1 Tesalonikri
Titire mbeɗe ká Pol ɗaa / ha̰ nzoɓ mbika lawri ká Tesalonik
Ɓay ká se tul feri ká ɗo ɓil mbeɗe ni key
Mbeɗe key na Pol ɗaa ha̰ nzoɓ mbika lawri ká i ɓa nzoɓ fieri ká ɓe kḭ ka ɓa nzoɓ ɗáa ha ri mbṵ tul kḭ ká Tesalonik, ŋgɛrɛpuo luye ká kuɗu zaɗ ká Maseduwa̰n. Fal zɔ́l ɓe ká ɗi na, ka pie Timote se luo-ri, a yḭ́i Timote káʼa lo soro ɓay nzoɓ mbika lawri ká i mbṵ tul kḭ í ɗo ɓáy kere na báyḭi lɛ, Pol ɗaa mbeɗe key na a ɗáake taambɔl ha̰ Ŋgɛrɛwṵru ɓay tul sṵ́u law ká tul mbika law ɓari nda̰w, law ini ká i ɗǒke, ɓáy lawri ká i ɗaa nzokɗo te tul Ŋgɛrɛwṵru nda̰w pi.
Ka leke ɓay vbiw nzoɓ ha̰nɛri ká se tul yḭ́i Ŋgɛrɛmbay. Nzoɓ mbika lawri ká Tesalonik ɗaa law-ri te ɗi mii, Ŋgɛrɛmbay na a yḭ́i koɗ hɔy. Roo lɛ, munu káʼa yḭ̀i a vi ya ɓáy na, i vbi-vbiw mii: síe ha̰a nda̰w rɔɔ Ŋgɛrɛmbay na a yḭ́i a vi lɛ? Mase, nzoɓ mbika lawri ká i hu pola, rɔɔ Zezu a yḭ́i a vi na wa̰a, a ɗoko mina ro ɓay tul-ri lɛ?
Pol ɓaa ha̰ nzoɓ mbika lawri ɓay haŋa ri kɔ ta-taŋ mii, Ŋgɛrɛmbay na a yḭ́i a vi na kḭ, lɛ, nzoɓ mbika lawri riw bele i káw ziŋ ni mbḭw hɔy. Ká ɓay gíyaŋke namke na, Ŋgɛrɛwṵru hii ɓay haŋa ri ɗaa peɗ ɓari na nun-ri ka ɓa pola ɓáy suoriya.
Máa ɓayri ká ɗo ɓil-e
Taambɔl ɓáy pisi Ŋgɛrɛwṵru: 1–3
Simseɗ ká rii law Ŋgɛrɛwṵru: 4.1-12
Yḭ́i Ŋgɛrɛmbay: 4.13–5.11
Peɗ ɗáa nzoɓ mbika lawri, ɓáy síŋ tul ɓay: 5.12-28
1
Soko ká Pol hii ha ri
1 Ɓi Pol, rɔɔ Silas* 1.1 Silas mase Silvin na, ɓa riŋ ká mbḭw hɔy. Ɓáy nzaa gɛrɛk lɛ, ɓa Silvin, a ɓáy nzaa eboro laa lɛ, ɓa Silas., ɓáy Timote nda̰w na, ɓuru ɗaa mbeɗe key na ha rì ɓaarì nzoɓ mbika lawri ká ì mbṵ tul kḭ ká Tesalonik, ɓaarì ká ì zuɔ ziŋ Bǎa naari Ŋgɛrɛwṵru ɓáy Ŋgɛrɛmbay Zezu Krisi. Ndaɗ ɓay haŋa law huoke ɓáy ɗɛkɛkɛ Ŋgɛrɛwṵru ka sáɗ ziŋ rì.
