Efɛzri
Mbeɗe ká Pol ɗaa ha̰ nzoɓ mbika lawri ká Efɛz
Ɓay ká se tul feri ká ɗo ɓil mbeɗe ni key
Mbeɗe key na nzoɓri ker í ɓaa mii, ɓa mbeɗe ká i ɗaa se sakra nzoɓ mbika lawri ká i mbṵ tul kḭ ɓáy zaɗri ɓoɗ ɓoɗ ká tusiri Azi Miner, ká ŋgɛrɛpuo Efɛz ɗo ɗi na. Ká ɓil mbeɗe key na, Pol ɗaa ha ri kɔ fe ká Ŋgɛrɛwṵru mbi nzi-ɛ ká ɗi piɛɗke lew hɔy ɓay ɗáa. Kaʼa mbṵ́ feri riw bele ká nulue nda̰w, tusiri key nda̰w zuɔ pol mbay ká mbḭw hɔy ká ɓa Krisi.
Mbṵ tul kḭ nzoɓ Krisiri riw bele na, Ziɓri ɓáy nzoɓri ká i ɓa Ziɓ ya na, i zuɔ ziŋ kḭ mbḭw hɔy ɓa sùo ká mbḭw, ká Krisi ɓa tul. Zúɔ kḭke ku na ɗo munu, ɓay ḭi lɛ, Ŋgɛrɛwṵru nan nzoɓri zuɔ ɓoɗ ɓa taa ɓe, a nda buma ziŋ ri ɓay tul fe ká Krisi ɗaa, a ha ri pam ɓáy faa law kere ɓe. Ka ha̰ Tem Law Pie ha̰ nzoɓ taa ɓeri. Ɓa ɓe Tem Law Píeke na ku ze ka ɗaa ha ri zuɔ ziŋ kḭ. Ɓe ze, zaɗka nzoɓ mbika law ha̰a ha̰a ɗaa peɗ ɓe peɗ ɓe na lɛ, nzoɓ mbika lawri ká i mbṵ tul kḭ na, i zíŋ hṵrusuo a í ŋgɔŋ ká ɓil mbika law ɓari na ɓa pola pola. Mbeɗe key na, ɓaa ɓay rɔɓay se tul fe ká nzoɓ mbika lawri ɗáa ɓay kíɛke zúɔ kḭke na ha̰ ni ka ɗo ɓa fe tusuɛ: mgbaka ini nda̰w, ɗáa vu mbom ɓo tul kḭ nda̰w, rɔɔ haŋa taambɔl ha̰ Ŋgɛrɛwṵru nda̰w pi.
Máa ɓayri ká ɗo ɓil-e
Pam ká ɓáy faa Krisi: 1–2
Zúɔ kḭ nzoɓ mbika lawri: 3.1–4.16
Simseɗ nzoɓri ká i zuɔ ziŋ Krisi: 4.17–6.24
1
Soko ká Pol hii ha̰ nzoɓ mbika lawri
1 Ɓi Pol ká Ŋgɛrɛwṵru ha̰ mì ɓa nzoɓ ndáy nzaapeɗ Zezu *Krisi ɓáy law hiiya ɓe na, mì ɗaa mbeɗe key na ha rì ɓaarì nzoɓ taa Ŋgɛrɛwṵruri ká ì kaw Efɛz*1.1 Ká ɓil tá̰w mbeɗe ha̰nɛri ká piɛɗke lew na, i ɗaa «ká i kaw Efɛz» na ɗo ɗi ya., ká í ɗaa law-rì ɓo tul Zezu Krisi. 2 Ndaɗ ɓay haŋa law huoke ɓáy ɗɛkɛkɛ Bǎa naari Ŋgɛrɛwṵru, ɓáy Ŋgɛrɛmbay Zezu Krisi ka sáɗ ziŋ rì.
Fe kere ká Ŋgɛrɛwṵru ha̰ naari ɓáy faa zúɔ ziŋ Zezu Krisi
3 Náa písiri Ŋgɛrɛwṵru, Bǎa Ŋgɛrɛmbay naari Zezu *Krisi, ɓe káʼa ha̰ naari fe sa̰mi ɓáy riŋ-ɛ riŋ-ɛ riw bele ká nulue ɓáy faa zúɔ ziŋ Krisi! 4 Ì kɔ, pola rɔɔ ɓay haŋa Ŋgɛrɛwṵru ɗaa tusiri na, ka naa naari zuɔ ɓoɗ ɓa taa ɓe ɓáy faa Krisi, ɓay haŋa ɓo náa táŋri kaɗ kaɗ ká pol-e taŋ ɓay ká tul naari.
Ɓáy faa law ini ɓe na, 5 ka mbi nzi-ɛ pola lew hɔy ɓay haŋa náa ɓári vi-eri ɓáy faa Zezu Krisi. Ka ɗaa munu, ɓay ḭi lɛ, feke ku na rii law-ɛ. 6 Munu zu lɛ, riŋ ɗika ɓa taa Ŋgɛrɛwṵru ɓay tul bawda law kere ɓe káʼa ha̰ naari ɓáy ɓil law-ɛ puluk, ɓay ḭi lɛ, náa zuɔri ziŋ Vi-e káʼa kɔ ni ɓa nzoɓ nun-ɛ na. 7 Ɓáy faa sím ɓe ká uo ká tul puu say huɗ na, Ŋgɛrɛwṵru tǐnake naari saa ɓil hṵrusuo feya̰a ká mgba naari ɓa koy, a nda bumake ziŋ naari. Ɓe ze, ka kiɛ naari bawda law kere ɓe ká mba kḭiŋa fal-ɛ wuruk wuruk na, 8 a há̰ke naari nun nzɛmri ɓáy gosi fe kɔ́kɔri riw bele. 9 Ka ha̰ náa kɔ́ri fe ká ɗo zaɗ muni káʼa mbi nzi-ɛ ká ɗi piɛɗ lew hɔy ɓáy law hiiya ɓe ɓay ɗáa ɓáy faa Krisi na. 10 Feke ku na, ɔ́rɔ ɓie nam na lɛ, feri riw bele ká nulue nda̰w, tusiri key nda̰w na, káʼa mbṵ́ zuɔ tul kḭ mbḭw hɔy ká pol mbay ká mbḭw hɔy ká ɓa Krisi.
