta kuu uja
15 Yun te ni xndaꞌi ia kuu uja trompeta ya. Te ni ka kaꞌan jaa ichi andivi, te ka kachi:
Ndiꞌi ñuu nuu ni ka otatnuni ñayiu ñuyiu,
ndayaꞌa ndaꞌa maa Jitoꞌo Dios jin Kristu, ia ni tetniuu ya.
Te maa ya guaa kotatnuni nikuii nikani.
Ka kachi.
16 Te ndi oko kuun tee nijaꞌnu ja ka nukoo de nuu mesa de nuu oo ia Dios, ni ka junkuiin jiti de vi ndee ni ka kunjino tnee de nuu ñuꞌu, te ni ka chiñuꞌu de ya, 17 te ka jiñaꞌa de:
Ka ndakuantaꞌu san nuu ni, vi Jitoꞌo san ja kuu ni ia Dios ndakui ndevaꞌa,
ja ndiꞌi ni ja kuu ja saꞌa ni.
Chi maintnoꞌo maa ni kuu ia Dios vitna vi kuu ni ia Dios ndee ama ka vi ia Dios ja vaji.
Chi ni kejaꞌa ni jantniuu ni jakaꞌnu ni, ja jinkondee ni kotatnuni ni.
18 Te ni ka kiti ini ñayiu taka ñuu nuu ni,
su vitna te ni kenta kiuu ja kiti ini ni nuu ñayiu ka saꞌa jakueꞌe,
vi ja sandaa ni kuechi ñayiu ni ka jiꞌi,
te kuñaꞌa ni ja vi kutaꞌu tee ni ka jinokuechi nuu ni ja ni ka ndakani tnoꞌo ni,
vi ñayiu maa ni ja ka saꞌa vii ka saꞌa vaꞌa, vi ñayiu ka chiñuꞌu sivi ni,
a kuu ñayiu naꞌnu axi ñayiu kueli,
te xnaa ni ñayiu ka saꞌa jakueꞌe nuu ñuyiu.
Ka kachi de.
19 Yun te ni ndanune yeꞌe veñuꞌu ia Dios ja oo andivi, te ni jini san katuu jatnu tratu ia Dios ini veñuꞌu yun. Te ni jandute vi ni ka kana vi ni kani tajan, te ni tnaa xeen ndevaꞌa vi ni kuun ndevaꞌa ñiñi.