1 Za̰a
Titire mbeɗe ká Za̰a ɗaa
Ɓay ká se tul feri ká ɗo ɓil mbeɗe ni key
Mbeɗe key na Za̰a ɗaa, ɓay ḭi lɛ, kér ɓayri yɔklɔ ni ɓay tul nzoɓri ká i ɗaa nzoɓ mbika lawri nduo kḭ. Nzoɓkeri ku na ɓaa mii, Vu Ŋgɛrɛwṵru ya̰a sùo ziŋ nzoɓ ɓa tusuɛ ya, ze Zezu kara ɓa Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri na ya nda̰w. Ká ɓil mbeɗe key na Za̰a ɓaa mii, nzoɓ ká ɗaa law-ɛ ɓo tul ɓay na ku lɛ, ka ti máa ɓay zúɔ ziŋ Ŋgɛrɛwṵru ɓáy Zezu Krisi ya. Rɔɓay, ka ti máa ɓay kɔ́rɔ zúɔ kḭ ɓe ɓáy nzoɓ mbika law ha̰wri ya nda̰w. Zezu Krisi na ɓa Vu Ŋgɛrɛwṵru, ɓe káʼa ví ya̰a sùo ziŋ nzoɓ. Nzoɓ ká ya̰a ɓay key ya lɛ, ka ɓa nzoɓ tul ŋga̰ni Krisi. Ŋgɛrɛwṵru ɓa zaɗ taŋa a ɓa nzoɓ law ini. Nzoɓ ká ɓa taa Ŋgɛrɛwṵru na ɗo ɓil zaɗ taŋa ɓáy law ini. Ɓe ze ɓa fe ká ɗaa ha̰ nzoɓ zǔɔke ziŋ Ŋgɛrɛwṵru nda̰w, ziŋ nzoɓ mbika law ha̰wri nda̰w pi.
Máa ɓayri ká ɗo ɓil-e
Zaɗ taŋa ɓáy suŋ tilo: 1.1–2.27
Vu Ŋgɛrɛwṵruri: 2.28–3.24
Nzoɓri ká i ɗi sùo-ri ɓa nzoɓ ya̰aŋa ɓay saa nzaa Ŋgɛrɛwṵru: 4.1-6
Híi kḭ, ɓáy mbaka tul tukɛlɛ: 4.7–5.12
Káw ɓáy kumnun ká ɗo ɓaŋguɔ: 5.13-21
1
Nasi ɓay ká se tul Zezu
1 Ɓuru ɗaa mbeɗe key na ha rì ɓay ɓáake ɓay se tul ɓe káʼa ɗo pola ɗɔɗ nda̰w rɔɔ feri ɗo ɓáy na. Ɓuru laa ɓay ɓe káʼa ɓaa nda̰w, ɓuru kɔ ni ɓáy nun ɓuru gbak gbak nda̰w, nun ɓuru hɔy kara hu ká tul-e sḭi sḭi, a ɓúru zaa ni ɓáy nduo ɓuru kḭ nda̰w pi. Ɓe na, ka ɓa Ɓay ká ha̰ nzoɓri kǎwke ɓáy kumnun, 2 a ví ya̰a sùo ziŋ nzoɓ ha̰ ɓuru kɔ ni, a ɓúru ɓa nzoɓ ɓay nasike. Sa̰wke mini ze, ɓuru ka-káa ɓay ɓe nzoɓ haŋa nzoɓri káw ɓáy kumnun ɓaŋguɔ na ha rì. Ɓe na, ka kaw lakun Bǎa Ŋgɛrɛwṵru nda̰w, rɔɔ a ví ya̰a sùo ziŋ nzoɓ ha̰ ɓuru kɔ ni. 3 Fe ká ɓuru kɔ a ɓúru laa ɓayke na, ɓuru ka-káake ha rì, ɓay haŋa ɓo ɓaarì kara, ì ɗaa law mbḭw ka ziŋ ɓuru ká ɓuru zuɔ ziŋ Bǎa ɓáy Vi-e Zezu *Krisi. 4 Ɓuru ɗaa mbeɗe se tul fe niri key na ha rì, ɓay haŋa suoriya ka ya̰a ɓil law naari kpol kpol.
Tḭ́i saa ɓil fe ɗáa ya̰a ɓay séke zaɗ taŋa
5 Ì kɔ, ɓay ká ɓuru laa ká nzaa Zezu, a ɓúru ɓaa ha rì na ze ɗo key: Ŋgɛrɛwṵru ɓa zaɗ taŋa, fe pire ndḭi mini kara zaa sùo-ɛ ya. 6 Zaɗka nzoɓ ɓaa mii, ɓeri zuɔ ziŋ Ŋgɛrɛwṵru, rɔɔ a ɗaa fe ka̰aya ɓaŋguɔ lɛ, nzoɓke ku na ɓa nzoɓ kúɗ ɓay, a fe ɗáa ɓe kara ɗo máa ɓáy tusuɛ ɓay ya. 7 Roo lɛ, zaɗka náa séri simseɗ ká ɓil zaɗ taŋa munu ká Ŋgɛrɛwṵru kḭ sùo-ɛ ɗo ɓil zaɗ taŋa na lɛ, náa zuɔri ziŋ kḭ ɓa lie ɓa lew, a ha̰ sím Zezu Vu Ŋgɛrɛwṵru na wàa feya̰a naari kaɗ kaɗ riw bele.
8 Zaɗka nzoɓ ɓaa mii, ɓeri ɗaa feya̰a ya lɛ, ɓe kḭ sùo-ɛ ze ula sùo-ɛ, a tusuɛ ɓay kara ti ɓil law-ɛ ya. 9 A roo lɛ, zaɗka náa tinari feya̰a naari ha̰ Ŋgɛrɛwṵru lɛ, kaʼa ndáka bumake ziŋ naari, a wàa naari *taŋ kaɗ kaɗ ká tul fe ka̰aya naari na riw bele, ɓay ḭi lɛ, ka ɓa nzoɓ káʼa ɗo tul ɓay ɓe, a ɗaa fe ká ɗo ɓáy zaɗɛ nzɛɗɛm. 10 Zaɗka náa ɓaari mii, náa ɗáari feya̰a ya lɛ, náa ɗiri Ŋgɛrɛwṵru ɓa nzoɓ kúɗ ɓay, a Ɓay ɓe kara ɗo ɓil law naari ya.