Mbika law ɓáy simseɗ nzoɓri ká Tesalonik
2 Ɓuru ɗaa taambɔl ha̰ Ŋgɛrɛwṵru ɓaŋguɔ kpaɗara ɓay tul-rì riw bele, a ɓúru ker se tul-rì ɓaŋguɔ ká ɓil nzaa ɓay kere ɓuru. 3 Ká pol Bǎa naari Ŋgɛrɛwṵru na, ɓuru ker se tul mbika law ɓaarì ká ɗaa peɗ nda̰w, ɓáy law ini ká ì ɗǒke ká ɗaa ha rì ɗáake peɗ ŋgɔ-ŋgɔŋ nda̰w, rɔɔ ɓáy law-rì ká ì ɗaa nzokɗo te tul Ŋgɛrɛmbay naari Zezu *Krisi ká ɗaa ha rì sṵ̌uke law-rì nda̰w na.
4 Ɓaarì yṵ ɓururi ká Ŋgɛrɛwṵru kɔ rì ɓa nzoɓ nun-ɛ na, ɓuru kɔ mii, Ŋgɛrɛwṵru nan rì ha rì ɓa nzoɓ taa ɓe, 5 ɓay ḭi lɛ, káa Ɓay Kere Krisi ká ɓuru kaa ha rì na, ɓa ɓay ká tḭi ká nzaa ɓuru hɔy ya, roo lɛ, ɓa ɓay ká tḭi ɓáy hṵrusuo, ɓáy faa Tem Law Pie, rɔɔ ɓúru kɔ ta-taŋ nda̰w mii, ɓa tusuɛ ɓay. A ɓaarì kara ì kɔ simseɗ ɓuru ká sakra ɓaarì ɓáy nun-rì; ɓuru ɗaa munu ɓay sɔ́kɔke rì. 6 Ɓaarì kḭ hɔy kara ì mboro simseɗ ɓuru ɓáy simseɗ Ŋgɛrɛmbay. Ze nzoɓri ɗáa rì kɔ sɛkɛ fe ŋgḭi ɓamba ɓay tul Ɓay Kere Krisi ká ì ya̰a na hɔy kara, ì ya̰a ɓayke ɓáy suoriya ká Tem Law Pie ha rì na. 7 Ɓe nda̰w rɔɔ, ì víke ɓa nzoɓri ká ì kiɛ simseɗ ɓaarì ha̰ nzoɓ mbika lawri riw bele ká kuɗu zaɗ ká Maseduwa̰n ɓáy Akayi na i kɔ í mbóro. 8 Ɓa tusuɛ kḭ, Ɓay Ŋgɛrɛmbay na, uru ká luo-rì a tḭi kuɗu zaɗ ká Maseduwa̰n ɓáy Akayi hɔy ya, roo lɛ, law-rì ká ì ɗaa ɓo tul Ŋgɛrɛwṵru ká ɓayke ya̰a zaɗ kpol kpol riw bele na, ɗaa ha̰ ɓuru se síe loko soroke mbǎa. 9 Nzoɓri riw bele lo soro faa ká ì mgbake ɓuru ɓa sùo-rì ɓáy nam ká ɓuru ɗǒke sakra ɓaarì, rɔɔ faa ká ì pɔ̌ŋke púo wṵruri í fɛrɛ sùo-rì ɓa luo Ŋgɛrɛwṵru ɓay ɗáa peɗ ha̰ ni, ɓe káʼa ɓa Ŋgɛrɛwṵru tusuɛ, Nzoɓ Káw Ɓáy Kumnun, 10 ɓay gíyaŋke Vi-e káʼa úru saa nulue. Ɓa ɓe Zezu ká Ŋgɛrɛwṵru tina ni saa luɔ huɗ ha̰ ni ya̰a naari ká tul hɛrɛ ɓe káʼa ɓóko tul nzoɓri ɓáy nam káʼa ví vuku na.
*1:1 1.1 Silas mase Silvin na, ɓa riŋ ká mbḭw hɔy. Ɓáy nzaa gɛrɛk lɛ, ɓa Silvin, a ɓáy nzaa eboro laa lɛ, ɓa Silas.