1 Anifo fãsi mekafata yoiyamafe. Nã mĩ epa mĩ aka keskafakĩ, oitsifafãi yoisharafe. Askatari nã naetapafori mĩ ochi yafi mĩ exto aka keskafakĩ ato shinãmasharata ato yoisharafe. 2 Yõxafofori nã mĩ efa mĩ aka keskafakĩri shinãsharafãi ato yoisharafe. Mĩ chiko yafi mĩ chipi mĩ aka keskafakĩ nã xomayafo sharafo feesyamafãi, askara shinãtama ato yoisharafe.

3 Nã kẽro ifomafafo, askata fakemaisfo, askatari fafamaisfo, nãfo shinãmakiyamafe nã Jesús Ifofamisfãfe kexesharanõfo. 4 Akka nã kẽro ifomafa fakeyakẽ, askayamai fafafoyakẽ afãfe kexesharatirofo. Askarifakĩ nã yome pishtakẽ ato kexesharapaonifo keskafakĩri kopikiri kexesharanõfo ãfe fakefãferi. Nãskafaifãfe fetsafãfe õi kakĩ, “Nã yorafãfe Nios nikasharakani,” ikaxõ yoisharanõfo. Nãskaito õi Nios atoki inimai. 5 Nã kẽro ifomafa fakemais ita, fafamais ita, fenemais ita, nãskarafãfe Nios fisti shinãkĩ: “Niospa ea kexei,” ixõ shinãkĩ iskafakĩ, nã pena tii kĩfita fakish tii kĩfita famisfo Epa Nios mẽxotaima kĩfikakĩ. 6 Nãskafiax nã ifomafa fetsa fenemaisax kafãsatiro. Aa inimasharakõi nã ipaiyai keskai. Niospa meka mã shinãmakixõ, kachikiri faax, nã mã naa keskara. Shinãsharaima, chaka shinãi. 7 Timoteo, keyokõi ẽ mia yoiai na kẽro ifomafa Jesús Ifofamisfo tãpimasharafe, askara tãpikaxõ nikasharakõinõfo, fetsafãfe, “Mã chakara,” ikaxõ yoitirofoma. 8 Akka fẽtsa afe yorafo kexesharama, ãfe pexe mẽra ikiaifãfe ato kexeima nãskafakĩ chakafai. Aa keskaratokai Niospa meka nikasharama. A Jesús Ifofamato askarato afara chakafai, akka a Jesús Ifofaafãfe afe yorafo kexesharakakĩma fãsi chakafamisfo.

9 A kẽro ifomafa sesenta xini aka, ãfe fene fisti fe iyopaoni nã keskaraki kirika kenefe nã Jesús Ifofamisfãfe ato kexenõfo. 10 Nãskata nã kẽroõnoa yorafãfe yoisharamisfo; nãskata ãfe fakefo pexkosharakõini; askatari yora fetsa ãfe pexe ano kaito atoki inimamis; fetsafo pimamis; omiskõiaito ato sharafamis; ato feta amis; kẽro askara fistichi ãfe ane kenetiro Jesús Ifofamisfãfe a kexenõfo.

11-12 Akka nã kẽro ifomafa sesenta xinia akama, a keskaraki ãfe ane mĩ kenetiroma. Nã kẽromã ãa shinãkĩ iskafatiro: “Jesús, ẽ mia fisti shinãpai. Mia fisti ẽ yopai. Ẽ anã feneyapaima,” ifiaxõ anã fetsa anori shinãtiro feneyapaikĩ, anã Jesús shinãtiroma. Nã Niospa yoiai anori shinãima ãa chanĩ mekatiro. Askafai ãa chanĩaito õikĩ, askara kẽroki Nios inimatiroma. Nãskakẽ ãfe ane kenetiroma. 13 Askara kẽro fenemaisax xani itiro, pexe tii õifofãsafakĩ, askai kafãsakĩ, ato pãrafofãsafatiro ãa chanĩkĩ. Nãskakẽ ato fekaxtefatiro. 14 Askatamaroko kẽro ifomafa yõxafo famatai feneyatiro. Mã feneyaxõ fake fitiro. Fake fixõ ãfe pexe fisti anoxõ kexesharatiro. Askafasharaito õikĩ yorafãfe chakafakĩ mekafatirofoma. 15 Atiri kẽro ifomafafãfe Nios kachikiri fakaxõ Satanás ifofaafo.

