5
Mbaka tul tukɛlɛ
Nzoɓ ha̰a ha̰a ká ɗaa law-ɛ ɓo tul Zezu, a kɔ ni ɓa *Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri lɛ, ka ɓa vu Ŋgɛrɛwṵru. A nzoɓ ká hii bǎa leɗ lɛ, ka hii vi-eri na nda̰w. Ì kɔ, faa ká náa kɔ́keri mii, náa hiiri vu Ŋgɛrɛwṵruri na ze ɗo key: náa hiiri Ŋgɛrɛwṵru, a náa ɗáari vu mbom ɓo tul bol kusol-eri. Tusuɛke lɛ, híi Ŋgɛrɛwṵru na, ɓa ɗáa vu mbom ɓo tul bol kusol-eri. A bol kusolkeri ku na ɓa soɓa ká hii ɓamba ya, ɓay ḭi lɛ, nzoɓri riw bele ká i ɓa vu Ŋgɛrɛwṵruri na, i maa ɓay mbaka tul feri ká tukɛlɛ key. Náa mbári tukɛlɛ na ɓáy faa ɗáa law ɓo tul Zezu. A wa̰a, nzoɓ ve ze maa mbaka tul tukɛlɛ na lɛ? Ɓa ɓe huo-ɛ hɔy ká kɔ Zezu ɓa Vu Ŋgɛrɛwṵru.
Nasi ɓay ká se tul Zezu
Zezu *Krisi na, ɓa ɓe káʼa vi tusiri key, a ha ri ɗaa tul-e nduo mbii, a sím ɓe uo yaw yaw ká tul puu say huɗ. Ɓa mbii ku kḭ hɔy ze, kiɛ ɓay nasike ya, roo lɛ, ɓa mbii ɓáy sím siɗi bele* 5.6 Ká zaɗ ni key na «mbii» kiɛ ɗáa tul Zezu nduo mbii, a sím laa lɛ, kiɛ huɗ Zezu ká tul puu say huɗ.. A Tem Ŋgɛrɛwṵru kḭ sùo-ɛ kara ɓaa nasi ɓayke nda̰w mii, fekeri ku na ɗo ɓa tusuɛ kḭ, ɓay ḭi lɛ, Tem Ŋgɛrɛwṵru na ɓa tusuɛ ɓay. Ɓe mini ze, fe nasi ɓaykeri na ɓa say, Tem Ŋgɛrɛwṵru nda̰w, mbii nda̰w, rɔɔ sím nda̰w pi. Fekeri riw bele ku na zuɔ ziŋ kḭ mbḭw hɔy. Naari na, zaɗka nzoɓri ɓaa nasi ɓay fe lɛ, náa ya̰ari ɓayke, roo lɛ, nasi ɓay Ŋgɛrɛwṵru na mba tul-e ɓe nu ku ɓáy. Ɓa ɓe na kḭ ze ka ɓa nzoɓ nasi ɓay ká se tul Vi-e na. 10 Nzoɓ ká ɗaa law-ɛ ɓo tul Vu Ŋgɛrɛwṵru lɛ, nasi ɓayke key na ɗo ɓil law-ɛ. A nzoɓ ká ɗaa law-ɛ ɓo tul ɓay ká Ŋgɛrɛwṵru ɓaa na ya lɛ, ka ɗi Ŋgɛrɛwṵru ɓa nzoɓ kúɗ ɓay, ɓay ḭi lɛ, ka ya̰a ɓay káʼa ɓaa se tul Vi-e na ya. 11 Ì kɔ, nasi ɓay ká Ŋgɛrɛwṵru ɓaa ha̰ naari na ze ɗo key: Ŋgɛrɛwṵru ha̰ naari kumnun ká ɗo ɓaŋguɔ. Káw ɓáy kumnunke ku na, ɗo ɓáy faa Vi-e. 12 Nzoɓ ká zuɔ ziŋ Vi-e na, ka ɗo ɓáy kumnunke na; a nzoɓ ká zuɔ ziŋ ni ya lɛ, kumnunke na ɓa taa ɓe ya.
