2
Isirayila yamana fe ɲaxina
1 Alatala yi falan ti n xa, a naxa,
2 “Sa falani ito ti Yerusalɛn kaane xa,
i naxa, ‘Alatala ito nan falaxi,
a naxa: N bata n miri ɛ ma
ɛ yi kii naxan yi ɛ foningeyaan xanuntenyani.
N yi rafan ɛ ma alo ɲaxalandi futuxina.
Ɛ yi bira n fɔxɔ ra tonbonni,
ɛ yi n fɔxɔ ra bɔxɔ xareni.
3 Isirayila kaane yi rasariɲanxi Alatala xa.
E yi findixi a se bogi singen nan na,
naxan yo na yi e don,
na feen yi saran e ra,
gbalon yi godo na kanna ma.’ ”
Alatalaa falan nan na ra.
4 Ɛ tuli mati Alatalaa falan na,
Yaxuba yixɛtɛne,
ɛ tan, Isirayila yamaan denbayane birin!
5 Alatala ito nan falaxi, a naxa,
“Ɛ benbane tinxintareyaan mundun toxi n yi,
naxan a ligaxi
e yi makuya n na?
E biraxi suxure fufafune fɔxɔ ra,
e yɛtɛɛn yi findi fufafune ra.
6 E mi a fala, e naxa,
‘Alatala minɛn?
A bata nxu ramini Misiran yi,
a fa nxu ra tonbonni,
bɔxɔ xaren folon gbo dɛnaxan yi,
naxan luma tuletareyaan nun dimi gbeeni,
muxu yo mi danguma dɛnaxan yi,
muxu yo mi dɔxi dɛnaxan yi.’
7 N bata fa ɛ ra yamana faɲini
alogo ɛ xa wudi bogi faɲine don.
Koni, ɛ bata fa,
ɛ fa n ma yamanan naxɔsi
ɛ yi n kɛɛn findi se xɔsixin na.
8 Saraxaraline mi a fala,
e naxa, ‘Alatala minɛn?’
Sariya kanne fan mi n kolon,
kuntigine murutɛxi n xili ma,
nabine yi lu Baali a fe falɛ,
e biraxi suxure fufafune fɔxɔ ra.
9 Nanara, n mɔn ɛ makitima nɛn,
n yi ɛ mamandenne makiti.”
Alatalaa falan nan na ra.
10 A mɔn yi a fala, a naxa,
“Ɛ siga fɔxɔ ige tagi bɔxɔn Sipiri yi,
ɛ sa a mato!
Ɛ xɛrane rasiga Kedari bɔnsɔnna yamanani,
e xa sa na rakɔrɔsi ki faɲi,
ɛ a mato xa na fe sifan ligama na!
11 Yamana nde a alane masaraxi ba?
Hali e to mi findixi ala kɛndɛne ra.
Koni, n ma yamaan tan bata a binyen masara
suxure fufafune ra.
12 Kore xɔnna xa sunu
lan na ma,
a xa kutun, a yi xara.”
Alatalaa falan nan na ra.
13 A mɔn yi a fala, a naxa,
“N ma yamaan bata yulubi firin tongo.
E bata e mɛ n na,
n tan naxan findixi siimaya ige tigin na,
e yi sa e gbee ige ramaradene rafala,
naxanye yibɔxi, e minima.
14 Isirayila kaane bata findi konyine ra iki ba?
Hanma e barixi konyiyaan nin ba?
Nanfera e findixi se tongo daxine ra?
15 Yatane kelima e xili ma,
e wurundunma e xili ma,
e yi e bɔxɔn naxɔri,
muxu mi fa e taa ganxine yi sɔnɔn.
16 Hali Nofi kaane nun Tapanese kaane nɔɔn sɔtɔma ɛ xun na.
17 Na birin mi ligaxi ɛ ra naxi ba,
bayo ɛ bata ɛ mɛ Alatala ra, ɛ Ala,
a yi ɛ tima kira faɲin xɔn ma waxatin naxan yɛtɛ yi?
18 Ɛ fa sigan nanfera Misiran yi iki?
Ɛ sigama Nila baa igen nan mindeyi?
Ɛ sigan nanfera Asiriya yi?
Ɛ sigama Efirati baa igen nan mindeyi ba?
19 Ɛ saren xa fi ɛ fe ɲaxin na,
ɛ yanfantenyaan yi xɛtɛ ɛ ma.
Ɛ a mato!
Ɛ yi a kolon a fe ɲaxin na ra,
naxan xɔlɔ ɛ ra.
Ɛ bata ɛ mɛ Alatala ra, ɛ Ala,
gaxu yo mi lu ɛ yi n tan yɛɛ ra.”
Marigina Alatala Sɛnbɛn Birin Kanna falan nan na ra.
20 A mɔn yi a fala, a naxa,
“To mi na ra,
ɛ murutɛxi n xili ma,
ɛ yi en tagin kala,
ɛ yi a fala, ɛ naxa,
‘Nxu bata mini konyiyani!’
Ɛ yi suxurene batu geya matexine birin fari,
e nun wudi gbeene birin bun!
Na luxi nɛn
21 N bata yi ɛ rasabati
alo manpa bili faɲin naxan kɛndɛ.
Nanfera ɛ masaraxi,
ɛ findi manpa bili kalaxin na?
