9
Pol rɛ sùo-ɛ ɓay tul leɗ Izarayɛlri
1 Ɓáy riŋ *Krisi lɛ, ɓay ká mì ɓáa na ɓa sùo ɓay kḭ ɓo, ɓa kúɗ ɓay ya. Kér ɓay ká ɓil wa̰ra law-i ɓáy faa Tem Law Pie kara, ɓaa nasi ɓayke mii: 2 mì ɗaa síe ŋgḭi ɓamba tasiri, a law-i kara nzɛ mgbuk mgbuk ɓaŋguɔ ɓay tul sa̰w ɓiri ká i ɓa Ziɓri. 3 Mì rɛ sùo-i ɓay haŋa ɓi ze, maa lɛ, ɓeɓi ka mgba tul-i a wálke sakra ɓi ɓáy Krisi ɓay tul yṵ-iri ha ri ziŋ pam, ɓari ká i ɓa sa̰w ɓiri na. 4 Ɓari na, i ɓa leɗ Izarayɛlri*9.4 Leɗ Izarayɛlri na, i ɓa vu bulu Zakoɓ. Ɓe Zakoɓ na, Ŋgɛrɛwṵru ha̰ ni riŋ ɓa Izarayɛl. ká Ŋgɛrɛwṵru nan ri, a ɗaa ri zuɔ ɓoɗ ha ri vi ɓa vi-eri. Ka ha ri kɔ riŋ ɗika ɓe nda̰w, a saa kuniri ziŋ ri nda̰w, a ha ri bol kusol nda̰w, a kiɛ ri faa rúo ni nda̰w, rɔɔ a waa feri ká ɓay tul-ri nda̰w pi. 5 I ɓa vu bulu *Abaraham, Izak, ɓáy *Zakoɓ, a Krisi kḭ sùo-ɛ ká ví ya̰a sùo ziŋ nzoɓ na hɔy kara, ɓa sa̰w ɓari nda̰w. Ŋgɛrɛwṵru Nzoɓ Káw Tul Feri Riw Bele na, ndaɗ ɓay písi ni ɓaŋguɔ kpaɗara! Amɛm!
6 Ɓe ze ɓa fe ɓáa mii, ɓay ká Ŋgɛrɛwṵru waa na, ɓa fe ká gɔr hɔy ya. Ì kɔ, vu bulu Izarayɛlri riw bele ze i ɓa sa̰w *Izarayɛl taa tusuɛkeri ya. 7 Vu bulu Abarahamri hɔy kara, i ɓa vi-e taa tusuɛkeri riw bele ya nda̰w, ɓay ḭi lɛ, Ŋgɛrɛwṵru ɓaa ha̰ Abaraham mii: «Ɓáy faa vi-e Izak ze vu bul-eri i rúɔke ɓamba munu ká mì waa ɓayke ziŋ mù na†9.7 Tiika sa̰w fe 21.12..» 8 Ɓay key na kiɛ mii, ɓa nzoɓri riw bele ká i mboŋ ri ká sa̰w Abaraham ze i ɓa vu Ŋgɛrɛwṵru taa tusuɛkeri ya. Roo lɛ, ɓari huo-ri ká i mboŋ ri ɓáy faa ɓay ká Ŋgɛrɛwṵru waa na hɔy ze, i ɓa vu bulu Abaraham taa tusuɛkeri. 9 Ɓay ká Ŋgɛrɛwṵru waa ɓay tul-e na ze ɗo key: «Káy kḭ ká ɓáy ɓil few ká mini key ká mì yḭ́i ɓay ví na, *Saara a mbóŋ leɗ wa̰ra nzoɓ‡9.9 Tiika sa̰w fe 18.10,14. Leɗ wa̰ra nzoɓke na ɓa Izak ká ya̰a Rebika ɓa má̰y ɓe..» 10 Ɓa ɓe nu ku hɔy ya, vu Rebikari ká i ɓa leɗ ndɔ̰ŋɔri na, bǎa ɓari mbḭw hɔy ɓa bulu naari Izak. 11-12 Roo lɛ, pola rɔɔ ɓay haŋa Rebika mboŋ ri na, Ŋgɛrɛwṵru ɓaa ha̰ ni mii: «Ŋgɛrɛ leɗ na a ɗíŋ tul-e ká sa̰w ɓal nzoɓ vbiele§9.11-12 Tiika sa̰w fe 18.10,14..» Ɓáy ɓil sew ká Ŋgɛrɛwṵru ɓaa ɓay ku na lɛ, leɗ ndɔ̰ŋɔri na, i mboŋ ri ya ɓáy, a fe kere mase fe ka̰ayari kara, leɗkeri ku na i ɗaa ya ɓáy. Ze Ŋgɛrɛwṵru na nan nzoɓri a ɗi ri ɓáy faa káʼa leke ɓo, ɓáy faa peɗ ɗáa nzoɓ ya, 13 munu káʼa ɓaa ɗo ɓil mbeɗe ɓe mii: «Mì hii Zakoɓ, a mí pɔŋ *Esaw*9.13 Malasi 1.2-3..»
