13
Vurya̱ntya tuva̱chu ruumu vu̱yntyityu̱veda
1 Vurye̱cha sabuvye rijyu̱ ti̱ta̱ju̱ jiryatiy rinsu̱y jiyu vu̱y, Ju̱denumusiy yinu̱dyerya nusu̱yada day; jiryatiy ravichasara nusu̱yada, daryanuma sabayada Ju̱denu darya. 2 Daryamuni̱day ni̱tiy jiyaro̱nura nusu̱yada, savicha Ju̱denu rabacha̱da jiyaro̱ju̱ntiy, sa̱jmutya̱sara varirya taji vichadeda variy. 3-4 Japu ji̱ta ne suvu̱chi̱ saju̱ ni̱tiy jvaay samirya; ni̱tiy jvaay va̱cha, suvu̱chi̱ variy saju̱ni̱. Netimyu̱ ne jichuvu̱ryu̱rya nusu̱yada, ya̱jvaarya jiryatiy samirya darya, sa̱tidye jchana̱tya nusu̱yada ja̱mi̱ variy riva ji, Ju̱denu jmu̱tyi̱ daryaju̱ ni̱, sa̱tidye jmu̱tya samirya jvaayadaju̱ ji. Jiiryityi jvaarya nicyara̱y, ya̱ntya suvu̱y, mityaviy yinu̱y su̱tura podisíyase. Savichasara yinu̱y Ju̱denu jmu̱tyi̱, Ju̱denu nique̱yadata sa̱chaniy tarani̱ va̱cha jvaarya. 5 Vurya̱ntya sabuy variy riva nusu̱yada, sañuma vichaniy Ju̱denu jmu̱tyi̱ tara variy riva vu̱y, rañuma jarupanta vu̱jechiy variy riva vu̱y. 6 Ramuni̱tiy, vurya̱ntya murichenura jiryatiy rivya̱ta nutyityu̱mirya ramurichirya riva, varimyata criquiy, varimyata jvaayada, tapi rivyicha Ju̱denu muchechimyi, rirya̱tidye jnu̱tya samiryara nijya̱nvay vichadeda. 7 Vurya̱sa̱ñi̱ nu̱ñi ti̱qui nusu̱ñu daryatiy vu̱dyivyiñi̱: ni̱tiy va̱ta criquiñe̱cho̱ vuryimu, nusu̱yada murichirya, vu̱ryi sa̱y variñi̱; ni̱tiy va̱ta jvaayadaju̱ vu̱ñe̱cho̱, vu̱ryi jvaay variy vu̱vyicha̱da jdutya̱daju̱; ni̱tiy jpa̱ra yiteda vuryimu, vu̱ryi tuva̱chu variy ramu; ni̱tiy vicha japu, vu̱ryi jnu̱y samirya sana̱cho̱.
Vurya̱ntya vichaniy samirya nu̱ñi tuva̱chuvajyuu vu̱y
8 Ne vurya̱paru̱y murichedodara vu̱dyivyi variy. Vu̱ryi va̱tasara jaryi varivyu̱y, ne jiryi̱nu̱y vuryito̱tanirya Ju̱denu jteda day jiryatiy vu̱vya̱tani̱ vu̱tyeryi̱ nijya̱mi̱, dañuma sa̱cha ti̱. 9 Jiryatiy su̱teda Vuryi̱ndenu:
Ne ya̱rupi ti̱ vaturu̱jsa̱, ne ya̱jvay ti̱, ne ya̱paranu, ne ya̱jnu̱y jiñi̱ru̱yadamu rana̱cho̱ ti̱ barya, mitya;
su̱tedara ratarya niquejadantiy; vurya̱jto̱taniy ti̱ta̱ju̱ra jiryatiy vuryito̱tanirya taraqui saniquejada, jiryatiy su̱tedantirya:
Ya̱ntya va̱tani̱ jityuunu vichi̱, nu̱tyu jivya̱tasara daryantiy ji.
10 Varityi vu̱vya̱tani̱ vu̱tyuunu vichi̱, ne vurye̱chaniy taji nta variñu̱nñi̱, ramuni̱ vuryi̱tay: Jirya va̱ta̱damusiy vuryito̱tanirya Ju̱denu jteda ti̱ta̱ju̱.
Ne ta̱rijyu̱ nu̱nrya Vuryi̱ndenu jdeda runda nu̱day
11 Ranchaju̱ntiy, jiryatiy vu̱dyetyanuma nu̱tyura runda rani̱cha diye, riti̱ma̱ vuryi̱dyosicha̱da runda, tapi jativyenumara jantyutya̱da runda. Vu̱tyuva̱choda rundamu vu̱dyetya̱da daryaju̱, ne ripya nu̱darya vurye̱ntyutyasa̱da runda nu̱day. 12 Rabaryi̱ru̱ñuma nupora (juucha nupocudi), ra̱sacharu̱ñuma jna̱rya (Ju̱denu jna̱rya). Vurya̱ntya jatya vuryivasirya nupocudi jvaayada (juuchuveda) vurya̱tidye jachosiy vuryivara vandajay, vu̱ryamityájajyu̱. 13 Jiryatiy jna̱ryamu vurye̱cha, vurya̱rupi samirya jvaayadamu, ne vurya̱jcanurya ra̱ya̱jomu jiya̱da, dantyamu̱y ne niyu̱yadacanuyada, dantyamu̱y ne jarupadodacanuyada, vaturu̱jsa̱ cadnaveda, daryantyamu̱y ne ra̱tya̱dacanuyada. 14 Vurya̱ntya jachu vuryivani̱ Vu̱yntyityu̱ Jesucrístu, ne vurya̱jachipiya̱ jvaayadara vu̱dyirya ni̱ru̱chara.