1 Titire ɗɛkrɛ lɛ, mì ɓaa ha̰ nzoɓ mbika lawri ɓay haŋa ri ɗaa nzaa ɓay kere ha̰ Ŋgɛrɛwṵru ɓaŋguɔ, ɓay vbikake ni feri nda̰w, ɓay kóɗ ni ɓay tul nzoɓri nda̰w, rɔɔ ɓay haŋa ni taambɔl ɓay tul nzoɓri riw bele, 2 ɓay tul mbayri nda̰w, nzoɓ rewpuori riw bele nda̰w, ɓay haŋa ɓo ɗɛkɛkɛ ka ɗo puo naari ha̰ náa káwkeri ɓáy kere, a náa ɗáakeri mbay ka ɓo tul Ŋgɛrɛwṵru ɓáy faa simseɗ kere. 3 Ɓe ze ɓa fe ká ndaɗ ɓamba, a rii law Ŋgɛrɛwṵru Nzoɓ Ya̰aŋa naari na. 4 Ɓe na, ka hii ɓay haŋa nzoɓri riw bele ziŋ pam, a hii ɓay haŋa ri tuu tusuɛ ɓay nda̰w. 5 Ì kɔ, tusuɛke lɛ, Ŋgɛrɛwṵru na mbḭw. Nzoɓ ká ɗo sikɗa ɓe ɓáy nzoɓri kara mbḭw nda̰w; nzoɓke na ze ɓa Zezu *Krisi. 6 Ɓe na ka mbi sùo-ɛ ha̰ huɗ a púoke mbɔl tul nzoɓri riw bele, a tǐnake ri saa ɓil koy feya̰a. Ka ɗaa munu ɓáy nam ká Ŋgɛrɛwṵru tuu na, a kǐɛke nzoɓri ta-taŋ mii, Ŋgɛrɛwṵru hii ɓay ya̰aŋa nzoɓri riw bele. 7 Sa̰wke mini ze, Ŋgɛrɛwṵru ɗáa mì kaw ɓa nzoɓ ka-káa ɓay ɓe, a mí ɓa nzoɓ ndáy nzaapeɗ ɓe ɓay fére nzoɓri ká i ɓa Ziɓ ya na feri riw bele ká náa ɗáari law naari ɓo ɗi nda̰w, a mí fere ri tusuɛ ɓay na nda̰w pi. Ɓay ká mì ɓaa key na ɓa sùo ɓay kḭ ɓo, ɓa kúɗ ɓay ya.

8 Munu zu lɛ, zaɗri riw bele ká ì mbṵ kḭ ká ɗi na, mì hii ɓay haŋa wa̰rari ɗaa nzaa ɓay kere, í ǔrake nduo-ri ɓa siya ɓáy ɓil law-ri ká *taŋ kaɗ kaɗ taŋ law fá̰a nda̰w, taŋ rɔɗi nda̰w pi* 2.8 Ká sa̰w Ziɓri na, zaɗka i ɗo ɗáa nzaa ɓay kere lɛ, i ura nduo-ri ɓa siya nda̰w rɔɔ, í ɗáake nzaa ɓay kere na ɓáy.. 9 A má̰yri laa lɛ, mì hii ɓay haŋa ri nduo gari ká ɓáy faake, í kǔɗke nun nzoɓ ya, a í ɓa nzoɓ fe ɗáa bayluri ya nda̰w. I ti ɓá nzoɓ mgbaka tul vá̰yta̰y vá̰yta̰y ya, i ti nzáa fe gamari munu ká ɓa fe suku ɓáy zawri ká ndṵy zḭriri zḭriri ká i ɗaa ɓáy lari lɔr ya nda̰w, rɔɔ gariri ká larike ŋgɔŋ kal tul-ri ya nda̰w pi. 10 Roo lɛ, ndaɗi má̰y nzoɓ na ɓa peɗ ɗáa kere ɓe. Ɓe ze ɓa peɗ ɗáa má̰yri ká i kɔ sùo-ri ɓa nzoɓ hḭ́ɛ Ŋgɛrɛwṵru. 11 Má̰yri ká i ɗo fére ri fe na, ndaɗ ɓay haŋa ri káw ɗɛkɛkɛ í ɗiŋ tul-ri ká pol nzoɓ ká ɗo fére ri fe na. 12 Má̰yri na, mì ha̰ faa ha ri ɓay haŋa ri fére wa̰rari fe ya, a í re mbay ká tul-ri ya nda̰w. Roo lɛ, ndaɗ ɓay haŋa ri káw ɗɛkɛkɛ† 2.12 Ká zaɗ ni key na, Pol haa má̰yri ɓay haŋa ri ɗaa feri ká sakra nzoɓ mbika lawri na ya. Roo lɛ, ka hii ɓay haŋa má̰yri na, i re tul wa̰rari ká zaɗ mbṵ́ kḭ nzoɓ mbika lawri ya. Ì kḭi mbeɗe niri ká ɓaa ɓay se tul peɗ ɗáa má̰yri na í kɔ: Peɗ 18.26; 1 Kɔ 11.5; Tit 2.3-4.. 13 Tusuɛke lɛ, Ŋgɛrɛwṵru ɗaa *Adam ze pola nda̰w rɔɔ a ɗaa *Ɛv tɔŋ ɗi ɓáy. 14 Rɔɓay, ɓa Adam ze ŋgɛrɛtemndaya ula ni ya, roo lɛ, ɓa Ɛv ze ya̰a nzaa úla ŋgɛrɛtemndaya na, a wǎɗke tul *bol kusol Ŋgɛrɛwṵru. 15 A ze munu hɔy kara, má̰yri na, i mboŋ nzoɓ, a lɛ, i zíŋ pam ká luo Ŋgɛrɛwṵru. Roo lɛ, ndaɗ ɓay haŋa ri geɗe tul mbika law ɓari nda̰w, í hii nzoɓri nda̰w, í ɗo ɓáy zaɗɛ nzɛɗɛm ká nun Ŋgɛrɛwṵru nda̰w, a í sìi sùo-ri ya nda̰w rɔ‡ 2.15 Ká zaɗ ni key na, Pol tuŋ fe fére bayluri ká ɓaa mii ya̰aŋa kḭ ɓa fe ká ndaya nda̰w, rɔɔ mboŋ nzoɓ na kara ɓa fe ká ndaya nda̰w pi na. Pol hii ɓay haŋa má̰yri na ɗaa fe ká ɗo nun ɗáa má̰yri na nda̰w rɔ!!