Ŋgɛrɛwṵru ɓa mbay tul feri riw bele, a ɗaa feri ɓáy zaɗɛ
14 A ku na waa, náa ɓáari mina ro lɛ? Lɛɛ, Ŋgɛrɛwṵru na ɓa nzoɓ ká ɗaa fe ɗo ɓáy zaɗɛ ya zu lɛ? Munu ya! 15 Ɓe na, ka ɓaa ha̰ *Moyze mii:
«Mì ɗaa law kere ziŋ nzoɓ ká mì hii ɓay ɗáa kere ziŋ ni,
a mí kɔ nun síe nzoɓ ká mì hii ɓay kɔ́kɔ nun síe ɓe†9.15 Tḭi Kɛlɛ 33.19..»
16 Feke ku na ɗo ɓay tul law hiiya nzoɓ ya nda̰w, ɓay tul hṵrusuo nzoɓ ya nda̰w, roo lɛ, ɗo ɓay tul Ŋgɛrɛwṵru ká kɔ nun síe nzoɓ munu ká law-ɛ hii. 17 Ɓe ze Ŋgɛrɛwṵru ɓaa ha̰ mbay *Farawo̰n ká ɓil mbeɗe ɓe mii: «Ɓo na, mì ɗáa mù kaw ɓa mbay ɓay tínake hṵrusuo-i ɓa kɛlɛ ɓáy faa ɓo, ɓay haŋa riŋ-i ka mgbáke ká tusiri key riw bele‡9.17 Tḭ́i kɛlɛ 9.16; ì kḭi Tḭ́i kɛlɛ 7–15..» 18 Ɓe ze, Ŋgɛrɛwṵru kɔ nun síe nzoɓ munu káʼa hii, a ha̰ law ŋgɔŋɔ ha̰ nzoɓ munu káʼa hii.
19 Kɔ ya lɛ, nzoɓ ha̰nɛ a ɓáa ha̰ mì mii: «Zaɗka ɗo munu ku waa, ɗaa mina nda̰w rɔɔ Ŋgɛrɛwṵru ɗaa ɓay ɓo tul nzoɓ ɓáy lɛ? A wa̰a, ka ɗaa fe ká Ŋgɛrɛwṵru kḭ mbi nzi-ɛ ɓay haŋa ni ɗaa na ya lɛ woo?» 20 A ɓo nzoɓ ká mù ɓaa ɓay munu ku na wa̰a, mù ɓa ve nda̰w rɔɔ, mú má̰y ɓay ziŋ Ŋgɛrɛwṵru lɛ? Ì kér í kɔ, suna ká i mbuo na, a ɓáa ha̰ nzoɓ mbúo ni mii: «Ɓay ḭi nda̰w rɔɔ, mù mbúo mì ɗo mini key na lɛ woo» na ya. 21 Nzoɓ mbúo pa̰y na, maa ɓay ɗáa fe ɓáy pa̰y na munu ká law-ɛ hii: pa̰y taa mbḭwke ku na, ka maa ɓay mbúoke tɔy ndaa, a pɔŋ ɓie a mbúoke suna taa hɔyke§9.21 Ezay 29.16; 45.9; Zeremi 18.6.. Wa̰a, ì kɔ munu ya lɛ?
22 Ze, zaɗka Ŋgɛrɛwṵru hii ɓay ɗoko munu ká nzoɓ mbúo pa̰y na wa̰a, ɓay ḭi ɓo ze ɗo ɗi lɛ? Ɓa ɓe kḭ ze ka hii ɓay kíɛ nzoɓri hɛrɛ ɓe ɓáy hṵrusuo-ɛ. Ɓe nu ku hɔy kara, ka iki law-ɛ ŋgḭ-ŋgḭi ká tul nzoɓri ká i maa ɓay zíŋ hɛrɛ ɓe, a í ɗo ɗi ya ɓay zíŋ ɓíɛ. 23 Ɓa ɓe kḭ nda̰w ze ka hii ɓay kíɛ bawda riŋ ɗika ɓe ɓay tul nzoɓri káʼa kɔ nun síe ɓari. Ɓa ɓari káʼa leke ri ɗo pola ɓay haŋa ri ziŋ riŋ ɗika ɓe na. 24 Nzoɓkeri ku na, ɓa naari ká Ŋgɛrɛwṵru ɗi naari ká sakra nzoɓri ká i ɓa Ziɓ na ku hɔy ya, roo lɛ, ká sa̰w nzoɓ kḭri kara nda̰w pi. 25 Ɓe ze ɓa fe ká Ŋgɛrɛwṵru ɓaa ɓayke ɗo ɓil mbeɗe Oze nzoɓ ya̰aŋa ɓay saa nzaa Ŋgɛrɛwṵru mii:
«Nzoɓri ká i ɓa taa ɓi ya na mì ɗika ri ɓa nzoɓ ɓiri;
a sa̰w nzoɓri ká pola lew mì hii ri ya na,
mì kɔ́kɔ ri ɓa nzoɓ nun-i.*9.25 Oze 2.25.