11 Ɓáy faa zúɔ ziŋ Krisi na, ɓuru Ziɓri na ɓuru ziŋ fe kereri ká Ŋgɛrɛwṵru waa ɓay tul nzoɓ ɓeri, ɓay ḭi lɛ, ka naa ɓuru pola lew hɔy ɓáy faa káʼa leke. Fekeri riw bele ku na, ka ɗaa maa ɓáy fe káʼa hii a mbi nzi-ɛ ká ɗi ɓay ɗáa sùo-ɛ. 12 Munu zu lɛ, ɓuru Ziɓri ká ɓuru ɓa titire nzoɓri ká ɓuru ɗaa law ɓuru nzokɗo te tul Krisi na, ɓuru ɗaa riŋ ɗika ɓo tul Ŋgɛrɛwṵru ká ɓa bawda nzoɓ luye!
13 A ɓaarì ká ì ɓa Ziɓ ya na hɔy kara, zaɗka ì laa tusuɛ ɓay ká ɓa Ɓay Kere ká ha rì zǐŋke pam na, ì ɗáake law-rì ɓo tul Krisi. Ɓe ze, Ŋgɛrɛwṵru téke surum zuɔ sùo-rì ɓa taa ɓe, a há̰ke rì Tem Law Pie káʼa waa ɓayke pola na†1.13 Ì kḭi Ezekiyɛl 36.26-27; 37.14; Zuyɛl 2.28-30.. 14 Temke ku na, ɓa fe ká Ŋgɛrɛwṵru ha̰ a kǐɛke mii, fe kereri riw bele káʼa waa ɓay tul nzoɓ ɓeri na, náa zíŋri ŋgiɗ bele ɓáy nam káʼa tínake naari wṵ̌m saa ɓil hṵrusuo feya̰a ká mgba naari ɓa koy na. Riŋ ɗika ka ɓa taa ɓe!
Nzaa ɓay kere Pol
15 Ɓe mini ze, úru saa nam ká mì láake soro ɓay law-rì ká ì ɗaa ɓo tul Ŋgɛrɛmbay Zezu, rɔɔ ɓáy ini ká ì mgba ziŋ nzoɓ mbika lawri riw bele na, 16 mì ɗaa taambɔl ha̰ Ŋgɛrɛwṵru ɓaŋguɔ ɓay tul-rì. 17 Ká ɓil nzaa ɓay kere ɓiri na, zaɗka mì ker se tul-rì lɛ, mì vbi Ŋgɛrɛwṵru, Bǎa Nzoɓ Riŋ Ɗika Luye ká ɓa Ŋgɛrɛwṵru Ŋgɛrɛmbay naari Zezu *Krisi na, ɓay haŋa ni ka ha rì Tem Law Pie ha̰ ni ka ha rì nun nzɛm nda̰w, kɔ́kɔ sa̰w feri nda̰w ɓo, í tǔuke ni ta-taŋ. 18 Mì koɗ ni ɓay haŋa ni ka mgbúɗa nun ɓil law-rì ká nziiya ɓay haŋa rì kɔ fe ká ì ɗaa law-rì te ɗi nzokɗo káʼa ɗíke rì ɓayke na. Mì koɗ ni ɓay haŋa rì kɔ fe riŋ ɗika luye káʼa ɗaa ɗo ɓay tul nzoɓri ká i ɓa taa ɓe, 19 rɔɔ ɓáy bawda hṵrusuo ká ɗo ɓay tul naari ká náa ɗáari law naari ɓo tul-e na, maa ɓay mgbaka a líeke fe kḭri ya. Hṵrusuoke ku na, ɓa ha̰y ká Ŋgɛrɛwṵru tina ɗo zaɗ hie ɓáy bawda hṵrusuo-ɛ 20 ɓáy nam káʼa tǐnake Krisi saa luɔ huɗ ha̰ ni kaw tunduo hoɗo ɓe ká nulue. 21 Ká zaɗɛ ku na, Krisi re mbay ká tul hṵrusuo temri riw bele ká re mbay nda̰w, tul nzoɓ réke tul nzoɓri riw bele nda̰w, tul hṵrusuori riw bele nda̰w, tul hṵrusuo ká kal tul hṵrusuo ha̰wri riw bele nda̰w, rɔɔ ɓáy riŋri riw bele ká mgba ká ɓil sew ni key hɔy ya, roo lɛ, ká ɓil sewri káʼa ví vuku kara nda̰w pi. 22 Ɓa tusuɛ, Ŋgɛrɛwṵru ɗaa feri riw bele zuɔ pol Krisi a ha̰ ni ɓa mbay luye ká tul nzoɓ mbika lawri riw bele 23 ká i ɓa sùo-ɛ na. Ká sakra nzoɓ mbika lawri na, Krisi ya̰a zaɗ kpol kpol ká ɗi, ɓa ɓe kḭ ze ka ya̰a zaɗri riw bele.