2 Ɛ ito mɛ, ɛ tan siyane,

ɛ tuli mati

ɛ tan muxun naxanye birin dunuɲa yi.

3 Fanga kanne nun tɔrɔ muxune,

nafulu kanne nun yiigelitɔne,

birin xa a tuli mati.

4 N fekolonna falane nan tima,

n mirine xaxili faɲin nan fima.

5 N na n xaxinla rasigama sandan nan xɔn,

n yi a yɛba, n nɛma n ma bɔlɔnna maxɛ.

6 Nanfera n gaxuma gbalo lɔxɔne yɛɛ ra,

hakɛ kan yanfantenne n nabilinma waxatin naxan yi?

7 E yigin saxi e se kanyaan nan ma,

e mɔn yi e kanba e nafulu kanyani.

8 Muxun mi nɔɛ a boden xunbɛ.

A mi nɔɛ a niin saren soɛ Ala yii.

9 Amasɔtɔ muxun niin xunbaan xɔdɔxɔ!

A mi nɔɛ a saren fiyɛ,

10 alogo a xa bu habadan, a mi faxa.

11 Amasɔtɔ, en birin a kolon xaxilimane fan faxama

e nun daxune nun kɔmɔne.

E birin e nafunle luma muxu gbɛtɛne nan yii.

12 Gaburun yi findi e habadan banxin na,

e luma dɛnaxan yi, dan mi naxan na,

hali bɔxɔn to yi e yii e yɛtɛ ra.

13 Muxuna gboon mi a rabuyɛ.

A fan faxama nɛn alo subene.

14 Muxun naxanye laxi e yɛtɛ ra fuyan nin,

e sigaden nan na ra,

naxanye wasaxi e nafunle ra,

ne raɲanma na kii nin.

15 E rasigama laxira yi nɛn

alo yɛxɛɛn naɲanna to faxan na.

Sayaan yi e gbindine don.

Muxu faɲine nɔɔn sɔtɔma nɛn e xun na sinma,

e tofanna yi kala,

e siga gaburuni.

16 Koni Ala n niin xunbama nɛn laxira yi yati!

A yi n xali.

17 Muxun na nafunla sɔtɔ,

a nafunli gbo ayi,

i nama gaxu,

18 bayo a mi sese xalima a yii laxira yi.

A hɛrisigɛn mi birama a fɔxɔ ra.

19 Hali duba diin nan yi a ra a dunuɲa yi gidini,

hali a to matɔxɔxi,

a yi sabatixi waxatin naxan yi,

20 a sama a benbane fari nɛn laxira yi.

Ne mi fa dunuɲa toma sɔnɔn.

21 Nafulu kanna naxan xaxili xurun,

na maliga xuruseen nan na,

naxan faxamatɔ a ra.