26 A zaɗ ká i ɓaa ha ri ká ɗi mii:
“I ɓa nzoɓ ɓiri ya” na,
ká zaɗɛ na ku kḭ ze,
i ɗika rì ɓa vu Ŋgɛrɛwṵru, Nzoɓ Káw Ɓáy Kumnun.»†9.26 Oze 2.1.
27 A ɓay ká se tul leɗ Izarayɛlri na laa lɛ, Ŋgɛrɛwṵru ɓaa ɓáy faa Ezay nzoɓ ya̰aŋa ɓay saa nzi-ɛ mii:
«Ze, Izarayɛlri ruɔ munu ká dikuɗi baa hɔy kara,
nzoɓri ká mì ya̰aŋa ri na, i máa zaɗɛ nzɛkrɛ hɔy,
28 ɓay ḭi lɛ, Ŋgɛrɛmbay a ví ɗáa fe káʼa ɓaa ɓay ɗáa ká tusiri key
ha̰ ni ɔ ɓáy zaɗɛ ŋgiɗ bele ɓa vaa koɗ hɔy.»‡9.28 Ezay 10.22-23.
29 Ɗo munu ká Ezay ɓaa ɓayke pola nda̰w mii:
«Zaɗka Ŋgɛrɛwṵru, Mbay Tul Feri Riw Bele
kɔrɔ vu bulu leɗ Izarayɛl ha̰nɛri ha̰ naari ya lɛ,
náa dúkuri mburuk mburuk
munu ká nzoɓri ká Sɔdɔm ɓáy Gomɔr.»§9.29 Ezay 1.9; Tiika sa̰w fe 19.1-29.
Leɗ Izarayɛlri ɗaa law-ri ɓo tul Ŋgɛrɛwṵru ya
30 A ku waa náa ɓáari mina ro zey lɛ? Ɓay ká náa ɓáari na ze ɗo key: nzoɓri ká i ɓa Ziɓ ya, ká í nzaa faa ɓay haŋa Ŋgɛrɛwṵru naa ɓay ká tul-ri ha ri ɗo ɓay zaɗɛ nzɛɗɛm ká nun-ɛ ya na ze, ka naa ɓay ká tul-ri ɓáy faa mbika law. 31 A ɓari Ziɓri ká i nzaa faa ɓay haŋa Ŋgɛrɛwṵru ka naa ɓay ká tul-ri ha ri ɗo ɓay zaɗɛ nzɛɗɛm ká nun-ɛ ɓáy faa ɗáa *bol kusol na laa lɛ, i ziŋ faake ya wṵ̌m. 32 Ɓay ḭi kḭ zu lɛ? Ɓay ḭi lɛ, ɓari na i nzaa faa ɓay ndáɗ ká nun Ŋgɛrɛwṵru ɓáy faa peɗ ɗáa ɓari ɓo, ɓáy faa ɗáa law ɓo tul Zezu *Krisi na ya. Ɓe ze, i téke tisaw í lie munu ká Ŋgɛrɛwṵru ɓaa ɓayke ɗo ɓil mbeɗe ɓe mii:
33 «Ɓi na, mì ɗaa tisaw ɓo puo ká *Sio̰n.
Ɓa tisaw téke ɓal nzoɓri, a ɗaa ha ri lie.
Roo lɛ, nzoɓ ká ɗaa law-ɛ ɓo tul-e na,
*9:4 9.4 Leɗ Izarayɛlri na, i ɓa vu bulu Zakoɓ. Ɓe Zakoɓ na, Ŋgɛrɛwṵru ha̰ ni riŋ ɓa Izarayɛl.
†9:7 9.7 Tiika sa̰w fe 21.12.
‡9:9 9.9 Tiika sa̰w fe 18.10,14. Leɗ wa̰ra nzoɓke na ɓa Izak ká ya̰a Rebika ɓa má̰y ɓe.
§9:11-12 9.11-12 Tiika sa̰w fe 18.10,14.
*9:13 9.13 Malasi 1.2-3.
†9:15 9.15 Tḭi Kɛlɛ 33.19.
‡9:17 9.17 Tḭ́i kɛlɛ 9.16; ì kḭi Tḭ́i kɛlɛ 7–15.
§9:21 9.21 Ezay 29.16; 45.9; Zeremi 18.6.
*9:25 9.25 Oze 2.25.
†9:26 9.26 Oze 2.1.
‡9:28 9.28 Ezay 10.22-23.
§9:29 9.29 Ezay 1.9; Tiika sa̰w fe 19.1-29.
*9:33 9.33 Ezay 28.16. «Tisaw» na ɓa Zezu. Munu ká Ziɓri hii ɓay ɗáa law-ri ɓo tul Zezu Krisi ya na, Zezu na vi ɓa ŋguɗ puu ká Ziɓri te a í lie. I hii ɓay ɓe ya, ɓay ḭi lɛ, ɓari Ziɓri na i giyaŋ nzoɓ ya̰aŋa nzoɓ káʼa tína ri saa ɓil nduo dɔma̰y Rɔmri ɓo, ɓa Nzoɓ Ya̰aŋa Nzoɓ ha̰y ká i ɓer ni ɗo tul puu say huɗ na ya.