18
Ja ni jinokau ñuu Babilonia
1 Te nuu ni yaꞌa yun, te ni jini tuku san inka ia jinokuechi nuu Dios ja makuun ya ichi andivi jin jakaꞌnu ndevaꞌa ya, te vi ni yeꞌe niꞌnu ninii ñuyiu jin jayeꞌe tajan ya. 2 Te kana jaa ndevaꞌa ya, te kachi ya:
Ja ni jinokau ñuu kaꞌnu Babilonia,
te ni nduu veꞌe nuu ka oo tachi,
nuu ka yiꞌi ndiꞌi espíritu kueꞌe,
nuu ka oo chioko vi ndiꞌi kiti tneꞌe ja ka ndagua ja ka kuu kini ndevaꞌa inio.
3 Chi ñuu yun kuu na kuinio ñaꞌa xiko maa,
te ni saꞌa ña ja na kuinio ni ka ndajini ñayiu ndiꞌi ñuu,
ja ka saꞌi kuechi ñuyiu,
vi ndiꞌi rey ñuyiu, na kuinio ja ni ka saꞌa de kuechi ñuyiu jin ña.
Te ñayiu ja ka xiko ñuu yun ni ka kuu kuikai jin kuaꞌa xuꞌun ja jaꞌa ñasiꞌi yun.
4 Yun te ni onini san inka tnoꞌo ndee ichi andivi ja kachi:
Roon ja ka kuu ron ñayiu ñuu maa rin, kekuei nuu ñuu jian,
nagua ja ma vi tavi kuechi ron yika kuechi ja ka saꞌa ñayiu ñuu jian,
te ni ma vi tnaꞌa ron tnundoꞌo ja vi tnaꞌi.
5 Chi ja ni kaya ndevaꞌa yika kuechi ka saꞌi,
te ja ni jinonta ndee andivi,
te ja ni ndakaꞌan ia Dios ndiꞌi jakueꞌe ka saꞌi.
6 Vi ndasaꞌa jin nagua ni ka saꞌa ñai jin maa ron,
vi ndakuñaꞌa uu tnundoꞌo guaꞌa ka saa nagua ni ka saꞌa ña mai,
te vi ndasaka tnaꞌa uu jichi ndakui ka ja na vi koꞌo mai saa nagua ni ka sakai ja ni ka jiꞌi inka ñayiu.
7 Te ni saꞌa teyii ndevaꞌa ñuu yun mai ja kuaꞌa ndatniuu ni niꞌi jin kuaꞌa xuꞌun ja ni xnai,
te vi kuñaꞌa tnundoꞌo nui ja na vi ndaꞌi vi kanai,
chi ka ndakani ini jin anui:
“Yaꞌa nukoo na kuinio in ñaꞌa tatnuni,
te masu ni ndondaꞌuo,
ni ma kunio tnundoꞌo”.
Kachi jin anui.
8 Te yun kuu ja vi invaa ni kiuu, te kii kuaꞌa tnundoꞌo siki ñuu yun,
chi vi kuu ñayiu, te koo ndevaꞌa tnoꞌo suchi ini, vi koo tnama,
te kai ñuu yun jin ñuꞌu,
chi ia ndakui ndevaꞌa kuu Jitoꞌo Dios, te ndiꞌi ni ja kuu ja saꞌa ya,
ja sandaa ya kuechi ñayiu ñuu yun.
Kachi ya ndee andivi.
9 Te taka rey ñuyiu ja ni ka saꞌa janeꞌe jayichi jin ña vi ni ka kusii ini ndevaꞌa jin ña, vi ndaꞌi vi kana ja jaꞌa ñuu yun, nuu na vi kuni ja kana ñuaꞌa kai. 10 Te vi jinkuiin jika de ja ka yuꞌu ndevaꞌa de ja siun tnaꞌa ndevaꞌa ñuu yun tnundoꞌo, te vi kachi de:
―¡Su ndaꞌu ni ka ñuu kaꞌnu Babilonia! Chi in ñuu ndakui ndevaꞌa ni okuu, te vitna, chi vi nunuu suaꞌa ni, te ni kenta tnundoꞌo ja ni tnaꞌa ―vi kachi de.