16 Timoteo, a Jesús Ifofamisto afe yora ifomafakẽ, kexesharatiro. Askatari a ifomafafo kaifoyakẽma, fenemais ita, fakemais ita, fafamaisfo askara a Nios Ifofamisfãfe ato kexetirofo.

17 A Nios Ifofaafãfe xanĩfofofãfe noko kexesharakaxõ noko ĩkisharamisfo Niospa meka noko tãpimanaifono nõ atoki inimakĩ nõ aicho fatiro. Askatari nõ ato inãsharatiro nã afara yopaifo keskara finõfo. 18 Moisés kenekĩ yoikĩ iskafani: “A ato yonomanaito ato yonomakĩ kopifatiro.” Askatari keneni yoikĩ fakkaki keparanãkai. Moisés keneni yoikĩ iskafakĩ: “Oa fakka keskara nõ yonomanaino trigo ãfe xaka chona chona a fofãsafatiro nõ renextiroma piifofãsafanõfo. Askatari a noko tãpimasharamis nõ kopifatiro afaa yopayamanõ. Nãskafakĩ nõ yoitiro akiki inimasharakĩ,” ixõ yoikĩ keneni.

19 A yora fistichi Nios Ifofamisto xanĩfoõnoa mia yoiaito, chanĩmara fayamafe. Akka feronãfake rafe iyamai trespa a afara chakafaito õikaxõ, mia yoiaifãfe mĩ ato nikatiro.

20 Askaito nikakĩ a Jesús Ifofamisfãferi ichanãkaxõ yoitirofo iskafakĩ: “A mĩ chakafaa keskafakĩ anã askafayamafe. Nã mĩ chaka shinãi, Jesús yoife na afarafo mĩ chakafakĩ fetsai, mĩ yoiaito nikakĩ Jesús mia chaka soaxonõ.” Mĩ askafaito õikani fetsafo rãfitirofo. Askaxõ afaa chakafapaitirofoma rãfikaspakakĩ.

21 Epa Nios feta Jesucristo ãfe ãjirifãfe mia õikani. Nãskakẽ na ẽ mia yoiai anori askafafe. A afara chakafamisfãfe ãto ferotaifi yoife. Mĩ kaifofo yafi mĩ kaifofoma õikĩ, nãskarafãfe ãto chaka xatenõfo ato yoife. 22 Õisharata ato katofe Niospa meka ato yoimis. A kaa fisti ato katoyamafe. Ato õisharayofe taefakĩ. Mĩ õisharaxoma ato ifitiroma. Mĩ askara ifikẽ chipo afara chakafaira ixõ, fetsafãfe mia mekafakĩ chakafatirofo. Nãskakẽ shinãsharafãi ife, Timoteo. Afaa chakafayamafe.

23 Timoteo, mĩ xãki pãemiski faka fisti ayakima uva ene pãepishta ayafe sharaxikĩ.

24 Atiri yorafãfe afara chakafaito nõ õitiro xafakĩakõi. Akka atirifãferi afara chakafaifãferi nõ õitiroma. Mã askafimisfono chipo nõ tãpixii Niospa kãimanaino. 25 Nãskarifakĩ atirifãfe shara faifãfe nõ õitiro xafakĩakõi. Askatari fetsafãferi afara shara faifãfe nõ õitiroma. Mã askafamisfono chipo nõ tãpixii Niospa xafakĩakõi kãimakẽ afo.