1 Naxanye mi yi n maxɔdinma,

n bata n yɛtɛ yita ne ra.

Naxanye mi yi n fenma, ne bata n to.

Yamaan naxan mi yi n maxandima n xinli,

n yi a fala ne xa, n naxa,

“N tan ni i ra! N tan ni i ra!”

2 N na n yiini bandunma yama murutɛxin xa fɛriɲɛn gbɛn,

naxanye sigan tima kiraan xɔn

naxan mi fan,

e lu e yɛtɛ miriyane fɔxɔ ra.

3 Yamaan na a ra

naxan n naxɔlɔma n yɛtagi

e saraxane bama kide nakɔne yi

e wusulanne gan saraxa gande bitikidi daxine fari,*Bitikidin mɔn falama yirena nde yi fa fala “Birikidina.”

4 e dɔxɔma gaburu yirene yi,

e kɔɛɛn nadangu faranne ra,

e xɔsɛ subene don.

Donse haramuxine nan e goronne kui.

5 E a falama, e naxa,

“I masiga, i nama i yiin din n na,

n ma sariɲanna nɔrɔn gbo i ma.”

Na falana n tɔrɔma

alo tɛɛ tutina n ɲɔɛni,

tɛɛn naxan luma dɛgɛ waxatin birin.

6 Koni ito nan sɛbɛxi n yɛtagi:

N mi n dundɛ na feene ma mumɛ,

n na e saranma nɛn a dɛfexin na yati!

7 N na e hakɛne yatɛma nɛn

e nun e benbane hakɛne!

E to wusulanna gan saraxan na geyane fari

e n naxɔlɔ yire matexine fari,

n na e saranma nɛn e kɛwali fonne ra a dɛfexin na.

N tan Alatala naxa na kiini.

8 Alatala ito nan falaxi, a naxa,

“Ige ɲaxumɛn na to manpa bogi tɔnsɔnna naxan yi,

muxune a falama nɛn, e naxa,

‘I nama a kala,

bayo se faɲina nde a yi!’

N tan fan a ligama na kii nin n ma walikɛne fe ra,

alogo e birin nama halagi.

9 N mayixɛtɛna nde raminima nɛn Yaxuba bɔnsɔnni,

n yi n ma geyane findi Yuda bɔnsɔnna ndee gbeen na,

n naxanye sugandixi,

e yi findi ne kɛɛn na,

n ma walikɛne yi dɔxɔ e yi.

10 Sarɔn yamanan yi findi xuruse rabaden na,

Akori lanbanna yi findi ɲinge kurune saden na

n ma yamaan xa naxan n fenma.”

11 “Koni ɛ tan naxanye ɛ mɛma Alatala ra,

ɛ ɲinan n ma geya sariɲanxin xɔn,

ɛ yi donseene rafala Gadi suxuren xa

ɛ yi igelengenne rafe dɔlɔ basanxine ra Meni suxuren xa,

12 n sayaan nan nagidima ɛ ma silanfanna ra.

Ɛ birin ɛ xinbi sinma nɛn,

ɛ kɔɛ raxaba,

bayo n bata xinla ti,

ɛ mi n yabi,

n falan ti, ɛ mi ɛ tuli mati n na.

Naxan ɲaxu Ala yɛɛ ra yi,

ɛ yi na liga,

naxan mi rafan n ma,

ɛ yi na sugandi.”

13 Nanara, Marigina Alatala ito nan falaxi,

a naxa, “N ma walikɛne e dɛgema nɛn,

koni kamɛna ɛ tan suxuma nɛn.

N ma walikɛne e minma nɛn,

koni min xɔnla ɛ tan suxuma nɛn.

N ma walikɛne sɛwama nɛn,

koni ɛ tan yarabima nɛn.

14 N ma walikɛne e xuini tema nɛn ɲaxanni

e bɔɲɛn sɛwaxin na,

koni ɛ tan, ɛ xuini tema nɛn sɔxɔlɛn nin,

ɛ bɔɲɛ kalaxin na,

ɛ gbelegbele nii rafɔrɛni.

15 Ɛ xinla findima nɛn danga ti seen na n ma muxu sugandixine xa, e naxa,

‘Marigina Alatala xa i fan faxa alo ne!’

Koni n ma walikɛne tan xili gbɛtɛ sɔtɔma nɛn.

16 Naxan na duban ti yamanani,

na duban tima nɛn Ala ɲɔndin kanna xɔn ma.

Naxan na a kɔlɔ yamanani,

na a kɔlɔma Ala ɲɔndin kanna nin,

bayo ɲinan tima nɛn tɔrɔ danguxine xɔn ma,

e bama nɛn n yɛtagi.

17 Amasɔtɔ n kore xɔri nɛnɛn nun bɔxɔ xɔri nɛnɛn dama nɛn,

ɲinan yi ti waxati danguxin xɔn,

miri mi fa tima a xɔn mumɛ!

18 Koni ɛ sɛwama nɛn han habadan,

ɛ lu ɲaxanni na fe ra n naxan dama.

Bayo, n Yerusalɛn dama sɛwan nan xili yi

a muxune yi lu ɲaxanni.

19 N Yerusalɛn findima nɛn sɛwan na n xa

n yi ɲaxan n ma yamani.

Wuga xuiin nun gbelegbele xuiin mi fa mɛma a yi sɔnɔn.

20 A mi fa ligama mɛnni

diin bari nɛnɛn yi faxa,

a na xii dando ti,

hanma fonne mi e siimayaan dɛfe,

bayo muxun naxan mi forixi e tagi,

na mi faxɛ ɲɛɛ kɛmɛn xanbi.

Yulubi kanna naxan ma siimayaan mi danguma ɲɛɛ kɛmɛn na,

na yatɛma dangatɔɔn nan na.

21 E banxine tima nɛn,

e dɔxɔ e kui,

e sansine sima nɛn,

e yi e bogine don.

22 E mi fa banxine tima,

muxu gbɛtɛ yi dɔxɔ e kui.

E mi fa sansine sima,

muxu gbɛtɛ yi e bogin don,

bayo n ma muxune siimayaan luma nɛn

alo wudina,

n ma muxu sugandixine sɛwama nɛn e wali xɔnne fe ra.

23 E mi fa walima fuuni,

e mi fa diine barima,

gbalon yi e sɔtɔ,

bayo e findima yamaan nan na

Alatala barakan sama naxanye fe yi,

e tan nun e yixɛtɛne.

24 Nayi, benun e xa n maxandi,

n bata e yabi,

e nɛma falan ti, n bata e xuiin namɛ.

25 Kankon nun yɛxɛɛ diina e dɛgema nɛn e bode xɔn,

yatan sɛxɛn donma nɛn alo ɲingena,

burunburunna yi findi saɲin balon na.

E mi fe ɲaxi yo ligama,

kala yo mi fa tiyɛ n ma geya sariɲanxin yire yo yi!”

Alatala naxa na kiini.