41
1 “Muxun naxan waxi a xa a nɔ,
na a yɛtɛ nan madaxuma.
Muxu yo na a to tun,
na birama nɛn a xanbiramaan na.
2 Muxu yo mi susɛ yɛngɛn bagɛ a ma,
nayi nde susɛ tiyɛ n yɛtagi?
3 Nde a doli n ma,
alogo n xa a fi?
N tan nan gbee dunuɲa seene birin na!”
4 “N mɔn xa falan ti ige yi sube ɲaxin salen seene ma,
e nun a sɛnbɛ magaxuxin nun a fati faɲina.
5 Nde nɔɛ a kidin bɛ a ma?
Nde nɔɛ a xanle sɔxɔnɲɛ
naxanye xɔdɔxɔ alo wurena?
6 Nde nɔɛ a gbɛgbɛni biyɛ?
Muxune gaxuma a ɲinne nan yɛɛ ra.
7 A xali xɔdɛxɛne safa wuyaxi nan a fari,
e dɔxi e bode ra a fari
alo yɛ masansan wure lefane.
8 E saxi e bode fari,
hali foyen mi nɔɛ danguɛ.
9 E tugunxi e bode ra,
e bode suxi,
e mi nɔɛ bɛ e bode ra.”
10 “Ige yi sube ɲaxin na tison,
kɛnɛnna yi mini,
a yɛɛne luxi alo subaxana.
11 Tɛɛ dɛgɛn minima a dɛ,
tɛɛ wolonne tuganma.
12 A ɲɔɛ tutin tema,
alo tunde wolonna,
alo sɛxɛ tutina.
13 A ɲɔɛ foyen tigine radɛgɛma,
tɛɛ dɛgɛn yi mini a dɛ.
14 Sɛnbɛna a kɔɛɛn nin,
gaxun nan sigama a yɛɛ ra.
15 A fati kidin ɲixiriɲixirine wuya,
e bata xɔdɔxɔ ayi a ma,
sese mi bama a ma.
16 A bɔɲɛn xɔdɔxɔ alo gɛmɛna,
a xɔdɔxɔ alo se kunba gɛmɛna.”
17 “A na keli, alane yi gaxu,
e yigitɛgɛxin yi xɛtɛ.
18 Silanfanna mi sese ligama a ra,
hanma tanba xurin nun dɛgɛmaan nun tanba gbeena.
19 Wuren luxi nɛn a tan xa
alo sɛxɛna,
sulana alo wudi kunxina.
20 A mi a gima xalimakunla yɛɛ ra,
lantan gɛmɛne findixi se dagin nan na a tan xa.
21 Gbelemɛn luxi nɛn a tan xa
alo sɛxɛna,
a gelen tanban woli xuiin ma nɛn.
22 A kui kidin luxi nɛn
alo gɛmɛ ralemunxine,
alo xɛɛ rabɔnbɔ seen naxan bubuma boroni.”
23 “A na sin fɔxɔ igen tilinna ma,
igen yi a ramini alo a tɛɛn nan ma.
A fɔxɔ igeni maxama nɛn
alo seri igen tɛɛn ma.
24 A funfuni yalanxin nan luma a xanbi ra igeni,
a lu alo fonna xun sɛxɛn na mini fufaan fari.
25 A kanna mi muxu yo ra bɔxɔ xɔnna fari.
Dali seen na a ra naxan mi gaxuma.
26 A yaxu sɛnbɛma yo na keli,
a yɛɛn yoma na kanna ma nɛn,
bayo a tan nan sube xaɲɛne birin ma mangan na.”