Alatala n ma fanyena,

n bata i xili.

I tuli mati n na!

Xa i mi n yabi,

n sama laxira faxa muxune fari nɛn.

2 N ma mayandi xuiin mɛ malina fe ra,

n bata n yiini te

i Batu Banxin yire sariɲanxin mabinni.

3 I nama nxu nun muxu ɲaxine yalagi nxu bode xɔn,

fe ɲaxi rabane naxanye fala faɲine tima

koni maraɲaxuna e bɔɲɛne yi.

4 E kɛwanle saranna fi,

e nun e wali ɲaxine

e bata naxanye liga.

A liga e ra naxan lan e kɛwanle ma.

E lan e xa naxan sɔtɔ, na so e yii!

5 E xaxili mi luxi Alatalaa wanle xɔn ma,

hanma a yiine bata naxan da.

Nanara, a e kalama nɛn

a e ɲan habadan.

6 Barikan bira Alatala xa,

a bata n ma mayandi xuiin mɛ.

7 Alatala nan n sɛnbɛn na.

A n xun mayɛngɛma

alo wure lefana.

N yigin saxi a fari,

bayo a n malima.

Nanara, n bɔɲɛn bata rafe sɛwan na.

N na a tantunma nɛn bɛtine yi.

8 Alatala nan a yamaan sɛnbɛn na,

e nun yigiya kantanxina a muxu sugandixin xa.

9 I ya yamaan nakisi,

i mɔn yi e baraka.

Findi e gbɛngbɛn muxun na,

i yi i yengi dɔxɔ e xɔn ma habadan!