7
Ala maxandin malina fe ra
1 Dawudaa mawugan bɛtina, a naxan baxi Alatala xa Kusi Bunyamin kaana fe ra.
2 Alatala n ma Ala,
n bata n luxun i yi.
N xunba, i yi n nakisi
ne birin ma naxanye n fɔxɔ ra.
3 Yaxune nama n yibɔ alo yatana,
naxan ma se suxi mi xunbɛ.
4 Alatala n ma Ala,
e n kansunma naxan na,
xa n sɔnna na a ra,
5 xa n bata fe ɲaxin dɔxɔ muxun na,
nxu nun naxan dɔxi bɔɲɛ xunbenli,
xa n bata n yɛngɛfaan muɲa tɔɲɛgɛni,
6 nayi, i xa tin n yaxune xa n kedi,
e yi n suxu,
e yi n mabodon,
e yi n fatin lu saxi gbangbanni.
Bɛti xuini te.
7 Alatala keli i ya xɔlɔni,
keli n yaxu xaɲɛne xili ma.
Keli, n ma Ala,
i sariya kɛndɛn sa!
8 Siyane malanxin xa i rabilin,
i mangayaan liga e xunna.
9 Alatala xa siyane makiti.
Alatala, i xa n ma kitin sa n ma tinxinni,
bayo fɛ yo mi n na.
10 Danna sa muxu ɲaxine gbalone ra!
I xa tinxin muxune ratanga,
i tan Ala tinxinxina,
i tan naxan muxun bɔɲɛne nun sɔndɔmɛne rakɔrɔsima.
11 Ala nan n yɛ masansan wure lefaan na.
A muxu sɔndɔmɛ faɲine rakisima nɛn.
12 Ala nan kitisa tinxinxin na.
Ala na a ra naxan xɔlɔma waxatin birin.
13 Xa muxu ɲaxin mi tubi Ala ma,
a silanfanna raxanxanma nɛn,*Silanfanna: Sofane yɛngɛso dɛgɛmana.
a yi a xanla ba a woli xinla ma.
14 Ala bata a faxa ti seene tongo,
a a xalimakunle findi tɛɛn na.
15 Naxan lugoxi tinxintareyaan na,
a mɔn nafexi gbalon na,
a raɲanna nan wulen na.
16 A yinla gema a a ratilin,
a yɛtɛɛn yi bira a kui.
17 A tɔrɔn nun gbalon nakeli,
ne yi xɛtɛ a ma.
18 N na Alatala tantunma a tinxinna fe ra.
N bɛtin bama nɛn Kore Xɔnna Alatala xinli.