22 Hali ɛ ɛ maxa libin na,
ɛ yi ɛ maxa safun wuyaxi ra,
ɛ hakɛne luma nɛn n yɛtagi.”
Marigina Alatalaa falan nan na ra.
23 A mɔn yi a fala, a naxa,
“Nanfera ɛ a falama, ɛ naxa,
‘N mi xɔsixi, n mi Baali batuxi?’
Ɛ funfune mato lanbanni,
ɛ xa a kolon ɛ naxan nabaxi,
alo ɲɔgɔmɛn naxan a masiga tima na xun xɔn.
24 Ɛ luxi nɛn alo burunna sofali gilɛn
naxan darixi tonbonna ra naxan sigama
alogo e nun a xɛmɛne xa sa kafu.
Nde nɔɛ a raxɛtɛ?
Naxanye birin a fenma,
ne nama e yɛtɛ yixadan,
bayo e a toma nɛn a waxatini.
25 Ɛ a liga ɛ yeren ma,
alogo ɛ nama xadan,
ɛ san yigenla yi lu,
min xɔnla yi ɛ suxu!
Koni ɛ yi a fala,
ɛ naxa, ‘A mi lanɲɛ!
Bayo ala xɔɲɛne rafan nxu ma,
nxu waxi bira feni e fɔxɔ ra.’
26 Isirayila yamaan yagixi,
alo muɲaden na suxu a yagi,
e nun e mangane nun e kuntigine
nun e saraxaraline nun e nabine,
27 e tan naxanye a falama wudin ma,
e naxa, ‘Nxu fafe nan i ra!’
E a fala gɛmɛn xa, e naxa,
‘I tan nan nxu barixi!’
E bata e xun xanbi so n yi,
e mi e yɛtagin tixi n xa,
koni, e nɛma tɔrɔni,
e naxa, ‘Keli, i nxu mali!’
28 Nayi, ɛ alane minɛn,
ɛ naxanye rafalaxi ɛ yɛtɛ xa?
E xa keli,
xa e nɔɛ ɛ rakisɛ ɛ tɔrɔ waxatini!
Yuda kaane, ɛ gbee alane wuya
alo ɛ taane.
29 Nanfera ɛ ɛ mawugama n fari?
Ɛ birin bata murutɛ n xili ma,”
Alatalaa falan nan na ra.
30 A mɔn yi a fala, a naxa,
“N bata ɛ diine ratɔrɔn fuuni,
e mi tinxi xurɛ,
ɛ yɛtɛna silanfanna bata nabine faxa,†Silanfanna: Sofane yɛngɛso dɛgɛmana.
alo yatan naxan halagin tima.
31 Ɛ tan, iki muxune,
ɛ Alatalaa falan yatɛ!
N findi nɛn tonbonna ra Isirayila xa ba
hanma dimi yamanana?
Nanfera n ma yamana a falama,
e naxa, ‘Nxu bata xɔrɔya,
nxu mi waxi xɛtɛ feni i ma’?
32 Sungutunna ɲinanɲɛ a tunla sone ma ba?
Ɲaxalandin ɲinanɲɛ a futu dugi tagi xidin ma ba?
Anu, n ma yamaan bata ɲinan n xɔn
xabu waxati xunkuye.
33 Ɛ fatan sigɛ ɛ yangane fendeni!‡ Ɲaxanla a xɛmɛn yanfama a yangane xɔn kii naxan yi, Isirayila kaane fan bata Ala yanfa e suxurene xɔn na kiini.
Hali ɲaxanla naxan ɲaxu e birin xa,
ɛ mɔn nɔɛ na xaranɲɛ nɛn yanfantenyaan ma.
34 Sɔntare yiigelitɔne niin wunla bata sa ɛ dugi lenbene ma,
ɛ naxanye faxaxi
alo ɛ e lixi ɛ banxin dɛɛn kalɛ.
Koni hali na birin,
35 ɛ naxa,
‘Sɔntaren nan nxu tan na!
A xa ba xɔlɔxi nxu ma.’
Bayo, ɛ bata a fala
a ɛ mi yulubi ligaxi,
n na ɛ kitima nɛn.
36 Nanfera ɛ kiraan masarama xulɛn?
Ɛ yagima nɛn Misiran kaane yɛɛ ra,
alo ɛ yagixi Asiriya kaane yɛɛ ra kii naxan yi.
37 Ɛ minima nɛn mɛnna fan yi,
ɛ yiine saxi ɛ xun ma yagini
bayo naxanye ɛ malima,
Alatala a mɛma nɛn ne ra,
ɛ mi nɔɔn sɔtɔma e xɔn.”
*2:20: Suxure batun luxi alo yalunyana bayo Ala nun a yamaan bata layirin xidi alo futun xidima kii naxan yi. Na kui, Ala a yamaan masuxuma alo xɛmɛna a ɲaxanla masuxuma kii naxan yi. A yamaan na se gbɛtɛ batu ba Ala ra, e bata a yanfa nayi alo ɲaxanla na a xɛmɛn yanfa yalunyaan xɔn.
†2:30: Silanfanna: Sofane yɛngɛso dɛgɛmana.
‡2:33: Ɲaxanla a xɛmɛn yanfama a yangane xɔn kii naxan yi, Isirayila kaane fan bata Ala yanfa e suxurene xɔn na kiini.