11 Te taka ñayiu ñuyiu ja jaꞌankuei ka xiko ñuu yun, suni vi ndaꞌi vi kanai ja jaꞌa ñuu yun, chi tu ka na ñayiu vi kiꞌin ndatniuu ka xikoi. 12 Te ndatniuu ja ka xikoi kuu oro, vi kaa ja kuu plata, vi yuu vii, vi perla, vi saꞌun kuijin vii ndevaꞌa ja kuu lino, vi saꞌun kuaꞌa nditnuu, vi saꞌun seda ja ndiꞌi vi jakuaꞌa, vi ndiꞌi nuu yutnu ja ka jaꞌan xiko asin, vi taka ndatniuu ja ni kuvaꞌa jin yuu finu nani marfil, vi yutnu vii, vi kaa ja kuu bronce, vi hierro vi yuu kuijin yeyeꞌe nani mármol. 13 Te suni ka xikoi canela vi taka ja jaꞌan xiko asin, vi suja vixin vi suja tnuyuja, vi tatna xiko, vi nduxi uva vi texeꞌen vi yuchi triu, vi triu nii, vi kiti jiso, vi ndikachi, vi kuai vi carreta, vi ka xikoi ñayiu ja vi kunukuechi. 14 Te vi kachi jin ñuu yun:
―Ja ni ka kujioo ndiꞌi kiti vixin ja ni ojioꞌo ndevaꞌa ron, te ja ni naa ndiꞌi javii javaꞌa vi jakuika ni onevaꞌa ron, te ma ndaniꞌi saꞌun ka ron ―vi kachi.
15 Te ñayiu ni ojaꞌankuei ni ka oxiko ndatniuu, te ni ka kuu kuikai ja jaꞌa ñuu yun, vi jinkuiin jikai, chi ka yuꞌi ja kana saa vi tnaꞌi tnundoꞌo ja tnaꞌa ñuu yun, te vi ndaꞌi vi kanai. 16 Te vi kachi:
Su ndaꞌu ni ka ñuu kaꞌnu yun,
chi kuu na kuinio in ñaꞌa ni oniꞌnu saꞌun kuijin vii ndevaꞌa ja kuu lino,
vi saꞌun nditnuu jin jakuaꞌa.
Te ni ondukutu vii ña jin oro
vi perla vi yuu vii ndevaꞌa.
17 Te vi nunuu suaꞌa ni, te ni naa ndiꞌi taka jakuika ni oo nui.
Vi kachi.
Te vi kujioo jika ndiꞌi tee ka skaka barco vi ndiꞌi ñayiu ka jika nuu barco vi tee ka satniuu nuu barco yun vi ndiꞌi ñayiu ka satniuu nuu ndute mar. 18 Te vi kuni ja kana ñuaꞌa kai ñuu yun, te vi kana koꞌi:
―¿Ndenu oo inka ñuu ja kintnaꞌa inuu jin ñuu kaꞌnu yaꞌa? ―vi kachi.
19 Te vi kosoi ñuyaka xini, ja ka tnaꞌu ini, te vi ndaꞌi vi kanai, te vi kachi:
Ndaꞌu ni ka ñuu kaꞌnu yaꞌa,
chi jin jakuika ni oo ñuu yaꞌa
ni ka kuu kuika ndiꞌi ñayiu ka nevaꞌa barco
ja ka jiondita nuu ndute mar.
Te vitna vi nunuu suaꞌa ni, te ni naa ndiꞌi.
Vi kachi.
20 Su vi kusii ini ron ja ka oo ron andivi,
ja siun ni naa ñuu yun.
Te vi kusii ini ron ja ka kuu ron ñayiu maa ia Dios,
vi roon ja ni chitniuu ña Jesukristu,
vi roon ja ni ka ndakani ron tnoꞌo ia Dios,
chi ni sandaa ia Dios kuechi ja ni ka saꞌa ña ñayiu ñuu yun jin ron.
Kachi tnoꞌo yun.
21 Yun te in ia ndakui ndevaꞌa ja jinokuechi nuu Dios ni kiꞌin ya in kava kaꞌnu na kuinio in yoso molinu, te ni skunta ya makee nuu ndute mar, te kachi ya:
Suni suaꞌa kanakau ñuu kaꞌnu Babilonia
nagua ni kanakau kava yaꞌa,
te ma vi ndakuni saꞌun ka.
22 Te jiñaꞌa ya nuu ñuu yun:
Ma kuni saꞌun ka ron yaa ja ka jita ñayiu
ni ja ka tee jin arpa
vi ni ja vi tiuu jin tnuyoo ndaꞌi ni trompeta.
Te ni in ñayiu ma vi kosatniuu saꞌun ka nuu ron,
te ni ma koniꞌi ka molinu nuu ron.
23 Te ni ma kuni saꞌun ka ron ja koyeꞌe ñuꞌu lámpara nuu ron.
Te ni ma kuni ka ron ja vi kana tee jin ñaꞌa ja ka kusii ini nuu ka tnandaꞌa.
Chi ñayiu ka xiko ñuu ron, ni ka okuu ñayiu ni ka okuu nijaꞌnu ñuyiu,
te ni xndaꞌu ron ndiꞌi ñuu jin tnoꞌo tasi ron.
Jiñaꞌa ya.
24 Chi tavi kuechi ñuu yun niñi ja ni ka jati ja ni ka jaꞌni tee ni ka ondakani tnoꞌo ia Dios, vi ñayiu maa ia Dios, vi ndiꞌi ñayiu ni ka jiꞌi nii ñuyiu.