6
Marakolon falane
1 N ma diina,
xa i bata dɛ xuiin tongo
i muxu gbɛtɛna donla goronna tongo,
xa i bata layirin xidi muxu gbɛtɛna fena nde yi,
2 xa i bata i xunna raso fena nde yi i fala xuiin xɔn
xa i bata suxu i ya tuli sa xuine xɔn,
3 nayi i xa ito nan liga
alogo i xa i yɛtɛ ba a yi,
i to bata bira doli kanna ra.
Siga, i sa i yɛtɛ magodo,
i yi i adamadi boden mafan han!
4 I nama i matabu,
i nama i yɛɛn naxi,
5 fanni i munma xunba a yii,
alo bolena a yɛtɛ sɔtɔma donson na kii naxan yi,
alo xɔliin naxan a yɛtɛ bama luti ratixin na.
Marakolonna lan salayaan ma
6 I tan muxu narixina,
sa dondonla mato.
I miri a fe raba kiin ma,
i yi fekolonna nde sɔtɔ.
7 Manga yo mi dondonla xun na,
a xun mato muxu mi na,
kuntigi mi a ma.
8 Anu, a donseen namarama a waxatini,
a balon malanma se xaba waxatini.
9 I tan muxu narixina,
i luma saxi han waxatin mundun yi?
I kelima xixɔnli waxatin mundun yi?
10 I na i sa,
yeriyerinna yi dangu i ma ndedi,
i xi ndedi,
i yi i yiine filin e bode ma ndedi,
11 yiigelitɔyaan yi baga i ma
alo mafu tiina,
e nun setareyana alo muɲadena.
Xaxilitaren naɲanna
12 Muxun naxan wule falane tima
fuyantenna na a ra,
muxu xaxilitarena.
13 A yɛɛne magirama bodene yanfadeni,
a lanfane rakolon a sanne ra wundoni,
a yiine maliga.
14 Tinxintareyaan nan a bɔɲɛni.
A fe ɲaxini tɔnma waxatin birin,
a yɛngɛne rakelima.
15 Nanara, gbalona a sɔtɔma nɛn xulɛn,
a halagi sanɲa ma kedenni a yigitɛgɛ.
Naxan mi rafan Ala ma
16 Se sennin nan na
naxanye raɲaxu Alatala ma,
han se solofere
a mi tinɲɛ naxanye ma mumɛ:
17 Yɛɛ wasoxine,
wule fala lɛnne,
sɔntarene faxa yiine,
18 bɔɲɛn naxan kɔtɛ ɲaxini tɔnma,
sanna naxanye e mafurama siga fe ɲaxi ligadeni,
19 wule seren naxanye wulen falama,
e nun muxun naxan yɛngɛne rakelima ngaxakedenmane tagi.
Marakolonna lan yalunyaan ma
20 N ma diina,
i fafe a yamarine suxu,
i nama i nga xaranna rawolɛ ayi.
21 E sa i xaxinli habadan,
e bira i kɔɛ alo ɲɛrɛna.
22 E tima nɛn i yɛɛ ra i ya sigatine yi.
E i kantanma nɛn i ya xixɔnli,
i na keli, e yi i kawandi.
23 Amasɔtɔ yamarini itoe luxi nɛn
alo lɛnpuna,
xaranni ito findixi kɛnɛnna nan na.
I xuru falan naxan i sɔnna yitama i ra,
na i tima siimayaan kiraan nan xɔn.
24 E i ratangama nɛn ɲaxalan yalunxin ma
e nun muxu gbɛtɛna ɲaxanla fala ɲaxumɛne.
25 I nama kunfa na ɲaxalan sifan xɔn a tofanna ma.
I nama tin a i rakunfa a mato faɲin xɔn.
26 Amasɔtɔ yalunden na feen yatɛma
buru xun kedenna saren nan na,
muxu gbɛtɛ ɲaxanla i niin nan fɔxɔ ra.
27 Muxun nɔɛ tɛɛn sɛ nɛn a yibaan kui
hali a dugin birin mi gan ba?*tɛɛna: Tɛɛn saxi yalunyaan nan ma be. Na bunna nɛɛn fa fala yalunyaan muxuna dunuɲa yi gidin birin nan kalama alo tɛɛn dugin ganma kii naxan yi.
28 Muxun nɔɛ sigan tiyɛ tɛɛ wolonne fari
hali a sanne mi gan ba?
29 Na luxi nɛn
alo muxun na bira muxu gbɛtɛna ɲaxanla fɔxɔ ra,
a na a yiin din a ra,
na feen saranma a ra nɛn.
30 Yamaan mi muɲaden naɲaxuma
xa a seen muɲaxi alogo a xa kamɛn ba.
31 Koni hali na, a na suxu,
fɔ a xa a se muɲaxin ɲɔxɔn fi
dɔxɔ solofere a yanginna ra,
a yii seene birin yi ɲan a konni.
32 Koni xɛmɛn naxan na yalunyaan liga
na xaxili mi na.
Naxan na a liga,
a waxi a yɛtɛ halagi feen nin.
33 A bɔnbɔma nɛn, a rayarabi,
a yagin mi bama a ma.
34 Amasɔtɔ xɔxɔlɔnna xɛmɛn naxaɲɛma ayi nɛn,
a nɛma a gbeen ɲɔxɛ,
a mi kininkininɲɛ.
35 A mi yangin yo rasuxɛ,
a mi diɲɛ,
hali i yanginna fixin na gbo ki yo ki.
*6:27: tɛɛna: Tɛɛn saxi yalunyaan nan ma be. Na bunna nɛɛn fa fala yalunyaan muxuna dunuɲa yi gidin birin nan kalama alo tɛɛn dugin ganma kii naxan yi.