Síŋ tul ɓay
13 Ɓaarì ká ì ɗaa law-rì ɓo tul Vu Ŋgɛrɛwṵru na, mì ɗaa mbeɗe se tul fe niri key ha rì ɓay haŋa rì kɔ́ke ta-taŋ mii: ì ɗo ɓáy kumnun ká ɗo ɓaŋguɔ na. 14 Ká pol Ŋgɛrɛwṵru na, náa ti ɗokori ɗi ɓáy law tɔ́kɔke ya, ɓay ḭi lɛ, náa kɔ́ri ta-taŋ ɓa tusuɛ kḭ: zaɗka náa vbíri ni fe ɓáy faa law hiiya ɓe lɛ, ka laa naari. 15 Munu ká náa kɔ́ri ta-taŋ nda̰w mii, Ŋgɛrɛwṵru laa ɓay feri riw bele ká náa vbíri ni na, náa kɔ́ri nda̰w, feri ká náa vbíri ni na, náa ziŋri ro.
16 Zaɗka nzoɓ kɔ yṵ-ɛ ɗaa feya̰a ká se ziŋ ni ɓa zaɗ huɗ ká ɗo ɓaŋguɔ ya lɛ, ndaɗ ɓay ɗáa nzaa ɓay kere ɓay tul-e, lɛ, Ŋgɛrɛwṵru a haŋa ni káw ɓáy kumnun. Mì ɓaa ɓay key na se tul nzoɓri ká i geɗe tul feya̰a ká ha ri se ɓa zaɗ huɗ na ya. Tusuɛke lɛ, feya̰a ká ha̰ nzoɓ se ɓa zaɗ huɗ na ɗo ɗi ku, roo lɛ, mì baka rì ɓay haŋa rì ɗaa nzaa ɓay kere ɓay tul nzoɓ ká ɗaa munu ku na ya. 17 Fe ɗáa ka̰ayari riw bele na ɓa feya̰a. Roo lɛ, feya̰ari riw bele na ha̰ nzoɓ se ɓa zaɗ huɗ ya.
18 Náa kɔ́ri nda̰w, nzoɓ ká ɓa vu Ŋgɛrɛwṵru na ti geɗe tul feya̰a ya, ɓay ḭi lɛ, Zezu, Vu Ŋgɛrɛwṵru ze kɔrɔ ni, a ŋgɛrɛtemndaya na ti mgbaka ni vɛɓ, a ɗaa fe sɛkɛ ziŋ ni ya. 19 Náa kɔ́ri nda̰w, naari na, náa ɓári taa Ŋgɛrɛwṵru, a nzoɓ tukɛlɛri riw bele na, ŋgɛrɛtemndaya ze re mbay ká tul-ri. 20 Náa kɔ́ri nda̰w, Zezu Vu Ŋgɛrɛwṵru na vi tusiri key, a ha̰ naari nun nzɛm ɓay haŋa náa tuuri Ŋgɛrɛwṵru taa tusuɛke. Naari na, náa zuɔri ziŋ Ŋgɛrɛwṵru taa tusuɛ ɓáy faa Vi-e Zezu *Krisi. Ɓe na, ka ɓa Ŋgɛrɛwṵru taa tusuɛ, a ɓa káw ɓáy kumnun ká ɗo ɓaŋguɔ na.
21 Ɓe mini ze, yṵ-iri, ì nzɛ ɓáy sùo-rì! Ndaɗ ɓay haŋa rì puo wṵru taa gɔɓ gɔɓkeri ya.

*5:6 5.6 Ká zaɗ ni key na «mbii» kiɛ ɗáa tul Zezu nduo mbii, a sím laa lɛ, kiɛ huɗ Zezu ká tul puu say huɗ.